فكك مني بقي في الحوار ده علشان فاكس ....... ايه الاسلوب ده ؟؟؟

[iBorn2OwnU]

امبارح كنت بفكر في كلامنا ولغتنا اللي احنا فرحانين بيها اوي ومسمينها اللغه الشبابيه
مش هعمل فيها بقي اني مش بتكلم بيها بالعكس انا في دايما بتكلم بكلامنا الغريب ده
بس حبيت اراجع كده كل كلمه بقولها واشوف ليها معني ولا لا
والحمد لله بكل فخر اكتشفت ان مالهاش اي معني



هبدء معاكوا كده بكلام دارج اوي ما بينا وهقول تفسيري عليه
نبدء بكلمه فكك مني يعني ايه فكك مني ؟؟؟ كلمه "فك " كنا بنقولها زمان علشان نفك لعبه من بعضها
زي الميكانو كده او المكعبات وكانت فعلا بتعبر عن الموقف لكن دلوقتي لو فكرنا احنا بنستخدمها
ازاي هنلاقي ان مالهاش معني ومجرد كلمه اتعودنا عليها واناطول النهار بقولها اصلا



تاني كلمه "ياعم ده حوار" التعريف الطبيعي لكلمه حوار انه مناقشه بين اتنين
احنا بقي بقدره قادر حولنا كلمه حوار انه كذب وان فلان كذب علي فلان
رغم ان المعني الاساسي والصحيح ليها غير كده خالص



الكلمه التالته "اشتغاله " ده بيشتغلك " برضه كلمه مالهاش اي معني لانها تصريف
لكلمه شغل يعني لما حد يقول لحد انا كنت بشتغلك يعرف علي طول الطرف التاني
ان الطرف الاول اتعامل معاه علي اساس انه ورقه بيشتغل فيها



الكلمه الرابعه "فاكس " اهي دي بقي بجد معرفش معناها بس هي نفس حروف كلمه "فاكس"
فاكس الكمبيوتر يعني كلمه فاكس بنقولها علي موضوع بايظ او مش هيكمل
يبقي كده بقي احنا بنقول كلام وخلاص مالوش اي معني



الكلمه الخامسه ودي بقي بتجمع بين اكتر من حاجه كلهم ليهم معني واحد "مسقط - فاصل-قاطع شحن"
والتلاته دول بنستخدمهم علشان نعبر بيهم اد ايه احنا تعبانين
مسقط هتيجي بمعنين مسقط الراس ومعناها المكان الي اتولدنا فيه او مسقط ودي بلد عربيه
كلمه فاصل كلنا عارفين معناها انها فرق بين حاجه وحاجه زي الفاصل الاعلاني
قاطع شحن بتتقال علي الموبايل بس علشان احنا مختلفين اتملنا مع نفسنا علي اساس اننا موبيلات



"انا بنتش عليك" كلمه نتش يعني كذب بلغتنا بس معناها الحقيقي غير كده
يعني مثلا لو حد لابس تي شيرت ومثلا مسمار قطعه بيتقال علي الموقف ده
التي شيرت اتنش بس برضه لاننا مختلفين بقي نركب كلام مالوش معني
او ده مش مكانه المناسب بنركبه علي اي حاجه وخلاص حتي لو مش لايقه



مش هتكلم بقي علي الواد ده موز والبت دي موزه وروش لان الكلام ده قديم
خلينا في كلمه "فحت" كلمه فحت استخدمها الاكتر في مجال البناء المعماري او الهندسه او البترول
في حاجه اسمها فحت وردم فبجد يعني ايه نقول علي فيلم مثلا "جامد فحت "
طيب جامد يعني شديد وكلمه شديد لوحدها مصطلح برضه شبابي مش بنستخدمه غير علي حاجه
جامده اوي اما كلمه فحت فبجد مش لاقيه تفسير مفيد اقدر اوصفها بيه



نفض يامان واحلق وكبر برضه التلاته واحد
نفض اللي قدامك بيتعامل معاك علي اساس انك خدام
احلق مالهاش اي معني خالص حد مستني يحلق ايه اللروش فيها كلمه زي دي
اما كبر دماغك بقي دي معناها ان كل الواحد ما هيكبر دماغه كل ما هيشيل فيها مواضيع اكتر
يعني الكلمه دي مضره ليه ومفيهاش فايده بس رخامه مننا بنقولها



"انا كنت بزاولك" تمشي نفس معني بشتغلك رغم ان معنها غير كده خالص
لان مزاوله ايام زمان كان بيجي وراها كلمه مزاوله العمل
يعني الشغل برضه




في الاخر كده ....
بجد احنا بنتكلم كده علشان يبقي لينا لغه خاصه بينا محدش يفهمنا غيرنا ؟
ولا بنتكلم كده علشان احنا تافهيين زي ما بيتقال علينا وبنتاثر باي حاجه ومالناش شخصيه ؟
وكل واحد يقولي معني كل كلمه قولتها من وجهه نظره بيشوف معناها ازاي ؟



فكك مني
حوار
اشتغاله
فاكس
مسقط
فاصل
قاطع شحن
بنتش عليك
فحت
نفض
احلق
كبر
مزاوله



اضافه بسيطه اللي عنده اي كلام جديد انا مقولتوش
ياريت يقول عليه ويقول علي معناه
علشان نفيد ونستفيد