الـجـروب الـرسـمى لـلـمـنـتـدى FaceBook | Official Group

**! FiRe !** · 14-02-2013, 01:28 PM

بسم الله , ,
بما إنى هخلع قريب :)

، فعايز أعمل حاجة تفتكرونى بيها شوية حلوين xD ، عموما نخش فى الموضوع علطول . .
فى أماكن كتير فى مصر ، ليها أسماء غريبة ، أو أسماء بتتنسب لأشخاص بعينهم ، هل سألت نفسك فى يوم من الأيام ايه سبب التسمية دى؟
تعالوا معانا هنعمل جولة فى قاهرة المعز وأماكن تانية كتير ، ونعرف أصول الأسماء والأماكن الشهيرة والسر وراء أسماءها , ,

الأزبكية

منطقة الأزبكية بحى العتبة فى القاهرة ، وهى تعتبر مقر الطبقة المتوسطة فى القاهرة ، يرجع اسمها للأتابك ( رتبة فى الجيش ) " أزبك بن ططخ " وهو من مماليك الملك الأشرف " برسباى " ، عشان هو اللى بدأ تعمير المكان ده سنة 880 هجريا بعد ما كانت منطقة مهجورة ، وحفر ترعة توصل المياه من الخليج الناصرى لأرض الأزبكية ، فالناس اتشجعت وبدأت تعميرها .

الحلمية

دى سهلة ، نسبة للخديو عباس حلمى الأول ، والسبب انه كان بنى فيها قصر ضخم وعظيم كان حديث الناس كلها .

الرويعى

برضو لسه مخرجناش من العتبة ، شارع الرويعى ، أصل الإسم هو جامع الرويعى اللى بناه "أحمد الرويعى" شهبندر التجار فى مصر فى القرن التاسع الهجرى .

الفلكى

شارع الفلكى بوسط القاهرة ، أصل الإسم هو محمود باشا الفلكى ، من تلاميذ على باشا مبارك ( بتاع قصة العربى xD ) ، وأحد علماء الفلك المشهورين ، وتولى نظارة ( وزارة ) الأشغال العامة ( القوى العاملة ) سنة 1882 .

أمير الجيوش

شارع امير الجيوش فى الجمالية بالقاهرة ، يرجع اسمه لأمير الجيوش المصرية "بدر الجمالى" اللى زاد مساحة القاهرة ونقل السور للتوسعة ، فى عهد الخليفة الفاطمى المستنصر بالله .

الموسكى

برضو لازلنا فى العتبة اللى مش ناوية تخلص ، يرجع اسم الموسكى للأمير عز الدين بنموسك ، وهو كان أمير فى عهد السلطان صلاح الدين الأيوبى ، بنى قنطرة الموسكى ، وكان رجل كريم يحبه الناس ويحترم العلماء وعمل اعمال خيرية كتير فى المنطقة دى .

الدمرداش

الدمرداش بالعباسية ، يرجع اسمها للشيخ محمد الدمرداش ، كان رجل صالح تقى يحبهالناس وأهل المنطقة دى ، ويرجع نسبه لأحد امراء الشركس ( طائفة كانت تسكن مصر من المماليك ) اسمه "تامرطاش" وبما اننا شعب خفيف ، خففو الكلمة لـ " دمرداش" ، كان الشيخ عايش ايام السلطان " قايتباى " واستأذنه انه يعمر الأرض بتاعته ، فغرس فيها حوالى 1000 نخلة و تمن التمر كله كان للفقراء .

الخليفة

دى كمان سهلة ، منطقة الخليفة فى القلعة ، اسمها يرجع للخلفاء العباسيين اللى عاشوا واتدفنوا هناك .

الجيزة

منطقتى xD ، دى قديمة شوية ، بعد فتح عمرو بن العاص لمصر والاستيلاء على حصن بابليون ، عبر بعض الفرسان النيل من جيزة مرتفعة فيه للضفة الغربية ، فاتسمت الجيزة .

قصر العينى

أكيد معروف ^^ ، يرجع الاسم للقصر الضخم اللى أمر ببناءه " شهاب الدين " ابن "بدر الدين محمود العينى " وهو قاضى قضاة شيوخ المذهب الحنفى ، القصر اتبنى سنة 1466 ، بعديها استولى عليه المماليك بالغصب ، ثم لما جاء الاحتلال الفرنسى ، استخدمه نابليون بونابارت كمستشفى لجنوده ، وبعد قدوم محمد على وطرد الفرنساوية افتتح فيه محمد على باشا المدرسة الحربية ، سنة 1825 ، وسنة 1856 افتتح فيه الخديو سعيد باشا مدرسة الطب واللى تولى ادارتها لامؤاخذه " كلوت باشا "

الزمالك

يرجع اسم حى الزمالك لسنة 1830 ، لما أمر محمد على باشا ببناء قصر بين الأراضى الزراعية فى شمال الجزيرة ، اللى فيها دلوقتى الاوبرا والنادى الأهلى ، عشان يكون قصر للنزهة ، وقرب القصر تم بناء عشش عشان الحاشية والحراس ، فاتسمت الزمالك وهى كلمة ألبانية معناها العشش المبنية من الخوص ( أهلاوى وافتخر xD ) .

خان الخليلى

اشهر معالم القاهرة السياحية ، مبدأيا كلمة خان يعنى محل او دكان ، والأصل لما أنشأ "جهاركس الخليلى" رئيس الاسطبلات فى عهد السلطان " الظاهر برقوق " مجموعة من المحلات فى المكان ده ، وقبل البناء كان المكان ده مقابر لأسرة الخلفاء الفاطميين ، فقال أهل المناطق المجاورة ان جهاركس أهان حرمة الأموات بالبناء هنا ، فمات موته شنيعة فى معركة بالشام .

قصر النيل

أصل الاسم لقصر عظيم بناه محمد على باشا لبنته الاميرة زينب على ضفة النيل من جهة ميدان التحرير ، ولكن هدم سعيد باشا القصر وبنى مكانه ثكنات للجيش ، واللى احتلها الانجليز بعد دخولهم لمصر ، وفى الآخر تم هدم الثكنات فى عهد عبد الناصر بعد جلاء الانجليز ، وتم بناء مبنى جامعة الدول العربية وفندق هيلتون .

المنيره

حى المنيرة فى القاهرة يرجع اسمه بسبب ان الخديو اسماعيل عمل أفراح لـ 3 من ولاده وبنت من بناته فى نفس الوقت فى المكان ده اللى كان ساحة فاضية سنة 1873 واقيمت المسارح والألعاب واطلقت الالعاب النارية والصواريخ التى انارت القاهرة طوال 40 ليلة متواصلة .

الوايلى

دى بسيطة مش معقدة ، فى المكان ده كانت ساكنة قبيلة اسمها " بنى وائل " ^_^ .

المطرية

اسمها الأصلى " منية مطر " ، ومطر ده كان أحد ولاة مصر فى فترة 157 هـ لحد 159 هـ .

هنا بقا حتة مخصوصة ومميزة ، الجزء ده من الموضوع لأبواب القاهرة ، طبعا كلنا عارفينها ، لما اتبنت القاهرة ، اتبنى حواليها سور ضخم سميك ليحميها ، وطبعا كان فيه أبواب عشان الناس تدخل وتخرج من القاهرة ، وأشهرها :

باب المحروق

اتسمى بالاسم ده بسبب هروب 700 مملوك أيام السلطان قطز ، لما عرفوا ان الأميرأقطاى اتقتل ، هربوا خايفين يتقتلو ، فلقو الباب مقفول ، فولعوا فيه النار وهربو

باب الفتوح

كان هناك رجل ثرى يسكن قرب هذا الباب ، مغربى الأصل ، وكان ابنه لازال فى المغرب ، وتمكن من الوصول للحكم وبناء سور حولها مثل سور القاهرة ، وجعل الباب الرئيسى للسور مشابه تماما لباب الفتوح ، واللطيف ان اسم الحاكم ده أصلا " الفتوح " xD ، يعنى هما سمو الباب على اسمه عشان هو عمل باب زيه فى المغرب ، عالم حورانجيه المصريين دول :emoticon_cincin: .

باب النصر

بسيطة دى ، الباب اللى كانت بتدخل منه الجيوش المصرية المنتصرة ، وعلى رأسها السلاطين ، زى بيبرس وقلاوون ومحمد بن قلاوون واللى بناه اساسا جوهر الصقلى .

باب الخلق

دى كمان بسيطة ، المنطقة اللى بره السور عند الباب ده كانت ارض فضا ، والهواء ( يخرقها ) ، فسموه باب الخرق ، وشوية بشوية بقت باب الخلق .

باب الشعرية

اسمه الأصلى " باب العدوى " ، عشان جنب الباب بالظبط جامع العدوى الشهير ، وبعد فترة ، تردد على القاهرة من الباب ده قبيلة من التجار اسمهم ( بنو الشعرية ) ، وهما اساسا بربر من صحراء الجزائر والمغرب .

باب اللوق

اسم الباب ده عليه اختلاف حبتين ، فى اقوال بتقول انها عشان ارض مرتفعة ( اللق )بمعنى الارض المرتفعة ، واقوال بتقول ان النيل لما كان يغمرها فى الفيضان ، مكنتش بتحتاج للحرث ، فكان الفلاحين بيبذروا البذور فيها علطول ، وعملية البذر زمان كان اسمها اللوق ( كانت الأرض تلاق لوقا ) يعنى تبذر فيها البذور بذرا :) .

باب زويلة

أشهر ابواب القاهرة وأكثرهم ذكرا فى تاريخها ، يرجع اسمه لقبيلة زويلة ، وهى قبيلة كونت فرقة مستقلة فى الجيش الفاطمى وكانت بتدخل القاهرة من الباب ده ، وطبعا استخدم الباب من سلاطين كتير لنصب المشانق وتعليق رؤوس الخونة وأحيانا الرسل زى ما عمل قطز وعلق رؤوس رسل المغول على الباب ده كإعلان للحرب .

وتوتة توتة فرغت الحدوتة ، حلوة؟؟؟