موضوع فيه غاية الاهمية

[i_love_you]

يا جماعة انا الحمد لله ربنى كرمنى وبطلت العب اللعبة دى من 5 شهور والاكونت بتاعى والله معرفشى مع مين وفين واخر ما سمعت عنه انه اخد بلوك . انا لما سمعت الخبر ده والله زعلت جدا جدا
بس فى نفست الوقت قولت احسن علشان اللعبه دى يا شباب واقسم بالله دى فيروس بس فيروس بيدمر الانسان اللى بيلعبها مش فيروس للكمبيوتر . اللعبة دى بتزعل الاخوات والاصحاب من بعضها
اللعبة دى بتخلى الطالب الممتاز بيبقى فاشل اللعبه دى بتعلم السرقه وبتعلم البعد عن الله
وانا متاكد ان كلكم حاسيين انكوا مش عارفين تبطلوها بقت زى الادمان وعلى فكره هى فعلا ادمان زى الهيرويين والمخدرات وضررها اشد من ضرر المخدرات لانها بتخليك تهمل دراستك و تصرف فلوسك وممكن تسرق علشان تلعبها وبتدمر صحتك بسبب السهر كل يوم للصبح ممكن بسبب سلاح تخسر اعز صاحب ليك . بزمتكوا مش دى نفس اعراض مدمن الهيروين ؟
اللعبة دى كان زمان من 3 سنين كان ليها طعم وكانت فعلا لعبة جامدة كان اياميها كان الكل لفل 50 مكانش فيه الا جانجان وداونهانج بس . حالن اللعبة دى عباره عن بزنس ال جى ام بيبيع الجولد للشركات
بيبيع الصن .و كداب اللى يقول دى لعبة فرى
والله العظيم يا جماعه انا لما كنت بلعبها كانت مدمره حياتى كنت بهمل شغلى ووقتى وصحتى وفلوسى وكانت شبة ضيعتنى
بس الحمد لله صحيت وفقت على اخر لحظه

ان مابطلبشى منكم تسيبوها لاء عادى العبها بس مثلا مره فى الاسبوع كل جمعه ولا حاجه او اى وقت فيه فراغ والافضل طبعا انك تسيبها خالص
انت يا معلم ياللى بتبيع فى جولد وبتشحن سيلك بفلوس غيرك ايه اللعبة دى اللى تخلى الواحد يسرق ويكدب ويغضب ربنا علشانها ؟
اى واحد منكم باع سيلك ولا جولد ولا اتمز يا ريت يقوللى هل الفلوس دى كان فيها بركة كده زى الفلوس اللى انت بتتعب بيها او والداك ووالدتك بيتعبوا بيها ويدوهالك ؟
اكيد طبعا الفلوس دى بتطير منك من غير ماتحس وبتروح برده فى الفش والحرام
اصحا انت وهو وفوقوا من الوهم ده قبل فوات الاوان
__________________________________________________ ___
وياريت كل اللى يقرأ الموضوع يقولنا سيلك رود وصلته لغاية فين علشان لو فى اى حد جديد ناوى يدخل الخية بتاع سيلكرود يلحق نفسة من دلوقتى.
وفعلا سيلكرود دى خية ( يعنى مصيدة ) واللى بيخشها صدقونى استحالة يطلع منها .
وبردوا اللى عندوا حلول يساعد الناس تقدر تسيب اللعبة دى ياريت يقولها .
وانشاء الله انا متأكد اننا هنلاقى حل . لان مش معقول هتفضلوا تتضيعوا فى مستقبلكوا اكتر من كده
______________________________________
بقالى اكتر من ساعة عمال بدور على حلول ومش لاقى والله العظيم دى كارثة ومالهاش حل .
وعموما انا هعرض بعض الحلول اللى خطرت على بالى
اولا اوقاتك على الكمبيوتر والانترنت

* التركيز على اى حاجة تانية تكون جديدة زى التعرف على البرمجة واستخدم البرامج الجديدة التوغل فى البرامج
* دونلود افلام جديدة ومشاهدة بعض اللقطات على اليوتيوب زى الكاميرا الخفية
* او مشاهدة واستماع احلى مافى الدنيا زى الخطب للشيخ محمد حسان وغيره من اولياء الله .
* قراءة الاخبار والقصص واخر تطورات العلم ومعجزاتة.
* ارجع للشات من تانى زى زمان على الهوت والياهوو
المهم تعمل اى حاجة جديدة تشغلك عن كلمة play وياريت تمسح اللعبه من عندك وتعمل للاكونت بتاعك delete والاحسن اديلوا بلوك واخلص منه مدى الحياه لان الاكونت دى استحالة يعبر عن شخصيتك وحياتك دى عباره عن شخص وهمى عايز يعيش عن خلالك وياخد كل وقتك . ايوه الاكونت بتاعك هو اللى بيمتلكك مش انت اللى بتملكة
ثانيا : اوقاتك فى حياتك اليومية .
* اقرا القرءان وارجع للصلاة زى الاول ومتنساش انها عماد الدين .
* اخرج انت واصحابك وشموا الهوا وعاكسوا البنات زى زماان .
* المذاكرة . كلمة بتهيألى انك نسيتهااا حاول ترجع متفوق زى الاول ومتدفنشى ذكائك فى ام اللعبة الحقيرة دى .
* نام بدرى واصحى بدرى والعب رياضة وارحم ضهرك اللى اتكسر من كتر اللعب وارحم عينيك نظرك هيضعف من الكمبيوتر .
* نظم ماتشات الكورة زى الاول اكيد لو جيت تلعب ماتش زى زمان مش هتقدر تجرى ولو كون حارس مرمى هيدخل فيك اجوان للصبح .
* بالمختصر ارجع لحياتك الطبيعية من تانى وقاوم السم والفيروس اللى اسمه سيلكرود .

__________________________________________________ ________
--------------------------------------------------------------------------------

اولا شكرا على مروركم على الموضوع وانا شايف ان فى ناس كتير علقوا على الموضوع ده واكتر التعليقات بتؤيد كلامى
وفى بعض الناس ليها اعتراض زى اللى بيقول انه هو اللى بيتحكم فى اللعبه مش هى اللى بتتحكم فيه اوكى طب جرب كده اتحكم فيها وسيبها اسبوع واحد بس وساعتها هتشوف مين اللى بيتحكم فى التانى .
وفى ناس تانيه بيقولوا انها مصدر رزق السيابر ليه هى السيابر قبل سيلكرود مكانتش بتشتغل ؟؟ وثانيا دى ارزاق .
وفى ناس تانية مش مصدقه انها تمويل يهودى اسال وادخل مواقع البحث زى جوجل ودور وشوف مين ليه نسبة 51% من شركة جوىماكس .
وفى ناس تانية بتقول انها بوت 24 ساعة ومبتصرفشى فلوس على اللعبة علشان عندها كمبيوتر فى البيت وخط انترنت
ه البوت ده مش بفلوس برده ولا ايه ؟ والكهرباء ؟ وهل البوت ده انت مش كل 1 ساعه تسي كل اللى فى ايدك وتجرى تبص عليه ؟
وفى ناس تانية بتقول انها عمرها ماتخسر اصحابها بسبب اللعبه . طب قوللى كده لو انت اديت الاكونت بتاعك العز اصحابك وتانى يوم الامونت بتاعك اتسرق وهو حلفلك بالله انه مايعرفشى حاجه عن الموضوع ده . يا ترى رد فعلك ونظرتك لصاحبك هتكون ايه ؟
وفى ناس تانيه بتقول انها مش ادمااااان امال هى ايه اشرحلنا لو سمحت .
عموما انا كل اللى اعرفه عى تجربة ان اللعبة دى بتخسررر الاصحاب من بعضهاا
ياريت نشغل التلفزيون ونشوف اليهود بيعملوا ايه فى اطفال ونساء غزه ونقول لبعض ان الدنيا دى مالهاش لازمه وسيلك رود ايه وزفت ايه اللى مضيعانا دى
وفى النهاية شكرا على مروركم وانا بحترم جميع اراءكم وحاولواا تشوفواااا حلللل.

[™NoGameNoCry™]

مش تتعب نفسك يامان محدش هايسمعك وشكرا جدا على مجهودك

[HaZeM2080]

انت عندك حق فى كل الكلام ده
بس مين يسمعك.............؟

[altorkey]

مـــــشـــــــكــــ يا مان على الموضوع ــــــــــــــــور

[Ahmed_sun]

والله ياكابتن أنت عندك حق اللعبة دي خليتني ولأول مرة في حياتي مهدد بالسقوط في الدراسه والحل الوحيد ياكابتن إن الشباب يرجع للمسجد ال بقالهم فتره مدخلهوش ولو دخلوا بيكون في صلاة الجمعة بس هو دا الحل الوحيد ياكابتن والمفروض إن إحنا بنمثل شباب المسلمين ال ليهم حق ولازم يردوه أنا مبقولش كل واحد يمسك سلاح وطيران علي إنو يحارب لأ أنا بقول إن كل واحد يعمل ال ف مقدور إنو يعملوا إن الطالب يرجع للمذاكره وال بيشتغل ينتبه لشغله ودا هيتحقق لما يبعد عن اللعبة دي ويرجع للمسجد زي مقولت قبل كدا وشكرا جزيلا ياكابتن الموضوع بتاعك جميل جدا وياريت كل الناس تقراه وياخدوا بالهم قاعدين بيصرفوا فلوس بالهبل علي لعبه وفي الأخر إن التمويل بيوصل للأعداء ياريت كل الناس ياخدوا بالهم ويفوقو شوية

[NightMare321]

عندك حق بس متعرفش هو ده من زهقنا ولا من وقت فراغنا ولا ايه بالضبط الحياة بصراحة مخليه الواحد مش عايز يقوم من عليها عشان فعلا بقت مملة جداااااااااااا

تقبل مروري

[mody_74]

انا كمان كنت بلعب silkroadonline و كانت مخليانى على طول فى مشاكل مع اخويه و كانت عملا زى منتا بتئول ادمان بس و الحمد لله الحمد لله انا ديلؤتى بئاتى حوالى 3 شهور مابلعبهاش و لا بفكر العبها تانى
و شكرا على مجهودك الكبير ده...