****█▒░ الجزء الثالث من : حد عاوز يجرب السفر عبر الزمن ؟؟؟ █▒░*****

[ღ♥_ akeml _♥ღ]

طبعا ده الجزء التالت من

القصه الغريبه اللي حصلت معايا

الساعه دلوقتي 9 بعد العشاء

ده المعاد اللي جالي فيه امبارح نسختي المستقبليه

اعمل بقي كوبايتين شاي ع السريع كده عشان

نمخمخ في الكلام اللي حيقولوا

عاوز اعرف منه حاجات كتير اوي انهارده

ياريت بس ميكبرش دماغه او يفكر يرجع يشوف الديناصورات في الماضي

انا عارف نفسي ممكن اعمل كده لو كنت مكانه

لحظه الباب بيخبط !!

يكون جاي من الباب المره دي ؟

بصيت من العين السحريه لقيت مييييييييييييييين تخيلوا

فرغـــلــي

_عاوز ايه يابني دلوقتي .. حد يجي لحد في وقت متأخر زي ده !!

قالي : ياعم مش احنا رايحين مشوارنا اللي اتفقنا عليه امبارح

قولتله : لا .. انا عيان ومش فاضي ومشغول ومرتبط ومخنوق

ومتكعبل وحنام وعندي ضيوف

قالي : ماشي ياعم .. مش تقول كده ..

وبصوت عالي ع السلام قال :

ربنا يسهلك ياعم احمد .. بقي بتبيع صاحبك عشان اللي بالي بالك ..

عامه انا ماشي .. بس افتكر ان البنات هي اللي فرقت بينا ..

فتحت الباب ونزلت اجري وراه .. لكن مين

اختفي في لحظه ..

وانا طالع لقيت اتنين من الجيران فاتحين الباب وبصولي بأحتقار ..

وهبدو الباب في وشي ..

دخلت الشقه وانا بغلي

لقيت احمد باشا نسختي قاعد في الصاله ماسك كبايه شاي

وبيبتسم

قفلت الباب بسرعه وقعدت قدامه وقولتله : كمل ارجوك بدون اي مقدمات

ابتسم واخد بق شاي تاني وقال :

عاوز تعرف ايه ؟

قولتله : الاول قولي سنه 2012 كانوا بيقولوا عليها

انها نهايه العالم ايه اللي حصل فيها ؟

ضحك شويه وقال : العالم كله قرفنا في الجرانين

والفضائيات عن نهايه العالم في

21-12-2012

البرامج في الفضائيات تستضيف ناس تتحدث عن نيزك سيدمر الارض

ومنهم من يتحدث عن خطأ امني يشعل انفجار نووي شامل

ومنهم من تحدث عن فيضانات شامله

وايامها نزل فيلمين امريكيين عن نهايه العالم

كل فيلم له وجه نظر مختلفه عن الاخري

ومن كثره البرامج ايامها عن هذا الموضوع ..

تملك القلق والرعب نفوس الناس .. ضعاف الايمان

رغم تأكيد المساجد والكنائس ان هذا الكلام ليس له اي اساس من الصحه

وجاء اليوم المنشود ..

ولم يحدث اي شئ علي الاطلاق مما توقعوه !!

فقط حدثت تفجيرات ارهابيه بسيطه ..

وحدثت بعض عمليات التخريب الكبيره والانتحار في امريكا وبعض الدول

ومر اليوم علي خير ..

وانتهت هذه الخرافه وقتها بس طلع علينا شويه نصابيين جدد

قالوا ان هناك مايسمي قانون الازاحه ..

اي انه ممكن ان يحدث الحدث بعد 10 سنوات من التاريخ المحدد

وطبعا مرت عشر سنوات وطلع القانون خرافه بدوره

قولت : انا كنت حاسس بكده .. علي العموم قولي ايه اللي حصل في مصر بعد ما فاز الرئيس

جلال محي الدين

قال : قولتلك لغي معاهده كامب ديفيد واعتراف مصر بأسرائيل وغير اتفاقيه قناه السويس

وخلي تسعيره المرور بالجنيه المصري ..

قولتله : وطبعا القرار ده خطير علي كل المستويات

قال : اكيد طبعا .. بس هما قرارات كتيره وكل واحد منهم كان له ايجابياته وسلبياته

وكل واحد فيهم له قصه طويله ومش حقدر احيكلك غير علي واحده منهم بس دلوقتي

قولتله : احكيلي علي موضوع قناه السويس بالجنيه المصري !!

قال : بص ياسيدي .. القرار ده في بدايته كان سلبي جدا علي عكس المتوقع

لان سعر المرور نفسه ظل ثابت طبعا مع فرق العمله ..

وضغطت الدول الاخري علي مصر كثير للعدول عن هذا القرار ..

ولكن الحكومه اصرت علي مواصله النهج الذي اتخذته ..

كانت الضغوط كثيره .. منها عدم قبول العمله المصريه في عمليات الاستيراد

وطلبوا الدولار الذي قل بشده في البلد بعد القرار ..

وبدأت خطه الاكتفاء الذاتي 2019

وتم بناء المئات من الورش والمصانع والشركات

بتمويل مصري خليجي ..

وزراعه الاف من الاراضي بجميع المزروعات وخاصه القمح

في اخر 2019 بدأت الدول تطلب التعامل بالجنيه المصري

ولكن كفتره مؤقته حتي ينتهي مجلس الامن والامم المتحده من البت

في امر تغير عمله قناه السويس ..

وطبعت الحكومه العمله بكميات كبيره ..

وصعد الجنيه امام الدولار وتخطاه ..

ولكن النتيجه كانت زياده القوه الشرائيه للجنيه المصري

وبالتالي وجد الناس ان ربع مرتبهم يكفيهم تقريبا

فزاد شراء الكماليات والسلع الاستهلاكيه بمستويات رهيبه

ونظرا لزياده الطلب زادت الاسعار بجنون وحدث التضخم ..

اتخذت الحكومه كل التدابير بزيادع معدلات الانتاج لتخطي مشكله التضخم

وبدأ ت الازمه تنحل ولكن ببطئ

قولتله : تمام .. طيب واسرائيل والغاء المعاهده ؟

قال : لا ده موضوع كبير جدا اكبر مما تتخيل .. مقدرش احكيلك عليه لاني انا نفسي مش فاهمه

قولتله : المهم كملي ايه حصل بعد الازمه متحلت بتاعه التضخم ؟

قال : في 2021 تم اغتيال الرئيس جلال محي الدين اثناء حضوره لمؤتمر تصالح دول حوض النيل

في اثيوبيا ..

قولت في فزع : يانهاااااااااار اسود .. معقول ؟.

قال : اثناء دخول الموكب الرئاسي هناك احد الشوارع الرئيسيه خرج اكثر من 10 اشخاص من المباني المحيطه

محملين بأسلحه ار بي جي حديث

وفجروا سيارات الموكب بالكامل

بعدها بأسبوع تسربت وثيقه امريكيه سريه جدا مرفق

معها تسجيلات تثبت تورط الحكومه الاثيوبيه

في عمليه الاغتيال !!

قولت : يا نهار بمبمي مسخسخ !!

قال : حسيبك انا بقي عشان انت عارف وقتي خلص

مسكت فيه وقولت : لا انت كل مره تسيبني في نقطه خطيره وتمشي ..

قولي مصر عملت ايه وامشي

نظر ليا وقال في بساطه : اعلنت مصر الحرب علي اثيوبيا !!

لما فوقت بعد لحظات لقيته مشي كالعاده ..

وانا واقف فاتح بقي وباصص للجدار ..

معقول الكلام ده ؟؟؟؟

معقول المستقبل يكون فيه الحاجات دي كلها ؟؟

معقول اني عرفت المستقبل من نسختي المستقبليه ؟

ولا انا فيه حد بيديني عقار هلوسه وبيخليني اخرف مع نفسي ؟

لا ده حقيقي فعلا ..

انا متأكد ..

بكره حعرف منه ازاي مصر اعلنت الحرب علي اثيوبيا

ومين اللي انتصر في الحرب الرهيبه دي

الي اللقاء في

الجزء الرابع