مسلسل يوميات مشرف

[SmartMad]

ملحوظه قلبوظه: الحلقات مش من تأليفى
والقصه ان فى لجنه هتزور المنتدى وهيبقى فى تجهيزات ليها
وهتبدأ من الحلقه الثالته

الحلقة الاولى


مدير عام المنتدى :
يا فتاح يا عليم يا رزاق يا كريم ..
أصبحنا وصبح الملك لله..
شغلانة ما يعلم بيها إلا ربنا..
إيدك معايا يا ياسر علشان نفتح المنتدى
الساعة داخلة على سبعة والنهار شقشق ..




المراقب : سمى انت وادخل يا خالد
أنا عايز أنام شوية ..!!




المدير العام : يا جدع قوم بلاش كسل ..
المواضيع كتيرة ولسه على ما نقرأ ونفرز
ونشوف إيه اللى هنخليه وإيه اللى هنحذف منه
سلة المحذوفات فاضية بقالها اسبوع ..!!


المراقب : أهو بالوظة وفتكات و حلموس وحزلقون ..
جم أهم .. خليهم يبدأوا معاك على ما احلق دقنى ..




المدير العام : على فكرة يا جماعة الواد بالوظة
ده زهقنى من عيشتى .. أنا مش ملاحق عليه ..
ده تشوفولكم صرفه معاه ..


المراقب : أنا رأيى إن سيد ده نعامله معاملة فاقد الأهلية


المشرف : سيد مين .. انت مش معانا ولا إيه.!!
الدور والباقى على
بالوظة وفتكات و حلموس وحزلقون ..
مثقفين زيادة عن النسب المسموح بيها فى المنتدى..
كلام فى الدين شوية والسياسة شوية والإرهاب شوية
وابن لادن شوية والاثار شويه والازياء شويه
وعالم المرأه والمطبخ شويه لما الضغط ابتدى يعلى عليا..
انتم عارفين العنيين مفتحة علينا الأيام دى..
وعشان يلبسونا السلطنية .. تلاقيهم فجأة
نقلوا ع الموسيقى والفن التجريدى والالعاب الكتابيه
علشان ننسى الكلام التقيل ..




المدير العام : أنا شايف إن أخطرالموجودين على الإطلاق
فتكات..
عاملة ركن لسلطة بابا غنوج
فى باب المطبخ .. وسببت لى مشاكل فى البيت مع المدام


المراقب : وسع يا جدع ياسو وصل ..
صباحين وحته .. مين بس اللى مزعلكم ..
وانا احذفه من على خريطة المنتدى ..
بس شوفولكوا حل فى اللى بيقول
جواز عتريس من فؤادة باطل ..
ده هنسكت له ولا حنبقى رجالة ونقف وقفة رجالة
وكل ما حد مننا يشوفه يروح لازقه إنذار ..
لحد ما يزهق من عيشته ويخلع لوحده ..




المدير العام : انا معاكوا يا رجالة ..
لازم نقف لهم وقفة رجالة ..
اهم حاجة عتريس وبابا غنوج ملهمش دعوة
بفؤادة ..
يروحوا يقطعوا بعض فى طبق سلطة تانى ..
اقصد منتدى تانى ..


حلموس : أنا رأيى إن الفرخة وهيا بتعبر الطريق
داست على كل اللى قدامها ..
يبقى نتعلم من الفرخة يا جماعة مش عيب ..
اللى مش عاجبه قواعد الكتابة هنا ..
ندوس عليه أو أقل ما فيها ننتف ريشه ..




حزلقون : عفارم يا حلموس ..
هيا دى .. ننتف ريشه .. فكرة فى الجون ..
بعيد عن الإنذارات واللبش ..
ننتف ريشهم .. هيا دى ..

فتكات : أنا ضد العنف فى الحوار ياجماعة ..
مش كل ما نختلف مع واحد فى الرأى ننتف ريشه..
خلينا نتحاور معاهم حوار راقى يا نقنعهم يا نقنعهم ..!!


المشرف : يا فتكات معلش مع إحترامى ..
فيه كام واحد جايين جداد هنا ..
محتاجين شوية ترصيص وظبط زوايا
سيبوا الحكايه دى عليا ..




المدير العام : كفايه بقى كده ..
واقفلوا المنتدى النهاردة للصيانة ..






وحلقة اخرى ..

[SmartMad]

احبطونى
طيب ننزل بالجزء التانى خلينا نوصل للجزء اللى هتشعلل فيه بسرعه


الحلقة الثانيه




مدير عام المنتدى :
يا جماعة أنا عايزكم تفتحوا عينيكم وتراقبوا الناس كويس ..
الفترة دى حرجة وحساسة فى تاريخ المنتدى ..
ودلوقتى تقدروا تتفضلوا على مكاتبكم جتكوا البلاوى


المشرف هامسا فى أذن المراقب :
إيه العبارة .. مال البيج بوس كارف علينا كده ليه ..
اللى يسمعه كده يفتكر إن احنا بنعبى فى فلوس
من ورا الشغلانة دى ..
ده أنا الشغلانة دى لولا إنها عاملالى بريستيج ..
ولا كنت قبلتها .. إنت عارف إنى كان نفسى من زمان أبقى مشرف .. حتى لو على فرقة ..

( الم النقطة يعنى ..)


المراقب :
عارف يا محمود أنا زيك بالظبط ..
إنت عارف إنى كان نفسى أدخل كلية الشرطة ..
عشان تبقى فى إيدى سلطة بس مجموعى فى الثانوية العامة
ماجابنيش ولا ودانى ..
وبعدين كمان مكنتش حقبل فى الشرطة عشان مقلبظ ..



حلموس :
ممكن نبطل رغى شوية ونشتغل شويتين..
الجدع اللى كاتب موضوع
(إيه الفايدة من ورا المنتدى ده )
عايزين نحول أوراقه لفضيلة المفتى


المشرف :
هوه المفتى فاضى لنا يا حلموسى
المفتى بيحضر من دلوقتى علشان الحج ..
إحنا نصفى الجدع ده من سكات..
فى العزومة الجاية فى المول يكون اسلام ومحمود راكبين موتوسيكل ومعاهم حزلقون..
وأول ما يشوفوه داخل المول يصفوه ويهربوا


احمد نينجا :
وأنا عليا هجيب لكم صورته..
هخترق جهاز الكمبيوتر بتاعه وأدعبس فيه على صورة له
يكون مخزنها على الجهاز ..


حزلقون:
أنا ضد التصفية الجسدية..
.. يعنى اللى زى ده لازم يكون على راسه بطحة ..
واللى بيته من قزاز ما يحدفناش بالطوب ..
فاحنا نعرفها ونبتزه .. وناخد منه اللى فيه النصيب ..
ولا من شاف ولا من درى ..



فتكات :
تعالوا بسرعة.. الحقونى .. شوفتوا الموضوع دة ..

يجتمع المشرفون حول فتكات
فى فزع متسائلين (موضوع إيه ؟؟)

فتكات :
ده موضوع مكتوب فى صفحة الحوادث
فى ( الجريدة ) مش هنا فى المنتدى ..

المدير العام :
ممكن تتكلمى علطول ..
أقصر الطرق إلى الحقيقة هى طريق صلاح سالم


فتكات :
قصدك أقصر الطرق إلى السجن


ينتزع المدير العام الجريدة بقرف
من يد فتكات قائلا :
يختى إنطقى إحنا ناقصينك

يقرأ المدير العام المكتوب فى الجريدة بصوت مرتفع :
مقتل عامل نظافه بالمول ..
مسلحان يطلقان النار عليه ويلوزان بالفرار على موتوسيكل ..
النيابة تعد بفك غموض الجريمة خلال ساعات ؟؟


حلموس :
يعنى بدل ما نصفى الجدع بتاع
( إيه فايدة الكتابة فى المنتدى )
قتلنا العامل الغلبان دة ..


المشرف :
: إنت يا عم الغبى .. هو احنا لحقنا نعمل حاجة ..


حزلقون:
شئ غريب فعلا .. لازم ألاقى حل للغز ده ..



المدير العام
لغز إيه وهباب إيه .. الله يخيبكم ..
كنتوا هتودونا ف داهية ..

انا كان عندى استعداد انى احرم نفسى من العشا ..
علشان تستعشوا
احرم نفسى من الغطا .. علشان تستغطوا

انتوا اللى زيكوا مش لازم يعيش ليوم الثلاثاء
ولا الاربعاء ولا الخميس ..!!
ده أنا لو معين أرنوب بدالكم كان عمل شغل أنضف من كده ..

إنتم إيه مشرفين ولا اكياس جوافه ..




مدير عام المنتدى للمشرفين :
أنا كنت عايز أناقش معاكم فكرة كده


المشرف :
خير اللهم اجعله خير


المدير العام :
هى قواعد الكتابة فى المنتدى حاليا كام صفحة


المراقب :
حوالى 25 صفحة تحتوى على 3000 بند


المدير العام :
لااااااااا دى كده تبقى بسيطة ..
أنا عايزكم تخلوها 100 صفحة ..
فيها على الاقل 50000 بند ..
ولو عرفتم تخلوها أكتر من كده يبقى أحسن ..


المشرف :
مش كتير كده يا بوس ...
ده اللى مسجل جديد على ما يقراها تكون سنانه وقعت ..


المدير العام :
ماهوه ده المطلوب ياعم .. مش عايزين حد يقراها ..
وصلت الفكرة يا زغللة ..!!


حلموس :
فكرة بمليون جنيه .. الكبيركبير يا بوس


احمد نينجا :
ما تفهمونا إيه العبارة يا خوانا ..


حلموس :
يعنى اللى هيسجل جديد لازم يوقع إنه قرا قواعد الكتابة
فى المنتدى ووافق عليها .. تمام ..


فتكات :
طبعا لما يلاقى 100 صفحة تحتوى على خمسين ألف بند
هيروح موقع من غير ما يقرا حاجة .. تمام ..




حزلقون :
لأ مش تمام .. مش فاهم حاجة ..!!


المشرف :
هو انت ديما كده مش فاهم حاجة ..
أى حد يكتب حاجة ما تعجبناش نروح لازقينه إنذار ..
ونقول له إجرى يلا روح إقرا قواعد المنتدى قبل ما تكتب ..
داهية فيك وفى أيامك السودة ..


حزلقون :
طب إفرض عضو غتيت
ورخم قرا القواعد كلها قبل ما يوقع ..


المشرف :
من لم يمت بالسيف مات بغيره .. مين يعادينا .. هيه هيه ..




المدير العام بيقول للمراقب :
نبه على جميع المشرفين إن فيه إجتماع هام
الساعة 3 فى قسم المشرفين .. الإجتماع مغلق وسرى للغاية ..


المشرف :
بخصوص إيه


حزلقون :
أنا عن نفسى معرفش يظهر إنه توب سيكرت ..
المدير العام حويط اوى ..
مش عايز حد من الأعضاء يشم خبر عن الإجتماع ..




وفى منتدى المشرفين الساعه 3 بدأ اجتماع مغلق
وسرى للغاية بحضور جميع المشرفين ..


المدير العام :
طبعا مستغربين أنا جمعتكم ليه النهارده ...
الموضوع باختصار إن فيه معلومات وصلت للقيادة السياسية
إن المنتدى فيه عدد كبير من الأعضاء بيسبحوا ضد التيار
وما بيعرفوش يعوموا .. وهيغرقوا ويغرقوا المنتدى معاهم ..
ووصلتنى معلومات مؤكدة
إنهم ندبوا لجنة حموم الانسان علشان تقوم بزيارة مباغتة
جدا للمنتدى ومعرفة مدى صحة المعلومات دى..
لازم نلملم نفسنا بسرعة ونستعد للزيارة المباغتة دى
واللى غالبا حتكون الأسبوع اللى جاى يوم السبت ..


احمد نينجا :
إحنا جاهزين يا بوس ... لازم نبتدى نلملم كل المواضيع
اللى رافعة الشراع ونغرقها ..




المشرف :
تمام ونخلى المواضيع اللى عايمة ع الوش ..


حلموس :
مفيش مواضيع كويسة غير الموضوع بتاع جرجاوى
( المية تروى العطشان .. )


المدير العام :
مين جرجاوى ده ؟


المشرف :
ده بيبيع جرجير .. فى اول المنتدى .. وغاوى رش مية ..

حزلقون :
عايزين نستعد للموضوع ده بكل جدية يا جماعة..
زيارة لجنة حموم الانسان للمنتدى شئ مش بسيط ..

المدير العام :
ندخل على النقطة اللى بعدها فى جدول الأعمال ..
تنظيم موكب رئيس اللجنة


المشرف :
أنا رأيى إن الموكب يدخل من باب المنتدى العام
ولو زحمة يبقى من باب الأسرة والطفل ..


فتكات :
مش هنرش المنتدى يا بوس


المدير العام :
إيه المناسبة ..


فتكات :
علشان نطرى القاعدة ..


المدير العام :
إنتى مين يا بنتى ...إنتى بقالك كتير معانا هنا


حلموس :
فعلا .. أول ما تخش اللجنة ندلق عليهم جردل ميه ..


المدير العام بيتكلم مع المراقب :
أول لما الزيارة دى تتم على خير الطقم ده كله لازم يتغير!!


المراقب:
ويا ترى هنقدرنعوض العباقرة دول تاني يا بوس




وانتهى الاجتماع على خير..

[WELFA]

على حسب رغبت صاحب الموضوع