فكر كويس قبل ما تسمي الشخصية بتاعتك

[loko]

بسم الله الرحمن الرحيم

انا يا جماعة بدات العب لعبة Silk road من حوالي سنة تقريبا.. لكن لاحظت حاجة كتير بشوفها منتشرة بين معظم العرب عموما و المصريين خصوصا .. وهي :-

- ان معظمهم ( مش كلهم ) بيسموا الشخصيات بتاعتهم بطريقة تنم اما عن جهل او غباء او رعونة :-

- لازم نلاحظ ان اللعبة دي on line و لعبة دولية يعني مش مصرية او عربية فقط ..لا ده بيدخلها كل يوم الالاف من كل انحاء العالم .. و تعاملك جوة اللعبة من خلال شخصيتك بيعبر عنك و عن صفاتك في الحياة الحقيقية .. فلازم كلنا ناخد بالنا من كده و يلا نشوف بعض الامثلة لاسماء الشخصيات الغريبة بصراحة :-

- تلاقى واحد مسمي الشخصية بتاعته elpop_elking بصراحة اسم غريب مالوش معنى وكله اخطاء لغوية ..طالما انت اخترت تسمي الشخصية اسم انجليزي فياريت تاخد بالك من مدى صحة الكلمة و فيه برامج كتير و قواميس الكترونية تساعدك في كده.....او تلاقى واحد مسمي نفسه brens_7amada خد بالك ان الفرانكو هو كتابة اللغة العربية بحروف انجليزية مش كتابة الانجليزى كمان بطريقة الفرانكو .يعنى هنا كلمة brens مالهاش اي معنى في اي لغة .. و بكده طبعا لما حد يشوف الشخصية بيقول على صاحبها جاهل عشان كده الاتراك و المصريين في اللعبة مشهور عنهم انهم جهلة .

- انا ليا بصراحة تحفظ معين على الناس اللي بتسمى الشخصية على اسمائها في الواقع..ازاي انك انسان ربنا كرمه وحباك باسم جميل تقوم انت تمنح الاسم ده لمسخ كرتوني او رسم متحرك ليس له اي اعتبار..وبعدين تقابل مرة واحد في اللعبة قليل الادب ممكن ييجي يشتم و يسب الشخصية بتاعتك زي كلنا ما بنشوف طول النهار و طبعا اسم الشخصية هي اسمك في الحقيقة وبكده انت سمحت لنفسك انك تجعل من اسمك اضحوكة معرض للاهانة من كل هب و دب.
وممكن كمان لو انت حبيت تبيع الاكونت بتاعك اكيد هتلاقي صعوبة في بيعه عشان طبعا اللي جاي يشتري ميحبش ان الاكونت بتاعه يبقى على اسم شخص بذاته مش اسمه هو ففكر فيها كويس.

- فيه حاجة مهمة للناس اللي بتسمي الشخصية على اسماء الرسل و الانبياء ( عليهم السلام )وده خطأ فاحش ..حتى ده لو كان اسمك انت فبلاش تسمي بيه اي شخصية في اللعبة طالما بينتمي الى اسم احد الرسل او الانبياء (عليهم السلام)..يعني انت اهلك منحوك الاسم ده تشريف ليك و تيمنا بالرسل (عليهم السلام)تقوم سيادتك تضع الاسم ده على شخصية او رسم كرتوني مهان ..و طبعا زي ما قلتلك من شوية ممكن تقابل في اللعبة مثلا وانت بتلعب PVP واحد قليل الادب يسب و يشتم في الشخصية بتاعتك و يا سلام بقى كمان لو معاه جلوبال ....يبقى انت كده عرضت اسم احد الانبياء (عليه السلام) للسب و الاهانة .....ففكر كويس في الموضوع ده.

- نيجي بقى للناس اللي بتسمى الشخصيات باسم عبارة عن شتيمة للناس التانية او عبارة عن لفظ قذر او بذىء اكيد طبعا كل اللي هيشوف الشخصية دي هيقول على صاحبها انه انسان مش محترم و غبي ومن بيئة مش تمام..ليه تعرض نفسك لكده من الاول ..

- وزي ما قلتلك ان دي لعبة دولية بيدخلها كل الجنسيات من كل انحاء العالم فياريت اسم الشخصية بتاعك لو ليه معنى معين ياريت الكل يفهمه عشان تشتهر و الكل يعرفك ..مش تسمي الشخصية بتاعتك باسم مالوش معنى الا المصريين بس اللي يفهموه زي مثلا elwad_elgen_.فتلاقي ان معظم الناس الغير العرب و المصريين مش قادرين يحفظوه او يفهموا معناه.

- فعشان كده فكر كويس قبل ما تختار اسم للشخصية بتاعتك في اللعبة وفيه ناس محترمة كتير و بتسمي الشخصيات بتاعتها اسماء جميلة و بتشتهر في السيرفر كله.

ملحوظة هامة :- ( كل الاسماء التي ورد ذكرها في الموضوع هي اسماء وهمية و من وحي الخيال ولكن تشبه اسماء كثيرة في اللعبة )

وآسف على الاطالة و اتمنى ان الموضوع يكون مفيد