لا للتعصب

[MRkoryy]

السلام عليكم ورحمة الله وبركاته


قبل ما أقول أي كلمة اللي مش عنده روح رياضية
أعتقد الكلام ممكن ميعجبوش
ياخدها من قصرها وميكملش قراءة الموضوع
عايز أوضح ان بجد بجد بجد
الموضوع ده خانقني جداااا بجد والله
رغم إنى مش متعصب خالص في الكورة
بس المناظر والحاجات اللي بشوفها قدامي بتديني شعور بالاشمئزاز


مثلا يعني
ان أتنين اصحاب معديين
شوفت ياض ماتش الاهلي والزمالك امبارح
اه طبعا وده يفوت
الاهلي كالعادة غلب الزمالك طبعا
واداه درس عمره ما ينساه
يا ابني انت هو الزمالك ده نادي اصلا
اه يا عم علي رأيك
ده اتحسب ع النوادى كده بالبركة

*****
ومنظر تاني
صحاب الاتنين اصحاب اللي فاتوا
شوفت ياض ماتش الاهلي والزمالك امبارح
اه طبعا يا عم شوفته
شفت الزمالك عمل ايه في الاهلي
ده مسخره يا عم
هو الاهلي ده بيعرف يلعب اصلا
طول عمره بيكسب بالبركة اساسا ولا ليه في الكوسة حتي

ومناااااااظر كتيييير وبألفاظ أكتر وأكتر



أكيد لو الاهلي بيلعب مع الزمالك
بشجع الاهلي وبيبقي نفسي هو اللي يكسب وبجدارة كمان
بس لو الزمالك كسب مش بلعن لعيبة الزمالك ولا بغلط فيهم
الناس عملوا اللي عليهم ولعبوا كويس
وربنا مش بيضيع تعب حد واهم كسبوا
فيها ايه يعني اما يكسبوا
مش الكورة طول عمرها مكسب وخسارة ولا ايه
ورغم انى اهلاوي
لو الزمالك بيلعب مع اي نادي تاني
بشجع الزمالك وبيبقي نفسي هو اللي يكسب
ولو كسب بفرح

منكرش انه لو مكسبش مش بزعل
بس أحسن من ناس تانية كتيير اللي بيبقوا واقفين للنادي بالمرصاد
ويتلككوا علي اي غلطة

ومتأكد لو انا زملكاوي كنت حعمل نفس الموضوع
عشان طول عمري مقتنع بحاجة واحدة بس او بحاجتين يعني ربما تلاتة
الكورة توفيق من ربنا
مكسب وخسارة
حظ

ويمكن الحظ غالب عليها كمان
مفيش داعي اصحاب وقرايب يخسروا بعض لمجرد ان ده اهلاوي والتاني زملكاوي

خلصت كلامي
نفسي بجد أشوف اليوم اللي الاقي فيه جماهير الاهلي والزمالك فرحانين لبعض

ايه يعني لو الاهلي غلب الزمالك ؟؟
ولا الزمالك غلب الاهلي؟؟
هي الكورة طول عمرها كده
يا غالب يا مغلوب

أعتقد لو فضلنا ع الحال ده
هيبقي في بعد كام سنة كده حروب ناديوية "زي عرقية كده ههههههههه"

لازم بجد مستوانا الرياضي وروحنا الرياضية تكون أرقي من كده كتير أوى أوى
عشان يبقي اسمنا بنشجع بجد
مش أي كلام وخلاص


كلام كان مضايقني جوايا ومحشور في زوري
كان لازم أقوله وأظن مفيش كلمة قولتها غلط
وبس كده


رجاءا ردوا بالراحة من غير ضرب لا طماطم ولا كراسي
انا بقولكم اهو
ههههههههههههه

علي فكرة انا مش بقول كده عشان انا بعمل كده
في ناس زيي كتير
بس قليلين
ياريت لو كلنا نبقي منهم
أشوفكم علي خير

بارك الله فى شباب مصر

[Sad_Angel]

تسلم