سلوكيات الشعب المصرى

[Iam_Muslam]

السلام عليكم ورحمة الله وبركاته


ان شاء الله كل فترة هتكلم عن سلوك من سلوكيتنا اللى عايزين نحاربها ونتخلص منها

عشان الحياة تكون افضلى واجمل فى حاجة لفته نظرى من زمان ومش عارفه ليه بيحصل كدة

ليه فيه ناس لما تلاقي حاجة نضيفة بتحاول تشوها ؟
..... يعني مثلا بالنسبة للحيطان .......
ليه فيه ناس لما تلاقي حيطة نضيفة بتشخبط عليها ؟ .......
منظر غير حضاري مش كده ؟

- يعني تلاقي فيه ناس بتتعامل مع الجدران على أساس إنها
نصب تذكاري لتخليد ذكرى كل بطل عدّي من جنب الحيطة دي .....
فمينفعش يعدي من جنبها إلا ولازم يكتب إسمه ......
فمتستغربش لما تلاقي حيطة مكتوب عليها .

البرنس حمادة مجانص

المرعب توتو عضلات

المعلم حلبؤه الهفتان

الباشا زَلَقُطّة الجعر

( عصابة الرباعي المرعب ...... قابل الموت ولا تقابلهومش ) .....

ويرسملك جنبها الجمجمة إلي طالع منها عضمتين .

- واحد تاني تلاقيه واخد زمبة من حبيبته ....

فميلاقيش حتة يكتبلها فيها إلا على السور إلي كانو بيتقابلو عنده

علطول , فيكتبلها قصيدة ملتهبة تعبر عن مدى لوعته وحسرته لما صفاء سابته .

بحبك يا صفااااااء

ده البعد عنك جبلي داااء

وإرجعي بقى دإنت من يوم مابعدتي وانا عمال أقول واااء .... واااء

الإمضاء ( المدهول على عينه, ننوس عين صفاء )


ويمكن تكون صفاء معدية على السور ده فترد عليه هي كمان .

يا خاين يا غشاش

بعتني بلاش

بقى أقولك هاتلي شبكة تقولي معندناش

وفالح بس تجيبلي في أطايف وجولاش

خلاص هي دي النهاية مع إننا لسه ما إبتديناش

الإمضاء ( المجروحة صفاء )






- فيه ناس بقى بتحب تكتب مذكراتها على الجدران .....

فمثلا يكون أحمد وخطيبته منار رايحيين جنينة فيكتب أحمد على الحيطة

( أحمد + منار = حب للأبد 3 - 5- 1990) .

بعد سنة جواز يروحو نفس الجنينة ..... فيكتب على نفس الحيطة
( أحمد + منار = حب بس مش للأبد 3- 5 -1991) .

بعد عشر سنين يروحو نفس الجنينة .... ويكتب على نفس الحيطة
( أحمد + منار = أرف ووش ووجع دماغ 3-5- 2001 )

لما يكملو 20 سنة جواز هيروح الجنينة لوحده و يكتب
( أحمد – منار = راحة وسعادة وانبساط للأبد 3-5 - 2010 ) .








- ده غير بقى الشعارات إلي ممكن تلاقيها علي الجدران إلي بتعبر عن نبض الشارع
( لا للغلاء والإستغلال ..... الموت لإسرائيل .... لا للواسطة والكوسة ......
لا للتزوير في الإنتخابات وتبعا الانتخابات دى لوحدها حكاية وروايا

صور كل مرشح على الحيطان وواحد متغاظ من المرشح التانى فيقوم يروح يشخبط على صورة زميله ويقطع فالصور ويبوظ الحيطان اكتر ماهى بايظة )

الشعارات دي لو معارضه ......
أما بقى لو شعارات تبع الحكومة فهتلاقي مكتوب شعارات تانية ......
( الضرايب مصلحتك اولا ........ نعم لمبارك ...... إسرائيل عربية ......
(نعم للتزوير ....... لمّا يكون في مصلحة الشعب ) ......


واحد تاني يكتب ( ردا علي ما هو مكتوب ( لا للكوسة) ....


أقول إلى كاتب هذه العبارة إنه شخص عميل ومجرم كيف يعترض على زراعة

مصر للكوسة .... أيريد تجويع هذا الشعب العظيم ؟! .....
بل نعم نعم للكوسة ) :





انتو ايه رايكم فالموضوع ده

طبعا مش باخد رايكم فالكوسة 1umbup:


على السلوكيات الغريبة دى

طبعا كل واحد اكيد بيشوف الكلام ده كتير


اه نسيت حاجة كمان الحجات دى مش بتتكتب بس على الجدران

انا شوفت الحجات دى كمان فى وسائل المواصلات

وعلى الاشجار ودول بقى الرومانسيين

كل واحد يكتب اسمه واسم حبيبته على الشجره معرفش ليه

هما بكده هيحبو بعض اكتر ولا ايه النظام


ولا هما بجد ناس مبتحبش تعيش فى مكان وبيئه نضيفه ؟