ليه كدا يا ريس خمسين سبب يخلوني أقول لك ((أنا مش آسف يا ريس))

[tigergirl156]

ليه كدا يا ريس تعمل فينا كدا

خمسين سبب يخلوني أقول لك ((أنا مش آسف يا ريس))

نا مش آسف يا ريس :

1) علشان عيشتنا في جوع ومرض وحرمان 30 سنة وكنت عايز المحروس إبنك يكمل علينا 30 سنة تانيين .
2) وعلشان سبت شبابنا يموتو في قوارب الموت على شواطئ إيطاليا .
3) وعلشان سبت البطالة تحاصرنا وتخنقنا وتطلع ميتين أهالينا .
4) وعلشان سبت كلاب أمن الدولة تنهش في لحمنا وترهبنا وتنتهك أعراضنا .
5) وعلشان أقسام الشرطة في عهدك بقت أوكار للتعذيب وإهانة المواطنين .
6) وعلشان سبت شعبك يسكن في المقابر مع الأموات وإنت نايم في قصرك .
7) وعلشان ما شفناش ناس بتاكل من صناديق الزبالة إلا في عهدك .
8) وعلشان ما عرفناش ظاهرة إسمها أطفال الشوارع والعشوائيات إلا في عهدك .
9) وعلشان ما شفناش ناس بتموت في طوابير العيش والغاز إلا في عهدك .
10) وعلشان خليت مهية المواطن ما تكفيهوش لحد خامس يوم في الشهر .
11) وعلشان سبت التجار يحتكروا أقواتنا ويلعبوا بينا ويرفعوا الأسعار زي ما هم عايزين .
12) وعلشان سبت مرض الكبد الوبائي ينهش في أكباد الشعب المصري .
13) وعلشان أكلتنا قمح مسرطن ، ولحوم فاسدة ، ومواد منتهية الصلاحية ، وشربتنا مية المجاري لحد ما انتشر فينا السرطان والفشل الكلوي وكل أمراض الدنيا المستعصية .
14) وعلشان سبت المزارعين إللي ما عندهمش ضمير يأكلونا خضروات مسقية بمية المجاري .
15) وعلشان سبت الحرامية ينهبو ثروات البلد وثروات الشعب ويهربوها برة البلد .
16) وعلشان التعليم في عهدك بقا زبالة .
17) وعلشان الرعاية الصحية في عهدك بقت زبالة .
18) وعلشان الزبالة وطفح المجاري في عهدك بقا الصفة المميزة للشارع المصري .
19) وعلشان كل حاجة في عهدك بقت ملوثة .. الهوا ، والمية ، والنيل ، والشوارع ، والسياسة ، والفن ، وحتى ضماير الناس بقت ملوثة .
20) وعلشان حرمتنا من الحرية ، وزورت الانتخابات ، وسلمت البلد للبلطجية يتحكموا فيها .
21) وعلشان سبت حرامية السلطة يبيعوا ممتلكات مصر وأراضي مصر بأبخس الأثمان للتجار وللمستثمرين .
22) وعلشان في عهدك بقى الشعب يموت بالميات والآلاف في العبارات ، وفي حوادث القطارات ، وتحت أنقاض العمارات وصخور الجبال .
23) وعلشان خليت شوية عيال يحتكروا الحياة كلها في مصر ويقسموها بينهم وكأنها عزبة ورثوها من أهاليهم .
24) وعلشان في عهدك بقت مصر من أكتر دول العالم نسبة أمية وناس عايشة تحت خط الفقر .
25) وعلشان الفساد في عهدك بقى للركب ... (بشهادة سكرتيرك الدكتور زكريا عزمي) .
26) وعلشان بعت الغاز للصهاينة بأبخس الأثمان .
27) وعلشان سمحت بالسطو على أموال المعاشات والتلاعب بيها .
28) وعلشان سمحت بالسطو على أموال مكتبة الإسكندرية .
29) وعلشان عيشتنا 30 سنة تحت حكم قانون الطوارئ وكأننا أعداء ليك مش شعبك اللي المفروض تحميه وتسهر على راحته .
30) وعلشان سبت كلاب أمن الدولة يزرعوا بذور الفتنة الطائفية بين أفراد الشعب المصري الطيب المسالم علشان يقدروا يسيطروا عليه .
31) وعلشان حرمت مصر من واحد من أهم مصادر الدخل ليها وتشغيل العمالة وهو زراعة القطن ، إللي كان قبل عهدك أفضل قطن في العالم .
32) وعلشان خليت شعبك يشرب المية من الجراكن ، ويستنى فناطيس المية يا جت يا مجتش ، والنيل ماشي قدام عينيه وهو عطشان ، وزرعه عطشان ، وكلاب السلطة عمالين يسقوا ملاعب الجولف بتاعتهم من مية الشعب المصري الغلبان .
33) وعلشان ، مصر ، بلد النيل ، ما عرفتش حاجة إسمها (الفقر المائي) إلا في عهدك .
34) وعلشان ، مصر ، بلد النيل ، والسد العالي ، والتربة الخصبة ، بقت تستورد في عهدك القمح وكل المحاصيل الزراعية الأساسية بالمليارات ، والفلاح المصري الغلبان مش لاقي ياكل .
35) وعلشان أغرقت الفلاحين المصريين في الديون وفوائد الديون وأدخلتهم السجون .
36) وعلشان سبت حرامية الأراضي يجرفوا الأرض الزراعية اللي حيلتنا ويحولوها لعمارات ومنتجعات .
37) وعلشان اتغاضيت عن تدمير الثروة السمكية ، وأجبرت الصيادين إنهم يسافروا لحدود الصومال ويعرضوا نفسهم لخطر القراصنة .
38) وعلشان الطبقة الوسطى اختفت في عهدك ، وبقى الشعب المصري متساوي في الفقر ، المتعلم زي الأمي ، لا مال ... ولا حياة كريمة ... ولا أي أمل في المستقبل .
39) وعلشان في عهدك ضاع البحث العلمي ، وهاجر العلماء للخارج ، وخرجت الجامعات المصرية من التصنيف الدولي لأفضل الجامعات .
40) وعلشان ضيعت أموال الشعب المصري في مشاريع فاشلة في توشكى ، وترعة السلام ، وشرق العوينات ، وغرب خليج السويس ، ومشروع الفوسفات .. وغيره ..
41) وعلشان التحرش الجنسي ، والبلطجة ، وفساد الذمم والأخلاق كان سمة أصيلة من سمات عهدك .
42) وعلشان محصلش في تاريخ مصر إن القضاة انضربوا واتهانوا على يد قوات الأمن إلا في عهدك .
43) وعلشان سمحت بمحاكمة المواطنين المدنيين في محاكم عسكرية .
44) وعلشان كرامة المواطن المصري برة بلده ما تهانتش واتمسح بيها الأرض إلا في عهدك .
45) وعلشان اتغاضيت عن قيام إسرائيل بعمليات قتل متعمد للمواطنين والأطفال المصرين على حدود سينا .
46) وعلشان أوقفت التحقيق في جريمة قتل الصهاينة للأسرى المصريين في حرب 67 .
47) وعلشان حرمت جنود مصر (الصعايدة والفلاحين) إللي ضحوا بأرواحهم في حرب 73 ، وحطموا خط بارليف ، وعبروا القناة ، ورفعوا علم مصر ، حرمتهم من أي تكريم ، وسبتهم يعيشوا هم وعوائلهم عيشة الفقر والجوع والذل ، وإنت كل سنة بتتكرم بالنيابة عنهم .
48) وعلشان احتكرت نصر أكتوبر لنفسك ، وألغيت ذكر كل القادة التاريخيين العظام إللي صنعوا النصر (وكانوا رؤساءك في معركة العبور) ، وحرمتهم هم كمان من أي تكريم .
49) وعلشان حاصرت أهلنا في غزة ووطيت راسنا قدام أشقائنا العرب .
50) وعلشان مكانة مصر في عهدك على المستوى العربي والإفريقي والدولي بقت في الحضيض .

ولما خرجنا للميدان نشكيلك همنا وإحنا فاتحين عقولنا وقلوبنا لكل كلمة منك ممكن تطيب بيها خواطرنا وتطمنا بيها على مستقبلنا ، رديت علينا بالرصاص وبقنابل الدخان ، وسبتنا ننسحل وننداس تحت عربيات الأمن المركزي ، وسلطت علينا بلطجية نظامك يضربونا بالطوب وقنابل المولوتوف .

علشان كدة ، أنا مش آسف يا ريس ... بجد مش آسف ... علشان إنت كان لازم تمشي من زمان ، وتتخلع من زمان ، وتتحاكم من زمان .

[ميدو 73]

والله عندك حق ف كل كلمة كتبتها
تسلم إيدك بجد ع التوبيك الجامد دا
وياريت الناس بتوع أحنا أسفين يامخلوع يفوقوا بقي

وأنا مش أسف ياريس

[takelook]

الموضوع مخالف للقوانين حضرتك اقرأ القوانين ممنوع

◄ الموضوعات التى تتضمن التعرض لأي شخص بالإهانة أو الإيذاء أو التشهير أو كتابة ما يتعارض مع القوانين المتعارف عليها رسمياً .
◄ اى مـوضـوع فـيـه تـجـريـح لـشـخـص مـهـمـا كـان و ايـنـمـا وجـد .

[!_ToGoO_MorY_!]

مكرر اكثر من مره

يغلق #