اهم اشاعات و افتكاسات و خرافات لعبة كمال الاجسام

[angel2022]

بسم الله الرحمن الرحيم

موضوعى عن ( خرافات و افتكاسات كمال الاجسام )

اكيد كلنا بنواجه الموضوع ده ... كل واحد تسألوا يقولك اعمل كذا و اوعى تقرب من كذا و العب معرفش ايه و العب التمرينة ديه و لازم تلعب كل التمارين للعضلة و انت بكدة يتتوه المبتدىء اللى جى يسألك او ممكن كمان تتوه واحد قديم و تحيره ب 40 رأى من كل واحد شكل و طبعا مش عارف يسمع كلام مين ولا مين يقوم سايب اللعبة فى اقل من شهر

هات بقى شوية فشار او كيس شيبسى و اقرى يا معلم الافتكاسات الكتيرة اللى ملهاش اى لازمة

1- و من اكبر الافتكاسات ( اتمرن زى البطل عشان تبقى بطل )

الكلام اللى موجود فى المجلات الكتير و اللى الكابتن بتاعك يقولهولك او واحد قديم فى الجيم مثلا انك تلعب كل يوم و متريحش خالص عشان العضلة تزيد و تكبر ده كله كدب فى كدب و تحوير عشان يبيعوا منتجاتهم بس
انت لما تخشلى تمرينة بنش مثلا و تروح لاعب زى ما قالولك بنش عالى بار و دمبل و تفتيح و بعدين مسطح بار و دمبل و تفتيح و مقلوب هكذا بردو و تقوم رايحلى على الاوفر و تخلص تقوم داخل باى

انت كدة بتموت نفسك يا عم و تعدلى ساعتين او 3 فى الجيم !!! ليييه بالطريقة ديه هتتسبب فى انك تتمزق او تجهد العضلة زيادة ( اوفر تراينينج ) و تقل منك و ترجع متلاقيش نتيجة فى الاخر تروح سايب اللعبة يا كبير .. نصيحة ( العب قليل و صح .. كل كتير و مفيد .. حجمك يزيد ) حلو اوى انك تلعب يوم بارات بس و يوم دامبل بس .. و هكذا .. نوع فى تمرينتك و متعودش جسمك على حاجة معينة


2- ( اتدرب لحد ما العروق تبان )

يا جماعة العرق فى العضلة بيبان لما العضلة تتحط تحت ضغط معين ده بيزود ضخ الدم فيها مش معنى ان العرق باين عندك يبقى انت كدة بتلعب صح و العضلة بتزيد .. العضلة تزيد لما تلعب بأوزان تقيلة و تتغذى كويس و تشغل الياف العضلة عن طريق الحركة الكاملة للتمرينة .. مش لما تعملى 100 عدة باى و تلاقى العرق بان عندك يبقى انت كدة واد معدى

لما دهون جسمك تقل هتلاقى عروقك كلها بانت و ساعتها تتأكد انت بتصفى الدهون مش بتزود حجمك


3- و جينا لأهم و اشهر افتكاسة فيهم كلهم ( الاعداد القليلة للضخامة و الاعداد الكتيرة للتقسيم و التشريخ )

اللى الناس فهماه انك كل ما تخفف وزن و تلعب اكتر هتشرخ و تزود وزن و تلعب اقل هتضخم و ده اكبر غلط .. يا جماعة العضلة ليها 3 حالات بس

يا اما بتزيد و تكبر يا اما زى ما هى يا اما بتقل و تنكمش

مفيش حالات غير ديه .. لو عايز تكبرها علطول غير الروتين اللى انت ماشى عليه و الوزن بتاعك يزيد دايما و تلعب صح من غير مساعدة و تلعب حركة كاملة و تغذية كويسة

عايز تخليها زى ما هى افضل اعمل الروتين اللى بتعمله دلوقتى و شغال عليه

عايز تخليها تنكمش مفيش اسهمل من كدة يا عم .. قعد فى بيتكوا و متنزلش الجيم تانى

مفيش حاجة اسمها التمرين ده بيقسم و التمرين ده بيضخم .. التقسيم ناتج من حاجتين و هما عضلة نضيفة معليهاش فاتس .. و تانى حاجة هى نسبة الفاتس اللى فى جسمك تكون قليلة

الاوزان الخفيفة عمرها ما تبنى عضلات .. هى بتحرق السعرات الحرارية مش اكتر .. و لو عايز تحرقهم يبقى اجرى افيدلك او نط الحبل


4- ( السبت: بنش .. الاحد: ظهر ,,,,,, )

هو مش دستور لازم تمشى عليه .. انت لو عايز تزيد يبقى لازم تنوع فى الروتين بتاعك .. الروتين ميقعدش معاك اكتر من شهرين او اقل كمان
بس خد بالك و انت بتغير الروتين عشان متجهدش نفسك و العضلة على الفاضى

مع العلم ان العضلة بتزيد فى الراحة مش فى الجيم .. ريح اكتر تزيد اكتر .. ممكن تلعب 3/4 ايام و تريح الباقى .. متلعبش العضلة كل يوم عشان تزيد معاك .. كدة لو اتنطت عمرها ما هتزيد .. مرة واحدة فى الاسبوع لكل عضلة حلو اوى


5- ( فاجىء العضلة و خليها تخمن انت عايز ايه )

هههههههههه .. ديه اكتر واحدة مضحكة فعلا .. تروح للكابتن يقولك لازم تفاجىء العضلة بتاعتك .. حزر فزر يعنى

هى النظرية فعلا صح .. لكن طريقة تنفيزها بتتم غلط خالص .. العضلة معندهاش عينين عشان تشوف انت الاول كت بتلعب بالبار و بعد كدة عملت نفس الحركة بس بالدمبل .. لا لا كدة لازم ازيد بقى ههههههههههه

مفاجأة العضلة مش بنفس التمرين بأداة مختلفة و لكن بحركة مختلفة كمان .. العضلة بتفهم الحركة مش التمرينة
عايز تفاجىء عضلتك يبقى مثلا بدل ما كت بتلعب علطول تجميع دمبل .. العب تفتيح .. كدة العضلة تزيد معاك .. و زى ما قلت قبل كدة غير الروتين دايما و متسبتش على حاجة


6- ( كل ما تطول فى الجيم و فى تمرينتك كل ما تزيد اكتر )

و ده اكبر غلط كتير من الناس بتعملوا و حتى الناس القديمة فى اللعبة بالطريقة ديه بيجهدوا نفسهم و عضلتهم فى ناس بتبقى نايمة فى الجيم و صبح و ليل و تعد 4 ساعات تلعب

ياجماعة هرجع و اقول تانى اللى بيزود العضلة ( تغذية سليمة .. فترة راحة مناسبة .. تمرينة ذكية ) .. اخرك فى الجيم ساعة او ساعة و ربع لو انت مفترى .. اكتر من كدة انت بتهد العضلة مش بتبنى اى حاجة و بتتعب نفسك على الفاضى و المليان ولا هتحس بأى فرق


7- ( وجع العضلة دليل على نموها و زيادتها )

بردو ناس كتير تقولك لو محستش ان العضلة وجعاك يبقى انت مبتزدش و لو حسيت كدة تانى يوم اتأكد انها بتكبر

ده كلام ولا ليه اى لزمة .. العضلة تعرف انها زادت لما تلاقي نفسك بتشيل اوزان اتقل .. بتعلب اعداد اعلى .. حجمك بيزيد تبع القياسات و ميزانك بيزيد


8- ( شرب المكملات فى ايام الراحة بيديك دهون )

لما تشرب المكمل بتاعك لو كان بروتين فى ايام الراحة عمره ما هيديك دهون بالعكس ده بيساعد جدا فى عملية شفاء العضلة و بيخلنى نسبة النيتروجين و الاحماض الامينية فى جسمك متساوية .. بالتالى هتحس بفرق فى التمرين


9- ( اى حاجة المحترفين بيعملوها ( روونى/جاى ) يبقى انا كمان هعملها و هتجيب نتيجة )

اكبر غلط ممكن تعمله فى حياتك انك تتمرن زى واحد من المحترفين اللى متعرفوش يا معلم ان المحترف ممكن يكون بيجهد نفسه فى الجيم ( اوفر تراينينج ) و يعد ساعات كتير يلعب و يعملك 20 مجموعة على معرفش 100 عدة .. لو عمل زيه يبقى كأنك بتنتحر و الله

يا فندم .. المحترفين كل حياتهم منشطات فى منشطات .. فا مهما عملوا فى الجيم مش مهم لأنه كدا كدا حجمه بيزيد من غير دهون حتى لو بيلعب غلط


10- ( كل اى حاجة و متخفش مدام بتتمرن )

بردو تروح الجيم تقول للكابتن انا باكل كل حاجة بس عايز اربى عضلات هيقولك ماشى مش مهم ايدك على فلوس الاشتراك .. يا جميل اللعبة ديه تغذية و راحة .. لو مظبطش اكلك و مشيت على نظام غذائى كويس ملائم ليك يبقى ولا ليه اى لازمة اللى بتعمله .. انت عايز تفهمنى انك اول ما تخلص تمرينة رهيبة تروح البيت تضربلك 4 سندوتشات برجر ولا فراخ محمرة .. يا عم كل ده دهون ملهاش اى لازمة .. ابوس ايدك ابعد عن المحمر و المشمر ده .. خليك فى المسلوق دايما و الخضار حلو جدا و مفيد .. مع العلم ان جسمك بيحتاج نسبة دهون بس مفيدة
ديه بتلاقيها فى سمك التونا .. مش مضرة بالجسم ديه و زيت الزيتون .. و حاجات كتير تانية


11- ( انت ممكن تبقى ضخم اد المحترفين من غير منشطات )

اهو ده الهبل بعينه .. كل واحد يخشلك الصالة بتاعته يلاقيلك كام صورة عملاقة متعلقة عال حيطة .. يقولك ياااه امتى ابقى زى دول تلاقى الكابتن فى ضهرك .. ان شاء الله بس استمر معانا بس و هتبقى قدهم بس هتاخد وقت حبتين .. واحدة واحدة تلاقيه بيجيب رجلك عشان تاخد مكمل من عنده ( اكيد مضروب ) شوية كمان يقولك بص انا هديك حقنة تخليك سوبر مان .. و ضر نفسك يا ناصح بقى

المحترفين دول بياخدوا منشطات منسابة ليهم .. لكل محترف دكتور خاص بيه و يعرف ايه انسبلوا عشان ياخدوا .. مع العلم ان تقبل الجسم للمنشطات او المكملات ديه حاجة جينية وراثية

12- ( لعب الحديد هيوقف نموك )

النقطة ديه مهمة اوى للناس الصغيرة فى السن .. تروح الصالة الكابتن يقولك متلعبش و انت واقف و علطوا خليك قاعد و معرفش اعمل ايه عشان تطول و متعملش ايه عشان متقصرش

الدراسات اثبتت انك ممكن تبتدى تلعب من سن 8 سنين .. ارنولد كان بيتمرن فى مرحلة نموه و مع ذلك نموه موقفش ..


angel2022 silkroad4arab

سبب بقى الاشاعات ديه مييييييييين .. معظمهم المبتدئين .. كل مبتدىء يعملك افتكاسة جديدة و تمرينة غريبة و يقولك ده الصح حتى جرب و هتحس بالعضلة شغالة .. يا عم الكبير انا لو مسكت علبة بيبسى و اعدت احركها فى الهوا العضلة هتشتغل هههههههههه

و كل مبتدىء يسمع كلمة من واحد ملوش خبرة اساسا فى اللعبة يقوم ناشرها بقى و يبقى دستور فى الصالة و بردو المجلات سبب اخر للاشاعات ديه .. عايزين يبيعوا يعملوا ايه يعنى !!!



موضوعى خلص يا جماعة .. انا عارف انا خبطت فى ناس قديمة كتير و حطمت افكار ناس جديدة .. اعتذر عن كدة
بس ديه الحقيقة .. ارجو ان محدش يزعل منى

تحياتى : angel2022 زياد خالد

[spritex]

موضوع جامد و كله صح تقريبا

و مضحك كمان :)

و تقبل مروري

[asfora99]

مشكوررررررر وانا هعمل زى مانتا قلت ^^

[ibrahemmohamed]

كلامك حكم يابرنس

[angel2022]

متشكر لكل الناس الى زى العسل الى ردت

[bodo]

كلام زى الفل يا باشا
ان شاء الله هاعمل بيه(بعد ما اخس هههههههههه)

[m_mm622]

موضوع جامد وانا بشكرك عليه علشان انت عرفتنى حاجات حلوه

تعرف .. انا فى الجيم بعمل اوفر ترانينج
السبت بنش وباى .. والاحد ظهر وتراى .. والاثنين كتف ورجل واعيد تانى الثلاثاء والاربعاء والخميس :eek: :eek: :eek:

بس بريح الجمعه :D

وفعلا بعد حوالى 3 شهور حسيت باجهاد لدرجه انى قررت حتى من غير ما اعرف كلامك انى العب يوم ويوم
ففعلا كلامك صح ودا عن تجربه شخصيه :)

[OmadO]

لول ده انا كان الكابتن بتاع الكورة بيقولى اعمل كل الحاجات دية ..
دة طلع كابتن اهبل

[Black Evil]

الله علي الجمال مشكور يا غالي علي الموضوع ده
جميل جداًَ

[DR\Walid AbaZa]

موضوع جميل جدا واستفدت منه الكثير مع اني رياضي قديم :) وكلامك كله صح

[emadtitoo]

انتا كدة جبت من الاخر كلامك كن ال أ لل ي 10 علي 10

[angel2022]

واللة انا مش عارف من غير التشجيع دة الواحد كان هيعمل أية

و أى حد لية أى سؤال فى كمال الأجسام

انا موجود

[ThE_InViSibLe]

هههههههههههههههههههه

موضوع جامد فعلا :d

انا فعلا بقيت بسمع حاجات غريبة في الموضوع دة ..

بالتوفيق دائما ان شاء الله ..

:)

[a7mad63]

كلام زى الفل يا باشا

[angel2022]

فين الردود