[فقط للناس للي سابت سيلكرود] مناقشة عن سبب تركك لسيلكرود

[Hawkaaa]

بسم الله الرحمن الرحيم


الموضوع ده مخصص للناس اللي سابت سيلكرود (و لو سبت باقي الانولاين جيمز برضو يبقى كويس )


الموضوع ده غرضه نعرف من بعض ايه اسباب سيبانك لسيلكرود



و حبدأ بنفسي ، انا سيبت سيلكرود و بطلت برضو العب اي Online Game للاسباب دي

1- زهقت من كتر العيال الصغيرة اللي بتلعب و تكرهك في عيشتك و تخليك تشتم و تتحول من انسان مؤدب لانسان سليط اللسان

2- قد تكون الالعاب الاونلاين مسلية لكنها بتضيع وقت كتير جدا عن استغلال الوقت ده في حاجات تانية مفيدة زي القراية و المذاكرة و ممارسة الرياضة و تعلم حاجات مهمة على الكمبيوتر

3- انا داخل سنة تالتة تجارة و في السنة دي لازم اركز كويس جدا في مذاكرتي عشان دي سنة التخصص عندنا ، خصوصا اني مش حلو في مادة المحاسبة

4- بضيع فيها فلوس ياما ، سواء سيلكرود او اي لعبة اونلاين تانية ، مع ان فيه حاجات احسن و اولى ادفع فيها فلوسي

5-حتقولي طب و الكركتر اللي انت تعبت فيه حتعمل ايه ، انا سبت الاكونت مع واحد صاحبي كنت انا و هو بانيين الاكونت سوا ، و بعدين كلها كام سنة تتعد على الصوابع و اللعبة تقفل لانخفاض شعبيتها ة اللي حيخليها يمكن تفضل عايشة شوية السيرفرات الخاصة اللي انتشرت بشكل مهول

6- لما فكرت العب لعبة اونلاين تانية زي Jade Dynasty معرفتش فيها اي حاجة و مكنش فيها غير مصريين قليلين جدا وقتها فسبتها

7-S4 League تقدر تقول انها مبقتش مملة غير لما العيال المصرية الصغيرة ملت اللعبة و الهاكرز بوظوها ، فمسحتها من عندي

دلوقتي اما بروح سايبر بشوف عيال صغيرة بس اللي بتلعب الالعاب الاونلاين ، فكل ما بروح بحمد ربنا انه خلصني من الالعاب دي ، بس اما احب افتح سيلكرود هناك بسلم فيها على ناس صحابي و امشي ، حتى الفيس بوك بتاعهم بقى عندي ، فمعدش فيه حاجة اني افتح اللعبة دي في السايبر

و الحمد لله ان ربنا خلصني من ادمانها ، و عقبال اللي بيعاني من حياته بسببها ، و مش عارف اقولكم اد ايه اتحسنت حياتي من ساعة ما سبت سيلكرود