[C# .NET] دوره البرمجه بلغه #C من الصفر الى الواحد (الجزء الثانى)

[iMido]

الجزء الثانى من الدوره

اولا بعتذر على التوقف بس والله ظروف خارجه عن ارادتى و منهم ظرف هيفضل هيأثر على الدوره ,,, فيجوال ستوديو اتمسح من عندى
عملت سكان الانتى فايرس مسحه ف بالتالى مش هعرف اعمل الدوره بالصور و مش هعرف اجرب الاكواد

ملاحظه مهمه : انا مش طالب فى كمبيوتر ساينس ف بالتالى مش مبرمج محترف و علشان اعمل دوره لازم مرجع و المرجع فى دورتنا هو MSDN مرجع العالم كله D:

نبدأ الشغل



فى الجزء التانى هنتكلم عن المتغيرات و الثوابت ,, ايه هيا المتغيرات و الثوابت ؟
هنفترض ان الميمورى بتاعت جهازك دى دولاب كبير فيه اكتر من درج تمام ؟
الدرج ده هو المتغير
مكان فى الذاكره بتخزن فيه معلومات فى اى وقت و بتقدر تعدل عليها فى اى وقت

ملحوظه : المعلومات الى بتتخزن فى متغير بتتخزن بصفه مؤقته يعنى بعد م تشغل برنامجك و تغير قيمه المتغير و تقفل البرنامج و تشغله تانى القيمه هترجع لاصلها لو ليها اصل (حددتلها قيمه افتراضيه وقت تعريفها)او للقيمه null

التعريف الى فوق ده انا الى مألفه, التعريف الصح للمتغيرات انها المساحه الى بيحجزها برنامجك من الذاكره علشان يخزن فيها قيمه يقدر يغيرها فى اى وقت ممكن القيمه ده تكون نص او رقم او شرط منطقى او اى نوع متغير تانى

تعريف المتغيرات



الصيغه العامه لتعريف المتغيرات هى

كود PHP:

var type var name; 


var type => نوع المتغير
var name => اسم المتغير
var = variable و معناها متغير

شروط تعريف المتغير

• يستحسن انك تختار اسم للمتغير بيعبر عن قيمته او الحاجه الى هتستخدمه فيها علشان يسهل عليك قراءه برنامجك فيما بعد
• اسماء المتغيرات حساسه لحالة الحروف يعنى friendName غير FRiendName و دى نقطه مهمه خليكو فاكرينها
• بلاش تعرف متغيرين ليهم نفس الاسم و تغير فى حاله الاحرف بس علشان متتلخبطش
• لازم اسم المتغير ميكونش اسم كلمه محجوزه من الكلمات المحجوزه فى لغه c#
• (الكلملت المحجوزه هيا صلب لغه البرمجه و بتستخدم لتسير البرنامج و التحكم فيه و لونها بيكون ازرق فى الفيجوال ستوديو)

انواع المتغيرات فى c#



المتغيرات ليها انوع كتير و انتا بتختار منها علي حسب حاجتك و على حسب القيمه الى هتخزها فى المتغير ,, يعنى تقدر تعتبر نوع المتغير ده حجم الدرج الى ف الدولاب (ارجع ل تعريفى( D: !



التعليقات فى لغه c#



التعليقات هيا حاجه مهمه جدا جدا بتفيدك فى توثيق وظيفه علشان لو عوزت تتطور البرنامج بتاعك فيما بعد فهم وظائف الدوال و الاكواد يكون اسهل

كود PHP:

//ده كومنت , و بيظهر فى الفيجوال ستوديو بلون اخضر
//برنامجك مبيتأثرش باى حاجه تكتبه فى الكومنتات
//اكتب اى حاجه فى كومنت و البرنامج هيشتغل عادى 


امثله



*الامثله ده مش متجربه يا جماعه ف ياريت اى حد عنده الفيجوال ستوديو يجربها و يقولى لو في غلطات*

ده برنامج هيطبعلك نص على شاشه الكونسول ,, مش هالو ورلد لا D:
حاجه مفيده اكتر

كود PHP:

string Name = "Mohamed;
Console.WriteLine("My name is "+Name);
Console.ReadLine(); 


فى السطر الاول عرفنا المتغير و اسندناله قيمه و هى اسمى و مش لازم نسندله قيمه فى وقت التعريف بعكس الثوابت يعنى تقدر تكتب الكود ده كده

كود PHP:

string Name;
Name="Mohamed";
Console.WriteLine("My name is "+Name);
Console.ReadLine(); 


و هيأدى نفس الوظيفه

لاحظ:
النصوص دايما بتتكتب بين علامتين تنصيص "النص هنا"
اى سطر فى الكود لازم ينتهى ب فاصله منقوطه او سيميكولون ;
فى المثال استخدمنا علامه + للجمع بين كلمه my name is و قيمه المتغير الى هيا الاسم ,, خليك فاكر ان النص بيتضاف لبعضه ب +
و السطر الاخير علشان البرنامج ميقفلش لوحده علشان برامج كونسول بتقفل اول م تأدى مهمتها و لو طبع النص بس كده هيكون ادى مهمته و خلص الكود و هيقفل بس السطر ده بيديله امر قراءه مدخلات ف بالتانى مش هيقفل غير لما تدوس على اى زرار

الكود الى فوق ده هتضيفه فى الداله main و اسمها void main و دى الى تنفيذ البرنامج بيبدأ منها

يعنى الكود فى النهايه هيكون كده تقريبا

كود PHP:

  static void Main()
        {
            string Name = "Mohamed";
            Console.WriteLine("My name is "+Name);
            Console.ReadLine();
        } 


برنامج تانى لاظهار رقم

كود PHP:

    static void Main()
        {
            int lvl=117;
            Console.WriteLine("my char level in silkroad online is "+lvl+"pvp ?");
            Console.ReadLine();
        } 


خدت بالك من حاجه ؟
طب هيا ايه ؟
ايوا انتا صح .. كتبنا نص عادى و بعدين علامه + و بعدين المتغير الى هناخد قيمته نطبعها وبعدين + تانيه و بعدين اى نص تانى

المثال الاخير يعتبر ملخص و هيكون فيه تفاعل مع المستخدم و هوا الى هيدخل البيانات

كود PHP:

    static void Main()
        {
            string firstName,lastName;//بامكانك تعريف اكتير من متغير فى نفس السطر من نفس النوع بكتابه اسم
//كل متغير منفرد و تفصل بين اساميهم بالعلامه دى ,
            int age;
            Console.WriteLine("Enter your first name : ");
            firstName=Console.ReadLine();//حفظ البيانات فى متغير
            Console.WriteLine("Enter your last name : ");
            lastName=Console.ReadLine();
            Console.WriteLine("Your name is : "+firstName+" "+lastName;
            Console.WriteLine("Enter your age : ");
            age=int.Parse(Console.ReadLine());//parse مهمتها تحويل النص الى عدد علشان يتحفظ فى
//متغير عددى
//ممكن تمسحها و تتعامل مع العمر ك انه نص بس الموضوع هيأثر ع البرنامج الخطوه الجايه
            Console.WriteLine("Your age is "+age+" and you will be "+(age++)+" in the next year";
//زودنا المتغير age رقم واحد و مكنش هينفع نعمل كده لو كان متغير من النوع string
           Console.ReadLine();
        } 


و كده نكون خلصنا الجزء التانى من الدوره , يارب يكون اسلوبى فى الشرح بسيط بما يكفى علشان المبتدأين يستوعبوه و اى استفسار انا فى الخدمه

شكرا للمتابعه ,, سلام

[Midget1337]

شكراً جزيلاً

الشرح جميل و الجدولين اللي فوق مفيدين جداً :)

[iMido]

المشاركة الأصلية كتبت بواسطة Midget1337 عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

شكراً جزيلاً

الشرح جميل و الجدولين اللي فوق مفيدين جداً :)

تسلم ربنا يخليك ,, نورت الموضوع

[ViP_BedoZ]

الله ينور ياصاحبى

[iMido]

المشاركة الأصلية كتبت بواسطة SaLaMaT عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

الله ينور ياصاحبى

تسلملى يا رب

[HLP]

good job