يوميات جمعاوي

[I_DeaDSoul_I]

بكرهك..بكرهك..بكرهك يا فشار


لو تسألوني إيه أكتر حاجة تكرهها في حياتك يا جمعاوي .. أقولك طول عمري ماكرهش حاجة زي الفشر والفشاريين .. من ساعة أول مرة لما فشّر عليا الواد طلبة لما كنت في كي جي وان .. الحضانة يعني .. لما قعد يقولي بابا عنده طيارة إيديال زانوسي .. بابا النهاردة وصلني الحضانة بالطيارة .. خرجنا غمبارح واتفسحنا بالطيارة.. وأنا زي الأهبل اتحايل عليه يخدني معاه مرة في طيارة أبوه .. وكل يوم اديله من سندوتشاتي ومرة اديله مصروفي .. وهو كل مرة بحجة .. مرة يقولي الطيارة عطلانة .. ومرة يقولي الحجارة فضيت .. ومرة تانية يقولي ديل الطيارة شبك في حبل الغسيل ومرة يقولي جناح الطيارة إتنى وبابا راح يفرده عند الميكانيكي .. وفي الآخر عرفت إن أبوه شغال بواب .. وبيبيع طيارات ورق للعيال في الشارع

وللأسف ماكنش ده أخر فشار قابلته في حياتي .. مقدرش أنسى الواد سيد جارنا ابن عم حمدي الحلاق اللي كان دايماً لابس ترنج ومسيح في الشارع إنه مشترك في نادي سبورتنج .. وكل يوم رايح النادي .. جاي من النادي .. وأنا كل ما أروح في حتة عمال اتمنظر ع الناس وأقول: ده أنا ليا واحد صاحبي مشترك في سبورتنج .. ده طول النهار هناك .. ده قعدته دايماً ع الكافتريا .. وكل مرة أكلمه يا خدني معاه يقولي أصل كراسي الكافيتريا بالحجز .. وأنا محجوزلي كرسي دائم فيها .. فلو رحت حتفضل واقف .. وأنا حيبقى منظري إيه قدام الجروب بتاعي .. فلعبت في دماغ الواد خميس ابن عم شديد بتاع البوابير .. ورحنا نادي سبورتنج ونطينا من ع السور .. فاتقفشنا .. وجرجروني من قفايا .. فقعدت أزعق وأقولهم أنا صاحب سيد ابن عم حمدي الحلاق صاحب الكرسي الدائم في الكافيتريا .. وظبتوني يومها تظبيط .. خاصة لما عرفوا إن سيد صاحبي كان له كرسي دائم فعلاً في الكافيتريا .. أنتم عارفين كرسي سيد كان فين؟؟ الكرسي اللي على باب حمامات الكافيتريا .. أصل الباشا طلع إن هو اللي بينضف الكابنيهات..

وتمر الأيام .. وبعد هذه التجارب تزيد قدرتي على كشف الفشر .. لكن للأسف الشئ اللي دايما بكرهه مش سايبني .. لأني أتعرض منذ فترة طويلة للفشر الإجباري .. فشر بالعافية وغصب عني .. عارفين إزاي؟؟

حاجة كده ممكن تسموها الفشر الحكومي .. الحكومة طول النهار والليل تفشر ع الشعب .. ما تعملش حاجة غير الفشر .. كل شوية فشر .. فلا تسمع من الحكومة إلا :

أهداف الحكومة حماية محدودي الدخل .. البنك الدولي يشيد بالتنمية الإقتصادية في مصر .. عشرة آلاف فرصة عمل جديدة .. زيادة المرتبات .. حرية الصحافة .. طول النهار فشر .. فشر .. فشر

أقول يا جدعان فين الكلام ده .. يمكن يكونوا بيتكلموا عن بلد تانية؟؟ .. أكيد قصدهم بلد تانية مش احنا .. فأبص في التليفزيون ألاقيها القناة الأولى .. أبص في الجرنان ألاقيه الأهرام .. أبص في الشوارع ألاقيها .. مصر .. يا دي النيلة!!

المهم .. تفتكروني سكت؟؟ .. لأ .. قولت المرة دي لأ .. أنا زهقت وقرفت .. ده كل يوم يقولوا :

حلفت والله ما أنا ساكت ع الفشر ده .. ركبت حصاني .. أيوة حصاني وعدل على مكتب سيادته .. تفتكروا إني خايف مثلاً .. ولا مش حقدر أتكلم .. أبداً ده أنا جمعاوي .. رحت لحد عنده .. وقفت قدامه .. بيني وبينكم في الأول كنت مرعوب .. لكن قعدت أسخن نفسي وأقول أهو جاتلك الفرصة يا جمعاوي عشان تقف قدام الفشارين وتقول لأ لأ .. كفاية بقى أنت استحملتهم كتير ..

أخذت أبلع ريقي .. واستجمع شجاعتي .. وأول كلمة صرخت بيها في وش سيادته .. أنت حضرتك بعد إذنك فشار .. أيوة فشار .. بقولها ومش خايف منك .. أنت شبه طلبة وسيد جيراني .. كلكم فشارين .. وأنا قرفت من فشرك علينا .. حرام بقى يا أخي .. إيه مفيش دم؟! .. مفيش إحساس؟! .. كفاية بقى لحد كده .. أنت مش بترد ليه .. رد .. رد .. وبرر فشرك علينا .. والله لأمسك في زمارة رقبتك .. وارتاح واريح الناس منك

- جمعاوي ... جمعاوي .. أنت واقف قدام صورة الريس بتعمل إيه؟؟

- أصل يا بابا الراجل ده خنقني من كتر فشره

- ها ها ها .. خنقك وأنت .. شوفته فين عشان يخنقك؟؟

- مش ده يا بابا يبقى الريس .. أنت قولتلي إن دي صورته

- أيوة فعلاً دي صورة الريس .. الريس شلبي يا حبيبي ..

- وده حكم مصر سنة كام يا بابا

- ده جدك الكبير يا جمعاوي .. كان بيشوي سمك على مراكب .. وبعدين أنا مش قولتلك بطل لعب بالحصان بتاعك .. ويلا روح نام عشان عندك مدرسة بكرة

- عشان خاطري يا بابا سيبني ألعب بالحصان شوية

- أنا قولت لأ يعني .. لأ .. أدخل نام .. لأحسن أخد منك الحصان ومخلكش تلعب بيه تاني .. ومش حجيبلك حاجة حلوة

- خلاص يا بابا .. حروح أنا .. بس قولي يا بابا الريس بتاعنا اسمه إيه؟؟

- جمعاوي .. نام أحسن لك .. ناااااااام

تصبحوا على خير

يوميات جمعاوي
ملطووووشة

[Bilamose]

مشكور على اللطشه الجنان دى

[SLayeR_Wizz]

مشكور