عروسة تيك اواي (قصة مهيسة) ..

[((مهند))]

يرن جرس الباب , ويتجه الحاج محمود لكي يفتح ليجد أمامه شريف وأسرته , فيرحب بهم ويدخلهم للصالون قائلا : يا ألف خطوة عزيزة .. اتفضلو يا جماعة .

وتجلس أسرة شريف في الصالون مع الحاج محمود ... ويبدأ والد شريف في التحدث : والله يا حاج محمود احنا ما جينا هنا إلا لما عرفنا إن كل الناس بتتشكر فيك ... ويكمل شريف : أي والله يا حاج , دا أنا حتى قلت للوالد إن الحاج محمود عنده حتة أصلي كده تقفيل بلاد بره .

الحاج محمود باندهاش : حتة ايه يا بني! ... مش انتو برضه جايين تطلبو ايد مي بنتي .

وينظر والد شريف إلي شريف في غيظ موجها كلامه للحاج محمود وهو يبتسم ابتسامة صفراء : هههههه ... طول عمر شريف بيحب يهزر ... يا حج احنا فعلا جايين نطلب الحتة الاصلي... أصدي بنت حضرتك لشريف ابني .

الحج محمود : دا احنا لينا الشرف ... دا احنا نجهزوهالكو ونشحنها على بيتكم يا ابو شريف ... وأجرة النقل والمشال علينا كمان ... طب تصدق وتآمن بالله , مي من أسبوع حلمت انها كانت عند محل جزم وكانت بتجرب جزمة عجبتها أوي بس ملاقيتش الفردة التانية , سألنا الشيخ : قال لسه ربنا مأذنش بالعريس , لكن لو لقت الفردة التانية هتلاقيه ... معداش خمس أيام ومي حلمت إنها لقت الفردة التانية ... وأدي الحلم اتحقق والفردة ... أصدي العريس جه .

شريف في سره ( أنا جزمه يا ابن ال ............ ) .

والدة شريف : أمال العروسة فين , مش هنعاين البضاعة بقى ؟

يميل والد شريف ناحيتها ويقول بصوت خافت : اتكتمي يا ولية ... بضاعة ايه إلي هتعاينيها .
وينادي الحاج محمود على مي : يا مي ......... يا مي ........... تعالي يابنتي .

( تدخل أم مي علي مي في غرفتها وتقول لها : انت لسه ماجهزتيش ... يلا العريس عاوز يشوفك ... وبعدين مال وشك أحمر قوي كده ؟! ).

- اعمل ايه يا ماما , علبة المكياج خلصت , فخليت سارة تسكعني كفين على وشي.
- يا خبر اسود ... دا انت على ما تطلعي يكون وشك ابتدا يزرق .
- اهئ اهئ اهئ ... يعني العريس هيضيع يا ماما ؟
- الله يخرب بيت شورتك انت واختك .. روحي اغسلي وشك بشوية مية , وربنا يستر .
(تمسح مي دموعها وتذهب لتغسل وجهها وتعود لغرفتها )
- كده وشك بقى كويس ... يلا أنا هطلع دلوقتي , وابقي هاتي العصير وتعالي .


في الخارج يدخل ميمو ( أخو مي الصغير ) ويسلم على الموجودين , ويذهب ناحية شريف ويقول له : ازيك يا عمو .. أخيرا هتيجي تاخد مي وتريحنا من أرفها , عشان خاطري يا عمو ابقى خدها معاك وانت مروح , وسيبلنا مكانها مروحة .

ويشخط الحاج محمود في ميمو : خد يلا ... عيب كده .

شريف : سيبه يا عمي دا شكله دمه خفيف قوي ... انت في سنة كم يا ميمو ؟
ميمو : رايح كيجي تو .
الحج محمود موجها كلامه لشريف : ولا قولي يابني , انت خريج ايه ؟
شريف : تالتة ابتدائي .
- نعم !
- في الحقيقة يا عمي .... أنا وقفت عند تالتة ابتدائي , وبعد كده ما كملتش تعليمي .
- طب وبتشتغل ايه ؟
- بشتغل في ايطاليا .


وما أن يسمع الحج محمود كلمة ايطاليا حتى يطمئن قلبه , ويكمل حواره : والله يا ابني انت دخلت قلبي من أول ما شفتك .... ويقاطعه ميمو : وأنا كمان يا بابا حبيته أوي ... بس يا عمو شريف هي كلية تالتة ابتدائي دي كم سنة ؟, وبتتخرج تبقى ايه ؟

يصرخ الحج محمود في ميمو : وبعدين معاك يلا .. عيب كده , ولكن تقاطعه أم مي : يوه يا حج ... ما تسيب الواد يتسقف .

يرد شريف بسخرية : بص يا ميمو ... مش هي اسمها تالتة ابتدائي ... يبقى تلات سنين .... وبتخرج اشتغل في ايطاليا علطول .

ميمو : أنا لما أكبر هخش الكلية دي عشان تبقى تذاكرلي .

وفجأة يعم المكان صمت رهيب , حيث تظهر من بعيد مي حاملة صينية العصير , وتدخل عليهم بخجل .... ولكن تتعثر قدميها في السجادة فيتطاير الصينية والاكواب , ليستقر أحد الاكواب على رأس العريس .....تشششششششششش....آآآآآآآآآآآآآه , ويتناثر العصير على ملابس العريس ... وسريعا يقف الحج محمود وينظر إلي ابنته في غضب ويعتذر للعريس : معلش ...... معلش يا شريف يا ابني ...

شريف : ما حصلش حاجة يا عمي , دا حتى دلق العصير على العريس خير .

يرد الحج محمود : عندك حق يا ابني ... بقولك ايه , ما تقلع الجاكته واديها لأم مي تغسلها ... اقلع يا راجل , دا حتى الجو حر .

ويقلع شريف الجاكتة , وكمان القميص , ويجلس بالفانلة , وتحاول أم مي ومي اخفاء ضحكاتهم من منظر العريس وهو يجلس بالفانلة ... ويكمل الحج محمود : ها ...ايه رأيك دلوقتي ... مش كده أحسن , وبعدين جاكتة ايه وقميص ايه إلي أنت جاي بيهم , دي كانت موضة أديمة .

ويرد شريف :ولا يهمك ياعمي... بص بقى على بلاطة كده ... الشقة وموجودة , والشبكة تطلب إلي هيا عاوزاه ...العفش تنقي إلي عاوزاه ... والحمد لله أنا راجل كسيب وبشتغل في ايطاليا , يعني إلي مي هتطلبو , مش هتأخر عليها.. ومش عايز منكم غير مي بالكارتونة بتاعتها وعليها شهادة ضمان خمس سنين .

الحج محمود : ضمان ايه يا ابني , دي مي واخدا شهادة الأيزو 9001, و إذا كان عالضمان , فأنا أضمنهالك مدى الحياة , بس أنا مش مسؤول عن سوء التخزين أو الاستخدام .

شريف : اطمن يا عمي , أنا استخدامي نضيف ... دا حتى الموبايل إلي معايا ده بقالو أربع سنين , عمره ما عطل مني .

ينظر الحج محمود إلي مي ويقول : ها إيه رأيك يا مي .

وتنظر مي إلى الأرض في خجل وتصمت قليلا , ثم تقول : عليا النعمة يا دادي ده عريس لقطة , وأنا مستعدة أروح معاه دلوقتي ... ثم تنظر إلي شريف وتقول : خلاص يا شرشوري , اعتبرني من دلوقتي مراتك .

ويرد شريف : خلاص نقرا الفاتحة .

لكن تقف مي وتقول بصوت عالي : استنو هو احنا لسه هنقرا الفاتحة ... احنا نجيب المؤذون حالا , وخير البر عاجله .

تمت

[saher2001]

lol....
مش لاقي حاجة اقولها غير كدة

[™MidoGhost™]

يخربيت كده

جمدا جمدا جمده اخر 16 حاجه

انا مبطلتش ضحك

تقبل مروري

[Oo_DeviL_oO]

المشاركة الأصلية كتبت بواسطة ™midoghost™

يخربيت كده

جمدا جمدا جمده اخر 16 حاجه

انا مبطلتش ضحك

تقبل مروري

مبطلتش ضحك على ايه بالظبط

فهمنى والنبى ايه الى ضحك

[Sky_AnGel]

هههههههه حلوة والله واللى قال علليها وحشة يبقى مقرهاش

[V.I.P9]

حلوووووووة xD

[omaiad]

هههههههههههههههههههههههههههههه جامدة

[Tau]

حلوة بس مش للدرجادي

[((مهند))]

شكرا على الردود

المشاركة الأصلية كتبت بواسطة oo_devil_oo

مبطلتش ضحك على ايه بالظبط

فهمنى والنبى ايه الى ضحك

طب وانت زعلان يعني عشان الموضوع عجبه ؟! .. حاجة غريبة الصراحة ..

[unlimitedhit]

looooooooooooooooooooooool
brrrrrrrrrrrrrrrrrrrrrrrrrrrrrrrrrrrrrrrrrrrrod
el7a2onyyyyyyyyyyyyyyyyy
7elwa yad EstameR:))