عـايـز اتـغـير للاحـسـن : مـش عـارف اعـمل ايـة . !

[.a7la-smile.]

بجد عاوز اتغير للأحسن .. بس انا مش عارف اعمل ايه !



جملة سمعتها كتير جداً خصوصاً من ناس للأسف مش عندها العزم الكافي إنها تغير نفسها
وللعلم فإن التغيير مش مجرد كلمة او امنية او رغبة فقط

شوفوا معايا كدة وبصراحة

انت كسلان او مش عاوز تكلف نفسك عناء قرار التغيير اعرف انك هتفضل طول عمرك كدة ومش هتتغير الا لو ربنا حكم بما يريد !
لانه وببساطة شديدة التغيير هو قرار واضح وصريح واستعداد حقيقي انك تعرف انت عاوز تبقى ايه ولازم تعمل ايه وتقوم فعلا تعمله عشان تتغير

وعشان يجي القرار والهمة دي كان لازم يكون فيه تدخل من الخارج
والتدخل ده كان من عند ربك لما أرسلك رسالة واضحة لازم تؤمن بيها بجد من قلبك عشان تلاقي قرارك
واللي بيه هتلاقي تغيير في تفكيرك واللي هيغير حياتك كلها تغيير جزري

انت لازم تتغير وتقوم وتعمل لان الدافع قوي

1- انت لو ما اتغيرتش هاتتعب في الدنيا اوي

2- لو ما اتغيرتش مش هترتاح نفسيا

3- لو ما اتغيرتش هتموت وانت كدة وتبعث وانت كدة وتقضي حياتك كلها في النار ( عاوز ده ؟ )

4- الموت يقين مفيش مفر منه وانت في اختبار حاول تنجح

- هاتقولي ما عندكش العزم او مش قادر تاخد قرار بعد كل ده -
* هاقولك انت ما آمنتش بجد وما خفتش بجد وما حسيتش انك في مسؤولية بجد *

- هاتقولي والله حاسس بس مش عارف -
* هاقولك انت لما تبقى عاوز تشرب بتقوم تشرب *
* لما بيكون عندك حاجة مهمة اوي انت مقتنع انه لازم تعملها زي انك تدرس حاجة معينة أو تزاكر حاجة معينة انت بتقوم وبتعملها / عشان انت بجد امن بيها وآمنت انك لازم تعملها *
* يبقى لما تقولي انك فعلا مؤمن وحاسس وانت مش عارف تقرر وتقوم تنفذ يبقى انت بتكذب عليا وبتكذب على نفسك *





الحل الوحيد عشان انت تتغيير هو : انت !


انت قرر انك هاتتغير

يإما تستحمل اللي هيجرالك لو ما اخدتش القرار ده

قوم بجد العمر والزمن مش هيستناك

كمان شوية ! لا يبقى انت بتستعبط وبتضحك على نفسك انت مش عاوز تتغير ولا حاجة
قوم واثبت انك عاوز تتغير كلها ايام وهترتاح بعد اما تتغير فعلا ما تأجلش ما انتش عارف لو اجلت يمكن تنسى
يمكن تموت
يمكن تنشغل
قوم دلوقتي اتغير





طب ياعم قولي اعمل ايه
قولي كدة واحد اتنين ثلاثة
انا قررت اتغير بس ايه بقى المفروض اعمله ؟

( ايوووووة هو ده اللي انا عاوز اوصل معاك ليه )





نبتدي بقى :

1- أول حاجة نعملها قول لنفسك انا بجد مستعد ( اؤمر نفسك انت اقوى منها مش هي اللي اقوى منك )

2- ادعي ربك ( يارب ساعدني انا متوكل عليك لا حول ولا قوة لي الا بك يارب انا هبدأ وأجاهد للتغيير مش هاقدر انفع نفسي الا بيك وبمساعدتك وتيسيرك للأمور عليا يارب )

3- اول ما تبتدي بيه تحديد منهجك في التغيير





* بداية عالج نفسك من الأمراض العضوية اللي تقدر تعالجها - غير بيئتك اللي تقدر تغيرها - ابعد عن الصحبة السيئة - ابعد عن اي مؤثر خارجي ممكن يعيقك في رحلتك للتغيير قدر الإستطاعة

*اولا التغيير النفسي والروحي ( هو اساس التغيير )

* ثانيا هتغير عقليا وثقافياً

* ثالثاً هتغير بدنيا هكون متفوق وقوي بدنيا ورياضياً

* رابعاً هبتدي أبني نفسي بجد ماليا وإجتماعياً أنا انسان بجد ناجح

* خامساً أنا هساعد قرايبي وأهلي وكل اللي انا مسؤول عنهم انهم يتغيروا زي ما انا اتغيرت

* سادساً أنا هغير للأفضل كل ما هو تحت سلطاني . انا هكون مميز بإذن الله

* سابعاً أنا مستعد أموت عاوز أقابلك يارب وانت راضي عني انا تعبت كتير عشان اوصل للمرحلة دي وتكون راضي عني يارب الحمد لك انك ساعدتني وقدرت اوصل لده يارب رحمتك وجنتك يارب
شايف التغيير والنجاح حلو ازاي ؟ بيدي راحة مش كدة ؟

هو هووووووووه اصحى انت لسة في البداية يا حلو
عاوز توصل مش كدة ؟





طب بالنسبة للتغيير النفسي أعمل ايه ؟

هاقولك على الأعمال دي حافظ عليها بجد

( كل حاجة اتعلمها كويس قبل ما تبدا عشان تعرفها صح وتأديها صح على اد ما تقدر )

1- ابعد عن المؤثرات الخارجية اللي ممكن تعطلك في تغييرك

2- عالج نفسك من الامراض قد ما تقدر

3- طهر نفسك ، وخلي نفسك دايما واد نضيف كدة ونشيط ( المية مفعولها جامد والاستحمام كمان )

4- نظم نفسك ولبسك ومكانك اللي انت فيه ووقت نومك وصحيانك ابدأ حركة التغيير





أولا: ابدا انك تحافظ على الصلاة كلها في وقتها
ادي لنفسك فترة مجاهدة لغاية ما تحافظ عليها وتتوضى حلو كدة وتبقى عشرة على عشرة
ولغاية ما تلاقي نفسك بجد في الصلاة وتبدأ تقرب من ربنا اكتر بجد





ثانياً : انت حافظت على الصلاة ياعم اهو وعديت اهو وبقت الصلاة حلوة وبتحبها حافظ بقى على سننها وزود وياريت تقدر تجيب قيام الليل وزيد بقى دي الصلاة بقت حبيبتك خلاص





ثالثاً : قيم أركان الإسلام الخمسة كلها انت يعتمد عليك بجد دلوقتي . ياريت بقى لو مش بس الفرائض زود في السنن





* رابعاً ايه رأيك تتعلم بقى دينك وتدرس الاعجاز ويلا نحفظ بقى القرآن ونزود الزكر ونخلي حياتنا احلى وأسعد ؟ وتسمع خطب وانت طبعا دلوقتي بقيت منظم وقتك





* خامساً حافظ كويس على عينك وفرجك وقلبك وايدك ورجلك وحافظ على لسانك وودانك
علمهم ازاي يبقوا محترمين واعمل بيهم الحجات الحلوة اللي تقويهم وابعد عن اللي يقلل من قيمتهم





* سادسا حسن علاقاتك بالناس دايما خليك حلو مهما كان اللي قدامك وحش واوعى تغضب دا انت بقيت راجل نضيف دلوقتي خليك بشوش وسهل وواثق في نفسك وكمان متواضع وشهم





* سابعاً : صل رحمك وجيرانك واصدقاءك من وقت للتاني وما تنساش هدية بسيطة وظريفة وابعد عن الخلافات ما تبقاش مجادل اوي حتى لو انت صح خليك خفيف الضل كلامك معقول وسكوتك حلو
حب الدنيا والناس والعالم وما تكرهش غير الشر فيهم واعرف ان فيهم خير دايما الا الكافر بالله
هايحبك الجميع وهتبان متميز وتحس بالراحة والأمان


وصلت لهنا انت كدة بجد بجد تقدر تنجح في حياتك لوحدك وتقدر تديرها كويس وانا عارف انا بقول ايه





بس نكمل بردو :

عشان تبقى وصلت بجد في تغييرك الروحي والنفسي

1- حدد وقت تمارس فيه تمارين التأمل ورياضة اليوجا

2- بعدها ضاعف طاقتك الكامنة استخدم قدراتك الخارقة كن مميز

3- غير تفكيرك وظبط عقلك الباطن وشيل الحجات والأفكار التعبانة اللي ملهاش لزمة

4- عاوزك تحس في نفسك بالصفاء والطيبة والنقاء وانك هتفيد العالم كله وتبقى نسمة ليه مهما كان قاصي عليك لانك جميل بجد وحلو انت مش للأعمال والتصرفات الوحشة دي هتقلل منك مش هتزود

5- حاول تقوي الصفات دي فيك

* ذكر الله

* اليقين أنك هتموت في أي لحظة فكون مستعد كل لحظة

* هدفك الحقيقي الجنة

* احسن في كل اعمالك واحسن للناس حتى لو أساؤوا اليك انت مش عاوزهم انت عاوز الجنة

* ما تغضبش انت اكبر من انك تغضب على الحجات الهايفة كله رايح وكل واحد هياخد حقه

* الرحمة والنسمة والهدوء والحب

* الثقة في الله ثم في النفس

* التوكل والإيمان وتقوى الله

* الحكمة والعزيمة والصبر







هتاخد معاك وقت بس صدقني دي رحلة جميلة اوي وممتعة وعشان ما فيش وقت ابدأ من دلوقتي مش من الثانية الجاية حتى ( بس استنى لما تكمل الموضوع الاول ههههه ولا اقولك قوم احسن مانتش ضامن تعيش لغاية اما تخلصه ولا انا ضامن اني اعيش لغاية ما اوريلك الموضوع اصلا ههههه )







التغيير العقلي :

1- اعرف ازاي تزيد تركيزك سواء بالأكل او الشرب أو الالعاب او التمارين

2- بعد كدة زود ذاكرتك بطرق زيادة التركيز المختلفة

3- زيادة نسبة الذكاء

4- درب نفسك على طرق التفكير والتحليل العلمي المنظم والخرائط الذهنية .. إلخ







1- أدرس الدين بشكل مكثف

2- ادرس حياتك والعالم المحيط بيك والحياة الإجتماعية كويس

3- زيد من علمك واحاطتك بمجال عملك وبعض المجالات اللي تقدر تفيدك

4- زد من ثقافتك العامة وحط في جدولك مكان للقراءة حتى لو صفحة كل يوم هتفرق كتير







التطوير البدني :

1- الأول بعد ما تعالج نفسك بدنيا كويس إبدأ بزيادة لياقتك البدنية وخلي جسمك متناسق وحلو

2- اتعلم سباحة لانها مفيدة جدا كبداية

3- اتعلم رياضة جميلة انت بتحبها

4- اتعلم رياضة من فنون الدفاع عن النفس القوية كونغ فو وشو أو كراتيه او آي كي دو .. إلخ

5- اتمرن يوميا

6 - حدد لنفسك تدريبات خاصة وتطور تدريجي وامكانياتك البدنية المميزة







التطوير المالي :

1- دبر شغل يساعدك فيما هو آتي :

* تتعلم حاجات تفيدك والعمل بيها دخله اكبر

* اتعلم اتدرب واحصل على شهادات تفيدك فيما بعد

* ادرس ازاي تجيب فلوس كتيرة جدا - خليك طموح صدقني لو ربك اراد هتقدر بس حاول

2- وبعد . . اعمل مشروع صغير ونميه على مراحل .. !

3- ظبط اول حاجة اساسياتك واحتياجاتك الاساسية

* اكل شرب لبس مسكن زواج .. الخ

4- طور نفسك للأحسن لما تزيد قدراتك المالية







ابدأ خطوة خطوة وبالتدريج ابتدأ من معرفة عيوبك ومميزاتك وقدراتك ونقاط ضعفك
وابتداء من قرارك انتهاء الى نجاحك ان شاء الله
نظم نفسك انت مش محتاج حد يساعدك غير ربك
ابدا وغير واعرف ان طريق الالف ميل يبدأ بخطوة

وما تنساش ان الكسل وضعف العزيمة وانتفاء الصبر بيهم عمرك ما هتشوف النور الا لو ربنا ليه ارادة تانية



ان اصبت فمن الله ، وان اخطأت فمن نفسي ومن الشيطان

[CHI-VA]

ممتـــــاز والله بجد

[.a7la-smile.]

منور الموضوع

[™(Harry potter)™]

معلومات رائعه نايس

[☜ ĂиTaKą ☞]

تسلم

[_SheriL_]

الله ينور

[Thє Aиɪмατɪσи]

رائع شكرا يا باشا

[UnTouChabIe]

تسلم موضوع رائع

[Subway]

اعمل يا اشرف موضوع ارشيف للمواضيع المميزة وحط دا فى

[.a7la-smile.]

تسلمو يا رجالة ع المرور .