أفكـــار في راســي [مصلحتى أولا]

[poiu]

شويه أفـــــكــــار فـ راسى محيرنى أوى

[ هرشت فـ راسى بـ ضهر القلم و قلت أكتب ]

الثانية مثــــلا

مبــدأ مصلحتى أولا

أصاحب الواد ده

و أخد منه مصلحتى

و بعد كده أنفضله

طب ليه ما تصاحبوش بجد

و تاخد منه مصلحتك برده

بس ما تنفضلوش

تفضل صاحبه

ده معرفة الرجال كنوز يا جدع

و لا أنت مش معايا

ما أكيـــد يعنى هيبقى ليك مصلحة تانية عنده

أصل الـ ... بتجيبه ....

<النقـــط كلمات خارجة حذفت بواسطة الرقابة>

يعنــى كده كده هتحتاجه تانى

فـ أنت خليك صاحبه على طول يا أخــى

و الله أنت الكسبان

تحت مصلحتى أولا برضه

أخلى البت دى تحبنى

إشطــه يلا كلام موبايل و خروجه و عيش فـ اللذيذ

و بعد أيام و شهــور سوا

هوبا مع السلامة يا حلوة

ليه يا حبيبي

أصل أنا مش هتجوز بنت كلمتها فـ الموبايل [ مصلحته بتقوله كده ]

طب ما أنت يا أهبل يا ابن الهبلة

هتسيب واحدة أنت كلمتها عشان تتجوز واحدة كلمت غيرك

كما تدين تدان

فــــكــــــرة تالته مثلا

الشباب و آبائهم

عليا الطلاق بالتلاتة لو الآباء

بيقرأو أفكـــار أبناءهم

كان الاب كل دقيقة يرزع ابنه قفا محتـــرم

قفا يلبسه فـ الحيط

مع إن الأباء لما كانوا شباب

كانت نفس الفكـرة هتحصل

يعنى مثلا أبويا بيقولى فـ يوم أنا كنت شاب و من سنك

اعمل كده و متعملش كده يبنى

يا بابا

إخــــــرس أنت هتناقشنى

طب ما أنت يا حاج عارف إن أسلوب الأمر

مبينفعش مع الشباب

و رحمه أبوك يا شيخ

خدنى صاحبك و اللى انت عايزة

قوله على إنه نصحية

لأنك أكيــــــــــد جربت

أكيد حبيت و أكيد شربت سجاير [ أكيــد كنت بتسرق سيجارة من علبة أبوك ]

عشــــــان تعرف السجاير طعمها ايه

زى ما إحنا أحيانا كنا بناخد فلوس الدروس و نروح نلعب بيها [ بلاي ستيشن ]

إنت أكيد [ ستوب ثانية ]

بكلم نفسي [ مكانش فى بلاى ستيشن أيام أبويا ]

بس بس افتكرت

أكيد كنت بتاخد الفلوس من أبوك

على أساس إنك هتعمل بيها حاجة مهمة

و تاخدها تأجر بيهـــا عجلة و لا تدخل بيها السيما

يا حاج عيب إحنا قافشين حركاتك إحنا جيل الإنترنت

يعنى ممكن أجيبلك صورتك و أنت لسه [ بلبوص أد كده ]


ها خليــك معايا عـ الخط و تابع

بص احترمنى أظبطك و أوريك الكليب بتاع ساندى الممنوع من العرض

سانـــــــدى ..!!

سورى يا بابا أقصد هيفا و نانسي

أصل ساندى دى سر بين الشباب

سيــــــم يعنى


شويه أفـــــكــــار كتيــــــــــر أوى فـ دماغى

و هيطلعو واحدة واحدة و نتكلم فيهم






Poiu

╠ Mad Genius ╣

[Kemo Eagle]

هههههههههههههههه موضوع جامد جداً

وفعلاً الناس بتاعت مصلحتها كترت اويــــــــــــــــــــ

ممكن لما يقرأوا الكلام ده يخلوا عندهم دم ويحسوا

ان الصداقة مش عشان خاطر المصلحة الصداقة عشان يبقا ليك صاحب

يساعدك وقت الشدة وانت كمان تساعدوا تزوروا بعض فى افراحكم واحزانكم

بس فى ناس كتير مش فاهمة ده يا محمد (( موضوع جامد ربنا معاك))

اســــــــــــتـــــمــــــــــــــر

[MadOmar]

موضوع جامد وطريقتك في الكتابه جامده
الفكره الثانيه مبدأ مصلحتي اولا
اعتقد ان موضوع واحد يصاحب واحد مصلحه بقى حوار فاكس دلوقتي من اول مواقف بيتقطع الواد ده مصاحبك ليه عارفك ليه مصلحه وخلاص ؟؟؟؟؟؟؟
لو ومصلحه وخلاص انت بتنفضله لحد ما يزهق ويكبر دماغه منك

تحت مصلحتى أولا برضه

أخلى البت دى تحبنى

إشطــه يلا كلام موبايل و خروجه و عيش فـ اللذيذ

و بعد أيام و شهــور سوا

هوبا مع السلامة يا حلوة

ليه يا حبيبي

أصل أنا مش هتجوز بنت كلمتها فـ الموبايل [ مصلحته بتقوله كده ]

طب ما أنت يا أهبل يا ابن الهبلة

هتسيب واحدة أنت كلمتها عشان تتجوز واحدة كلمت غيرك

كما تدين تدان
فكك من النقطه دي مش طلبه احراج :fisch:

الفكره التالته
انا شايف ان هيا دي الدنيا وده الطبيعي زي ما انت كاشاب ليك طريقه تفكير وتصرفات
هوا كأب ليه طريقه تفكير وتصرفات خوفا عليك طبعا بيكون عمل كل الحاجات الانت عملتها بس يوم ما بيزعقلك ولا بيقفش عليك ما بيكونش حاطط ده في دماغه يعني شوف لو انت عندك اطفال في البيت اخوك ابن اخوك ابن اختك اي حد عند 3 4 سنين حتلاقي نفسك ساعات بتزعقله على حاجات كتير مع انك كنت طفل زيه وانت نفسك عارف ان ده طفل ولازم يعمل كده بس بتشوف دي الطريقه المناسبه عشان ما يعملش الغلط ويعمل الصح

[Lonely]

موضوع جميل جدا و فكره جديده مجتش علي بال حد من المصلحجنيه و يلا بقه كمل الافكار

[JungleRule]

ههههههههههههه مواضيعك جامده وافكار جامده لو معاك نمرت ساندى ادهانى ههههههههههههههههههههههه ههههههههههه والله الموضوع جميل تسلم ايدك

[Alone iN The Sky]

الواحد لازم يكون محترم - بس فى بعضهم بيسلك طريق مش حلو من كتر ما بيشوف كل الناس فاسدة فا بيقول عادى انا هعمل زيهم - والمشكلة الاكبر لو كانت دى بنت عملت غلط فا هو بيتشجع

لذلك ربنا قال - " لَأَمْلَأَنَّ جَهَنَّمَ مِنَ الْجِنَّةِ وَالنَّاسِ أَجْمَعِينَ

ده معناه ان الجنة مش هتكون مليانة زى جهنم
لكن هيكون فيها عدد اقل من جهنم

وكمان مش شرط انت تكون بالجنة واصحابك
بالعكس

ممكن واحد بس انت من اهل الجنة - وكل الناس بأكملهم اللى تعرفهم جهنم
واللى يدخل معاك الجنة ممكن واحد زيك كان فى عصر قبل عصرك - او فى قوم من اى قوم انبياء اللى ماتو او من الناس اللى لسه هتتولد

فا الواعد مايعمتمدش عالناس اللى عايشة معاه ويقول ماهى كل الناس كده بتعمل الغلط

اللى هيعمل غلط هيكون اخرته عذاب - والناس الصالحى متجزئين على مستوى الازمنه - فا ليه انت ماتكونش واحد منهم ؟؟؟

والاصدقاء حلوين كتير - المهم فيهم لما الواحد يتضايق يفضفض له ده افضل شىء - ويمكن اغلبيتهم مصالح وده حسب مانا اتعاملت فى دنيتى

كان ليا صاحب مع بعض ثانوى وجامعة - يعنى 8 سنين - وكان بيته وبيتى مفتوحين على بعض يعتبر معناها انه دايما عندى وانا عنده رغم انه ساكن بعيد جدا عنى

وانا اللى قلتله تعالى معايا جامعتى واقنعته - بعد ما دخل اصبح اى دورة او اى شىء فى اى مصنع يخرج هو ومايقلش !!! وصحابى اللى لسه عارفهم يحكو ليا
بيوم اتصلت بيه وهو بداخل مصنع - عشان اشوف رد فعله
بيقولى انا بالشارع فى مشوار كده مع حد ... قلتله طيب وماردتش اقوله انك منافق بس احتفظت بداخلى

واهو اتخرجنا وخطب كمان من غير ما يقولى وانا اخدت قرار انه اتمسح من ذاكرتى - والله ياما ساعدته بدراسة وخارج الدراسة وياما حليت له مشاكله الاسرية كبيرة واتبهدلت بسببه - بس كله لله انا مش بطلب منه شىء

لكن بنت لحست عقلة وخليته انسان تانى - وهو الخسران

الصاحب الكويس لازم الواحد يحتفظ بيه اكيد - بس قدر الله وما شاء فعل - والحمد لله انى انا اللى بعدت عنه عشا هو مصلحة وكمان عايز يضرنى

وتسلم عالموضوع

[poiu]

تشكروا يا رجالة ‏:‏)‏

بس عايز حماس زي الموضوع إلي فات ‏

[Just_Warrior]

هتسيب واحدة أنت كلمتها عشان تتجوز واحدة كلمت غيرك

والله انا اتقتلت من الضحك على الجملة دى
فعلا الشباب اغلبهم بيبقو عاوزين ياخدو كل حاجة
يعنى يصاحب واحدة لكن ساعت الجواز يقلك لا يا عم انا متجوزش غير البنت اللى عمرها ما صاحبت ولد خالص
وعاوز صحبة يطلع معاه جدع على الرغم من انة واد ندل و سيس
ربنا يكرمنا ونعرف نغير من نفسنا

[Paranoid]

مواضيعك جميله :)

و أنا أدري الناس بصديق المصلحه ده

[JungleRule]

الصديق لما يكووون عايز مصلحه منك اول حاجه لو فى سيلك رواد تلاقيه دخل علييك ازاى
اهلا ممكن نتعرف
تانى حاجه بعد مايتعرف علييك بعديها بى خمس دقائق تلاقيه طلب منك حاجه وهتلاقيها معاك انتا وى هو عارف انها معاك اسال مجرب انا ياما عرفت عيال بتوع مصالح

[ScAry_MAN]

هههههههههه جامدة

[Sky_AnGel]

هههههههه جامد جدا وصح الناس بتاعت مصلحة الايام دى هات وخد

[CError]

مواضيعك جميلهوالله انا اتقتلت من الضحك

[xTHE_Draagon]

كمل كمل حلوة الموضيع دي

[MAXx__warrioR]

مع نفسك بقا انتا افكارك بدأت تغلط فيا ..هههههههههههه
صداقات المصالح دا شئ شائع دلوقتى فى مصر والاسباب كتير
يعنى لما امشى مع واحد طول السنه اروح معاه الدرس علشان بيغششنى الواجب
ولا..ساعه الامتحان ...تلاقينى بقول ابيات شعر فى العيال الى انا اصلا شايفهم ..علشان اعود جمبهم ويغششونى :(