شرح لعبة سيلك رود ( تدخل مبتدأ تخرج محترف ) شرح اللعبة بالاصدار الجديد

[هوبه]

Y دى الكيمياء مش هتحتاجها دلوقتى خالص .

Q دى المهمات , وهنا بتظهرلك المهمات وكل المعلومات عنها .



ودول اهم حاجات فى الكيبورد .

كيفية التدرج فى اللفل :

كل شخصية ليها طريقة بناء , والبناء عن طريق النقاط اللى بتاخدها كل لفل
كل لفل بتاخد 3 نقط , بيظهر رمز + جنب اسمك على حرف الشاشة الشمال , بتدوس علية , هيظهر الصفحة اللى بتظهر لما تدوس على C وهتلاقى خط الدم hp وخط الدم mp , وجنب كل واحد + برضة , هتزود ال 3 نقط فى واحد منهم على طوول كل لفل واوعى تلخبط وتحط نقط غلط ,
دى الحاجة الوحيدة اللى مبتتعالجش فى الجيم .

شخصيات الصينى :

الاسلحة : Bow - Blade & shield- glavie كل دول بتزود فى ال str او الدم الاحمر بس .
واوعى تزود فى الازرق int .

الأسلحة : sward&shield - spear بتزود فى ال int او الدم الازرق بس اوعى تزود فى الاحمر .

شخصيات الأوروبى :

الأسلحة : Bard - cleric - wizard - warlock بتزود فى ال int الأزرق بس , محدش يزود فى الاحمر .

الأسلحة : rogue - warrior بتزود فى الstr او الدم الاحمر بس , محدش يزود فى الازرق .

....


دلوقتى هيدخل صديقى الرزل , قصدى الانتيم عشان يلعب معايا لأول مرة ويسأل كتييييير :

صديقى : السلاااام عليكم ( كل مدخل الاقيه قاعدلى ) حبييييييييبى .
أنا : وعليكم السلام ورحمة الله يا جميل , ايه الاخبار .
صديقى : تمام يا معلم , انا دلوقتى عملت شخصية جديدة وعاوز ابتدى العب بيها .
انا : تمام يلا اطلع اضرب فى شوية وحوش وظبط نفسك .
صديقى : انا راااايح اهوووووووو .

رجع صاحبنا بيعيط
ااااه وااااااااااء

انا : فى ايه يا عم ؟
صديقى : روحت ضربت فى وحوش شبه المقشات وبعد شوية روحت لوحوش تانية زى الغول كدة بس بقيت بموت كل شوية .
انا : انت بقيت لفل كام ؟
صديقى :3
انا : معاك بوشن؟
صديقى : نعم ؟؟
انا : ( الغباوة هتشتغل شكلها ) روح عند الراجل اللى مرسوم عليه إزازة فى الخريطة واشترى منه حاجة عاملة زى العنب الاحمر وتانية زى العنب الازرق , مش انت معاك فلوس من الوحوش ؟
صديقى : ( مفكرنى غبى دة ولا ايه ) ايوة وكمان بلم الكياس اللى بتقع دى وهبيعهم لنفس الراجل .
صديقى : انا جيت اهو اعمل بيهم ايه بقى ؟
انا : عندك فى البار اللى تحت هتلاقى مكتوب عليه F1 تقوم حاطط فى الخانة رقم 1 العنب الاحمر مثلا والخانة 2 الازرق .




صديقى : وبعدين , متكمل يااااااااااااض .
انا : اصبر يا زفت , بحط الصورة للناس العسل اللى بتتفرج علينا , متبقاش مهزأ , المهم هتقوم دايس على حرف ال T وتقوم ظابط ال hp اللى هو الدم الاحمر على رقم 1 فى F1 , وال mp اللى هو الدم الازرق على رقم 2 فى F1 برضة .
صديقى : قشطة , طيب كدة مش هموت ؟
انا : هتموت طبعا لو عملت شجيع السيما وروحت لوحوش عالية , انما اول مدمك هيقل هيملى لوحدة من البوشن دة , وخللى بالك لما تكبر فى اللفل هتحتاج بوشن أكبر من عند نفس الراجل .وخللى بالك لو هتلعب بشخصية أوروبى عشان البوشن هناك بيملى كل 15 ثانية بس .
صديقى : طيب طيب .

============================

صديقى : يا هلا بحبيبى , عاوزك فى استفسار صغير .
انا : عاوز ايه ياض انت كل شوية تسأل وتمشى على طول ؟
صديقى : بص بس , انا دلوقتى بلاقى ملابس وحاجات كتير عاوز ابيعهم زى الناس اللى بتبقى واقفة دى , ازااى ؟؟
انا : هتدوس على حرف a هتلاقى اول واحدة على اليمين اسمها stall تعمل كليك يمين هتفتح صفحة المحل بتاعك تقوم حاطط الحاجات اللى هتبيعها وتحدد السعر وتدوس على زرار open stall وبس كدة .
صديقى : يا سلام عليك يا واد , طيب معلش انا وانا واقف كدة بلاقى شات وكلام بالالوان كدة يمين وشمال ؟
انا : هممممممم , يا مصبر الوحش , الشات اللى على الشمال دة :
اللون الابيض : دة العام
اللون الاصفر : اسمة جلوبال ودة بيبقى بفلوس والسيرفر كلة بيشوفه
اللون الازرق الفاتح : دة الخاص لما حد يكلمك على الخاص .
اللون الاخضر : بتاع البارتى .
اللون البرتقالى : بتاع الجيلد .
اللون الاخضر الفاتح : بتاع اليونيون .
اللون الازرق الغامق : بتاع الاكادمية .
اللون الوردى : دة بتاع الجى ام اللى هما المديرين بتوع اللعبة , شوية تعليمات كدة عامة .

الشات اللى على اليمين دة مهم جدا لازم تاخد بالك منه , دة بتاع الجيم اى حاجة بتعملها بتديلك معلومات عامة وبتقولك لو حاجة مينفعش تعملها او ازاى تعملها .
صديقى : شكراااااااااااا يا سيدى هههههههههه
انا : مااااااااشى

======================

انا : ايييييييه تانى فى ايه ؟
صديقى : بص بقى انا ببيع وبضرب فى الوحوش وكلة تمام بس اول موصلت لفل 20 التلفيل بقى بطىء وببقى عاوز حد يساعدنى .
انا : اختصر ؟
صديقى : عاوز اعرف التاكسى دة اعملة ازاى ؟
انا : اولا لسة التلفيل البطىء مجاش ههههههههههه, ثانيا انت تدوس على حرف ال E هيفتحلك صفحة فيها البارتيهات المعمولة وكل واحد عامل بارتى بفلوس اسمه تاكسى , فى آخر الصفحة من تحت هتلاقى فى صفحات تانى مترقمة , بتشوف البارتى اللى يناسبك وتعلم عليه وتعمل join party , وتقوم راكب حصانك ورايح وعامل تبادل مع صاحب البارتى وتديلة الفلوس زى منتو تتفقو .
صديقى : واحدة واحدة كدة عشان مبقاش محتاس , التبادل دة ازاى ؟

انا : بتعلم على الشخص اللى عاوز تديلة حاجة ودوس على ال A وتعمل كليك يمين على Exchange اللى هى رابع واحدة من اليمين فى الصف الاول , وخللى بالك من النصابين فى التاكسيات , ممكن واحد يعملك تبادل اول متوصل للتاكسى وتديلة الفلوس زى الباشا وهو ملوش دعوة بالتاكسى اصلا, تخللى بالك من الاسم .
صديقى : قشطة يا صديقى .
انا : بلاش صديقى دى عشان الناس معلمين عليك بالكلمة دى هههههههههه

=============================


دلوقتى احنا عرفنا اهم الحاجات اللى نتعلمها فى سيلك رود ........

صديقى : انت يا عااااااام انت ماشى رايح فين ؟
انا : عاوز ايه يا ابنى سيبنى اتكلم مع الناس دى شوية , انت رغااااااااى ليييه ياااض ( وييييي طاااخ)
صديقى : اااااااااى طب ليه كدة بقى دا احنا على الهواء .
انا : منتا بتستفزنى يا اخى , اخلص عاوز ايه ؟
صديقى : كل ممشى فى حتة الاقى واحد من بتوع المحلات او الحراس فوقيهم رسالة لونها أصفر وساعات بتبقى أحمر ,دى ايه بقى ؟؟؟
انا : دى يا ناصح المهمات , بتدوس على الشخص دة وتختار بدء محادثة معاه فبيعرض عليك المهمة وبتكون غالبا جوائزها حلوة , فبتقبلها وتقوم فاتح صفحة المهمات من زر Q هتلاقى اسم المهمة وتحتها على طول المطلوب من المهمة وازا كنت نفذتها ولا لسة وفاضلك قد ايه فيها , المعلومات كلها يعنى , فى مهمات الدليفرى اللى هى بتوصل حاجة لواحد , وفى مهمات قتل عدد معين من وحوش معينة بتلاقى جنب المهمة دى زى كرة ارضية بتفتحلك مكان الوحوش المطلوبة فى الخريطة , وفى مهمات العثور على شىء معين من الوحوش او جمع اكياس منها . ودى احسن حاجة للتلفيل السريع لانك وانت بتقتل الوحش بتاخد منه نقاط خبرة ومهارة وفى نفس الوقت بتخلص مهمة بتزودك كمان , كأنك بتزيد مرتين . وخللى بالك المهمات اللى باللون الاحمر دى بتبقى اعلى من لفلك متعملهاش الا لما تبقى باللون الاصفر .

صديقى : شكرااااااااااا , يلا انت رغاى لية انا هروح اعمل مهمة هههههههههههههه .
انا : يلا سلام خلينى اقفل الموضوع .


*******************************************

بكدة اكون خلصت شرح لعبة سيلك رود اون لاين لأحلى أعضاء على شبكة الانترنت , مع إن فى نقاط كتير اكيد مش واضحة لكن اى عضو عاوز يسأل فى اى شىء عن الجيم يسأل , وبإذن الله ربنا يقدرنى على الأجابة .