اعلان : الي مخنوق من اهله يخش هنا

[zizorizo]

بابا مضايقك؟ ماما مزعلاكي؟ خلاص من النهارده كل الكلام ده هيتغير، عرض خاص جداً ولمدة محدودة من شركة (فاميلكو) دلوقتي تقدر تختار أهلك علي مزاجك، إيه مش مصدق؟ لأ بجد لازم تصدق، دلوقتي تقدر تبعت لنا كل المواصفات اللي نفسك تشوفها في والدك أو والدتك وبعد أسبوع يتم التبديل، ولو طلبت تغيير الإتنين هتاخد عليهم أخ أو أخت هدية من اختيارك، يللا مستني إيه قوم بسرعة اتصل على .....0900".

هااااه... إيه رأيك؟ أك


هااااه... إيه رأيك؟ أكيد بكره هنلاقي كتير واقفين في طوابير مستنيين دورهم عشان يحجزوا، تفتكر العرض ده لو كان بجد كنت قدمت؟
أنا متأكد إن ناس كتير قوي ممكن يجاوبوا بلأ بس لو كان قدامهم الفرصة دي كانوا هيقدموا وهيحاولوا على قد ما يقدروا إنهم يغيروا أهلهم.

طيب إيه رأيك بقي إن العرض ده فعلاً موجود، ومش بس موجود ده موجود من غير حجز ولا غيره، والشركة مقرها الرئيسي عنوانه هو عقلك.

لأ ما تفهمنيش غلط إحنا هنا مش هنناقش ولا هنحكى في كلام سمعته قبل كده كتير، الموضوع إني جاى أبيع لك منتج ومش عاوز منك غير خمس دقايق... بس قبل ما أبتدى أحكي لك عن المنتج، لازم الأول نتفق إنك هتدينى فرصة وتجرب المنتج بتاعي وما تحكمش عليه من غير ما تجربه، موافق؟


السكوت علامة الرضا
الموضوع بكل بساطة بيتقسم لـ 3 أجزاء:
الجزء الأول، وهو تحب أهلك الجداد يبقوا عاملين أزاي؟
الجزء التاني، طريقة التبديل
الجزء التالت و الأخير، هو ميعاد الاستلام و الصيانة.
نبتدي بالجزء الأول وهو إجابة للسؤال؛ إيه هي المواصفات اللي نفسك تبقى موجودة في باباك و مامتك؟ دي يا سيدي قايمة بالمواصفات اللي ممكن تتوفر فيهم :
1.يكونوا بيحبوك
2.لما تحتاجهم دايماً تلاقيهم
3.لا يقولوا لك رايح فين و لا جاى منين
4.يعملوا لك كل اللي إنت نفسك فيه
5.يبقوا بيخافوا عليك
6.ما يتدخلوش في حياتك و لا قراراتك
7.يدولك حرية كاملة في المواضيع اللي تتكلم فيها معاهم أو قدامهم
8.يحترموا وجودك و ما يستهتروش بأفكارك

أعتقد دول أهم الحاجات اللي تحب تكون في باباك ومامتك



طيب الجزء التاني وهو إزاي إحنا هنبدل أهلك ونديلك عيلة جديدة علي مزاجك. الموضوع سهل وبسيط جداً، دلوقتي لو بصينا علي الحاجات اللي نفسك تبقى موجودة في باباك ومامتك هنلاقي مثلا:

إن موضوع إنهم يكونوا بيحبوك دي سهلة جداً لأنها أصلاً كانت موجودة عند باباك ومامتك القدام.

سيبك من دي لو شفنا حكاية إنك لو احتجت لهم هتلاقيهم، طيب ما برده دي موجودة عند القدام، لأ.... صدقني موجودة، طيب إزاي إنت قاعد دلوقتي على النت عارف تقرا المكتوب، لما احتجت إنهم يأكلوك ويشربوك ويعلموك ويفهموك ويدولك حاجة تخليك قادر تعرف عن أي حاجة في أي حتة،

طيب مش ممكن تكون إنت السبب إنهم في الحاجات التانية الصغيرة دي مش واقفين جانبك؟ رحت حكيت لهم عن مشكلتك؟ طيب وأنت رايح تحكى بصيت ولو ثانية هو أو هي كانوا عاملين إزاي؟ متضايقين ولا متعصبين؟ أو يمكن عندهم شغل كتير فعشان كده ما ردوش عليك؟ جربت تروح لهم مرة تانية؟

وحكاية إنك عاوزهم يخافوا عليك وفي نفس الوقت ما يسألوش فيك، طب دي نعملها إزاي دي؟ ما هو معنى إنهم يخافوا عليك إنهم لو إتأخرت يكلموك يطمنوا عليك، مش لازم يعنى يكون معناه تصغيرك قدام صحابك.



طيب فاضل ايه ؟

فاضل حكاية إنهم ما يتدخلوش في حياتك ولا قراراتك، وفي نفس الوقت يسمعوك ويحترموا كلامك وأفكارك، لما إنت عاوزهم يا أخي يسمعوك ويحترموا أفكارك، طيب ما تقول لهم إنت بتفكر أزاي في حياتك ومستقبلك. مرة إنت تقنعهم ومرة هما يقنعوك، وفي نفس الوقت هما كمان ثقتهم فيك هتزيد قوى والمواضيع اللي ممكن تتكلموا فيها هتزيد جداً فتبقوا أهل وكمان أصحاب وحبايب.

أما موضوع يعملوا لك كل اللي نفسك فيه أكيد من حقك إنك يبقى ليك طلبات وواجب عليهم إنهم يعملوها لك بس برضه ما تنساش وأنت بتطلب النهارده أحسن جزمة وأحسن موبايل إنك بتاخد من رصيد بكره اللي هتطلب بيه أحسن عربية وأحلى شقة، وما تنساش والدك ووالدتك جت لهم الفلوس إزاي، هي تقريباً بالظبط شبه إزاي إنت بتنجح في الامتحانات، أيام و ليالي طويلة كلها مذاكرة و تعب، تحس بإيه إنت لما تعبك ده تلاقيه مرمى في الزبالة ولا مُهمل كده في أي حتة ولا حد مقدر إنت تعبت قد إيه

على فكرة ، أنا مش عاوزك تفتكر إني معاهم ضدك... لأ ... أنا لا معاهم ضدك ولا أنا معاك ضدهم، أصلها مش حرب، أكيد برضه هما فيهم عيوب.

بص إحنا بنتكلم بصراحة برا بقى موضوع المنتج بتاعي ده، إنت عارف ليه أنا مش عارف أقول لهم عيوبهم؟ عشان أنا ما عنديش حتة أكتب لهم فيها، مممم... طب إيه رأيك بدل ما تقعد تستني لحد لما حد يقول لهم على لسانك إيه العيوب اللي بسببها عاوز تغيرهم روح إنت إعمل كده، وورينا بقى يا عم مهارتك في الإقناع وإزاي هتعرف تقول رأيك بصراحة من غير ما يبقى كلامك بيضايقهم أو يستفزهم.

بلاش إعمل إعلان زى بتاعي ده ليهم وقول لهم لو كان في عرض إنكم تغيروني هتشتروا العرض ده؟ وقول لهم إنك اشتريت من عندي أوعى توديهم لشركة تانية



خدمات ما بعد البيع

جينا بقى يا سيدي لآخر جزء، بتاع ميعاد التسليم والصيانة، الميعاد ده هيبقى في نفس اللحظة اللي إنت رحت تكلمهم فيها و تفتح معاهم صفحة جديدة وتبتدى تبيع لهم العرض زي ما اتفقنا، أما الصيانة بقى فا دي عكس أي جهاز تانى، الصيانة في أول شهرين مهمة جداً،
يعنى لازم تروح تكلمهم في أي حاجة في الفترة الأولانية دي، كلم والدك في الكورة، كلمي والدتك في الموضة، أقعدي مع والدك ساعة في اليوم وأسمعوا عبد الحليم، أقعد مع والدتك ساعة في اليوم تقول لها إزاي إن كل الستات الوقت بيكبرهم وهى الوقت بيصغرها، وصدقني كل ما تقلل الحواجز اللي بينك وبينهم من ناحيتك هيحصل نفس الموضوع من ناحيتهم.

على فكرة "البضاعة المباعة لا ترد ولا تستبدل"...

للفاشل صفتان، لا يسمع سوى نفسه، ولا يسمعه أحداً سواه

[Buffy]

lol
أنا بحب أهلى و كل واحد بيحب أهله

[Buffy]

أنا مش عاوز أشترى شوف زبون غيرى

[maxman141]

جامد اوى يا معلم

[zizorizo]

ايه كلو بيتفرج بس محدش بيشتري ؟؟؟

[zizorizo]

يا جماعة دة ولا هندي ولا ياباني
ده صنع بلدنا مصري 100% made in china

[msasa1]

المشاركة الأصلية كتبت بواسطة zizorizo عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

يا جماعة دة ولا هندي ولا ياباني
ده صنع بلدنا مصري 100% made in china

هههههههههههه
انا ممكن يمون كان عندى حابة مشاكل مع اهلى ايام المراهقة
مفيش حد بيكرة اهلو هو تعارض فى وجهات النظر مش اكتر
وعلى العموم الحمد لله عدينا وبخرج ولا بيقولى رايح فين ولا جى منين
اهم حاجة عندهم مواعيد الصلاة والاكل والنوم 8 ساعات بعد كدة انا حر :p

[T!to]

الف شكر على الموضوع ده
بس انا مش عاوز ابدل اهلاى..
كلمك صح يا محمد مصاصا...........

انا عن نفسى ::: لو ابيع كل الدنيا :: ولا اعرف اشترى اب زى ابويا ولا ام زى امى ::

فعلا والحمد لله انا عندى اب وام ولافى الاحلام :: يارب دوم عليهم الصحه والعافية ::



ويارب دوم الصحة والعافية الى جميع الاهل المسلمين

تحياتى واشكرك على الموضوع :: بس مستحيل تلاقى حد حيشترى منك ::

[M@s@T@r]

الموضوع جميل جدا جدا جدا جدا وانا هشتري منك يا باشا وانا واثق ان الطريقه ناجحه 100%


تحياتي يا زيزو

[fasterbad]

nice ya man

[Hellz_Lord]

انتا نسيت تحط سعر كمان انتا مش مدى ضمان كام سنة و مش مقدر ان في ناس عايزاهم بالتقسيط ولا لأ و ممكن ادفع بالفيسا او شيكات و عروض الصيف و الاوكازيونات و الخصم النقدى و عنوان التوكيل المعتمد

[Hellz_Lord]

انا ممكن اشتغل مدير في الشركة دى عندك^^ و عالاقل هضاعف ارباحك^^

[Silk Man]

فعلا

مشكور

[lord0fcrime]

بوص يابنى نصيحه ليك و للزمن والدك و والدتك دول لو مزعلينك زى مبتفول فتأكد أن دا كلو لمصلحتك و لو لفيت الدنيا كلها عشان تشترى واحد يحل محل والدك أو والدتك مش هتلاقى حتى لو بكنوز الدنيا كلها
تحياتى