بــتــشــرب ســجــايـــر ،، بــتــفــرج عــلــي ابــاحيــات كــدة أنـــت راجــل ..!!

[!! Prince World !!]

بسم الله ,,

الموضوع باين من عنوانة و من كتابتي الشخصية
انت بتشرب سجاير؟
و بتتفرج علي اباحيات؟
تعالي هنا هكلمك كلمتين

انت بتشرب سجاير لية؟
قاعد في كافية و في بنات و لازم تبقي راجل؟
صحابك بيشربوا و انت مش بتشرب هيقولوا عليك عيل؟
عايز تجرب حاجة جديدة ؟
زهقان من عيشتك و بتنفخ في اي حاجة؟

بتتفرج علي بورن لية ؟
عندك كبت جنسي و بتخرجوا؟
عشان لما تشوف صحابك بيتكلموا ف الحاجات دي تعرف ترد؟
تعبت من اشكال البنات اللي بتشوفها ف الشارع؟

شايفين كل الاسباب اللي فوق دي ملهاش اي 30 لازمة
انا عايز اقولك حاجة
يمكن انا مش كبير ف السنة اوي اني انصحك
بس هنصح واحد اصغر مني عشان نقدر نقول مايقعش ف نفس غلطتي
اولا انا كنت بدخن و بطلت بس كنت بدخن مش لآي سبب من دول
دي كانت حالة نفسية لما والدتي اتوفيت من حوالي 7 سنين

و الطبيعي ان النت بقي وسيلة لخروج من حالتي النفسية اللي كنت فيها
ف بالتالي اتفرجت علي اباحيات كتير و كان قدامي حقيقي مش عايز ازود ف اللفظ
و عندك اصحابي للأسف تقدر تقول كانوا اعز اصحابي
قاعدات : حشيش /خمرة /بنات
بس عمري ما عملت الحاجات دي

هقولك حاجة
انت لما تشرب سجاير و تتفرج علي اباحيات اعرف علطول الأتي
انك مش هتصلي و دي لوحدها كفاية
ربنا يوم القيامة بيسئل اول حاجة عن الصلاة
تعرف ان الصلاة دي الحاجة الوحيدة اللي مفهاش عزر
حتي لو انت مشلول تقدر تصلي بدماغك فقط !

*بص انا هديك شوية نصايح ممكن اكون مش بعمل بية
بس بتمني ليك الخير ف حاجة ماكنتش قادر احققها*

انت لما تكون قاعد مع صحابك في كافية و هما بيشربوا شيشة و يقولك انت عيل ياض
دة البنات بتشرب شيشة قدام اهية
لية ماتبقاش انت مختلف عنهم صدقني هتحس بإحساس غريب جرب تشرب سحلب
ايوة سحلب .. لمون بالنعناع .. قهوة بس لو سنك صغير بلاش قهوة
انت هتشرب سجاير او شيشة عشان تعجبك واحدة هي اصلآ معجبة بنص شعب مصر !


صحابك بيشربوا و انت مش بتشرب هيقولوا عليك عيل؟
جرب تقولهم ف مرة مش معاية فلوس اشتري ممكن تلاقيهم جايبنلك علبة ببلاش عشان تبقي زيهم
ركز كدة صحابك اللي ممكن تقولهم عايز مثلآ بيبسي او شيبسيي وانت بتجيب هاتلي واحد و ابقي احاسبك
جايبلك علبة سجاير !

عايز تجرب حاجة جديدة ؟
لما تجربش حاجة مفيدة اي مشروب جديد
مثلآ خش المطبخ و اعمل كباية شاي بحليب و حط معلقة نسكافية علية ( علي فكرة طعمة روووعة )

زهقان من عيشتك و بتنفخ في اي حاجة؟
مش هقول جرب تسمع درس ديني لان لو واحد بالمواصفات دي لازم يجي تدريجي
جرب تتفرج علي اي مسلسل انمي هينسيك الزهق اللي انت فية
جرب تاخد واحد صاحبك و تنزلوا الكورنيش بالليل
لية ماتقعدش انت واصحابك ف مكان رخيص و شيك تأكلوا سمك ؟
مش شرط يكون معاك بنت

صدقني هتحس بإنك عايش بجد مش عيشة نت و كافيهات و بنات
انت تسمي نفسك صايع كدة؟
مش عيب لما تعترف بحاجة غلط انت عملتها
انما العيب انك ماتعترفش بالغلط عشان محدش يغلطك

* * *

بتتفرج علي بورن لية ؟
عندك كبت جنسي و بتخرجوا؟
عشان لما تشوف صحابك بيتكلموا ف الحاجات دي تعرف ترد؟
تعبت من اشكال البنات اللي بتشوفها ف الشارع؟

الكبت الجنسي او الشهوة سميها زي متسميها
المهم الحاجة دي موجودة ف اي كائن حي انسان او حيوان بنسبة معينة
بس بتزيد و تكبر مع اول صورة اباحية انت شوفتها
مع اول بنت لابسة لبس خليع
العادة دي عاملة زي الادمان لا يقل نسبة ادمنها تقريبا عن المخدرات
في ناس بتعمل عادة سرية و بتتفرج علي اباحيات حتي و هي متجوزة
تبقي حمار لو فكرت انك لما تتجوز هتبطلها
انا اعرف ناس متجوزة و بتعاني م المشكلة دي
غير انها بتسبب ضعف جنسي و بصري و ضعف العظام
تعرف انك لما تزني يبقي احسن لما تعمل عادة سرية
انا مش بقولك كدة عشان تعملها لا انا بخوفك منها

هتقولي انا سمعت شيخ بيقول لما تعمل عادة سرية عشان ماتزنيش دي بدل دي
يبقي عادي مش حراام
الضرورات تبيح المحظورات ؟!
هاة!
تعرف انت مشكلتك اية؟
انك مش محتاجلها يعني ممكن تقعد شهر كامل من غير ما تعملها
شيطانك بيخليك اي وقت انت فاضي فية تعملها
اما لو العادة مش ف دماغك و مشغول بحاجات تانية مش هتعملها صح؟

حلها بسيط جدأ
حاول بقدر الامكان تشغل نفسك باي حاجة
جرب تصوم ايوة صوم ابتدي مثلآ صوم اتنين و خميس و خلي نيتك 2 انك صايم اتنين و خميس و انك صايم
عشان تتخلص من العادة دي (حديث شريف)
حط صورة الديسك توب صورة دينية عشان تفكرك كل شوية ان ربنا شايفك
قلل من جلوسك ع النت
حاول تشتغل او تخرج او تتعب نفسك ف المدرسة او الجامعة عشان بالليل تكون تعبان

معظم الحاجات دي بسيطة جدأ
بس للاسف كل واحد فينا يقولك انا لسة شباب ياعم فيها اية لما اقضيها و اتوب بعدين
دة كلام غير منطقي بالمرة
الموت ملوش سن معين

ف النهاية
يارب اكون افدتكم بحاجة بسيطة
ف رعاية الله .