** نـــــــور عينـــــى ** قصه رومانسيه متجدده

[venus_lord]

الجزء الرابع والاخير



لما مشي حمزه من عند نور ... حست باحساس غريب ... حست كان شىء بيتخطف من قلبها والليله دى معرفتش طعم النوم وسهرت فى قلق وحزن متعرفش سببه ايه
نور : اه ياعينى مكتوب عليكى ماتشوفيش النور ولا تدوقى طعم النوم ... ياربى ماله قلبي وجعنى وقلقنى على حبيبي
فعلا احساسك صح يانور
ايام فاتت وسهرت نور لياليها تنتظر حمزه يجى يطل عليها ويقعد وياها زى كل يوم
لكن دون جدوى
فات اسبوع على ده الحال والحزن والقلق عايشه فيهم نور منتظره حبيبها يجى
ياترى فين حمزه وليه مجاش ياترى هو بخير ... كانت اسئله كتير بتدور فى بالها لحد مخلاص قربت تتجنن نفسها تطمن عليه .... عذاب عاشت فيه
فى يوم قاعده نور فى اوضتها كالعاده قافله عليها الباب وماسكه طقم اللبس الى جابهولها حمزه وواخداه فى حضنها وقاعده تبكى منتظره قدومه
دخلت عليها جدتها وقالتلها خبر سىء
قالتلها " ابوكى وامك بيعتذروا على النزول مصر السنه الدى لانهم مشغولين "
هو فعلا خبر سىء لكن موجعش قلبها لان قلبها واجعها اصلا بفراق حبيبها
ماهتمتش نور بخبر اهلها وفضلت ساكته كاتمه الدموع فى عيونها والقهر والحزن فى قلبها
فى اللحظه دى رن جرس الباب
سمعت نور الجرس قامت منفوضه من مكانها مندفعه ناحية السلم عشان تنزل تفتح تشوف مين يمكن يكون حمزه
اندفعت نور وهى بتجرى لاول مره ناحية السلم وهى حافظه خطواتها ناحية السلم لما تخطى بهدوء لكن المره دى جريت فخانتها خطوتها ونزلت رجلها على الهوا بدل ماتنزلها على درجة السلم
وقعت نور .... المصيبه مش فى الوقعه لانها مش هتاذيها كتير
المصيبه انها لما وقعت ووصلت لاخر السلم ... راسها خبطت فى رجل الكرسي الخشب الزان الى محطوت اخر السلم
اصيبت نور بجرح كبير فى راسها ونزفت دم واغمى عليها
شافت كده الجده ... وصرخت لما لقيت حفيدتها بالمنظر ده
بعد محاولات انقاذ من الجده واستغاثتها من الجيران
اخدوها المستشفى وهناك عرفوا ان نور عميا من ساعة ماتولدت وبعد الاشعه والفحوصات قالو الدكاتره للجده بشرى ساره فرحتها كتير
قالولها ان حفيدتها نور لما اتعرضت للحادث ده ساعدها كتير انها تعمل العمليه وتكون نسبة النجاح فيها اكبر لان الحادث اثر على حاجه فى عنيها وبكده الامر هيكون اسهل وفيه امل بالنجاح
فرحت الجده ووافقت على اجراء العمليه
لكن كان فى عائق
انها ماتملكش تمن اجراء العمليه .... ساعتها افتكرت الورقه الى حمزه ادها اياها
وكانت الورقه دى مكتوب فيها عنوان وتليفون الدكتور الواسطه الى قالوا انه هيعمل العمليه لنور بدون مقابل
حمدت ربنا الجده ومضيعتش وقت واتصلت بالدكتور وشرحت له الامر وهو تقبله ووعدها انه هيبذل كل جهده لابصار نور ووافق على اجراء العمليه
ودخلت نور غرفة العمليات وابتدت لحظات القلق والتوتر
فينك ياحمزه ؟؟
فى الوقت ده راحت الجده واتصلت بابنها ابو نور وقالتلهم عن نور والى حصلها وكان لازم انهم ينزلوا مصر ويخلوا عندهم دم ويجوا يطمنوا على بنتهم
وبالفعل نزلوا لبنتهم مصر
خرجت نور من غرفة العمليات على غرفه خاصه بالمستشفى نضيفه ومستوى راقى
هى دلوقتى تحت تاثير المخدر
كلها ساعات وتفوق ونقدر نحدد النتيجه ادعولها
لحظات القلق ابتدت من تانى
انتظرت الجده والام والاب بنتهم نور على نار عشان يعرفوا ايه هو مصير بنتهم



بعد مرور الساعات المنتظره دخل الدكتور وكانت نور بتفوق من المخدر حبه فى حبه
الدكتور : ها يا نور سمعانى
بعد مافاقت نور ردت على الدكتور وكان اول سؤال تساله هى فين وايه الى حصل وليه دماغها وجعها
الدكتور طمنها وعرفها بالى حصل وطلب منها تساعده انها تشوف الدنيا باحلى عيون
كانت نور رابطين على عيونها رباط ابيض بعد العمليه وكان لازم يفكوه عشان تفتح عنيها ويشوفوا ايه هى النتيجه
جه الدكتور عشان يفك الرباط ويطمن رفضت نور ومنعته
اندهش الدكتور لرفضها وسالتها جدتها ليه يانور مش عاوزه تشوفى الدنيا زى ماكنتى بتتمنى
قالت نور " انا مش عاوزه اشوف الدنيا انا عاوزه اموت و حمزه جراله حاجه ... انا قولتله لو انا ابصرت مش هشوفك تانى ... انا مش عاوزه اشوف ... عاوزه حمزه ... هاتولى حمزه
وطبعا كان الكل مندهش لكلامها وطلبها انها تشوف حمزه
الدكتور : حاضر اوعدك انى اجيب حمزه بس نطمن على عيونك
نور : مستحيل ... انا همنع اي حد يلمسنى .... انا عايزه حمزه
الدكتور : والله هجبلك حمزه بس نطمن عليكى ارجوكى
نور : انا مش هفتح عنيا غير لو حمزه قدامى ... عاوزه لو ربنا اراد ليا اشوف ... يبقا اول واحد اشوفه هو حمزه
اصرت نور انها هتفتح عيونها على رؤية حمزه ... يا كده ياهترفض انها تشيل الرباط
واضطر الدكتور يوافقها طلبها وانتظروا قدوم حمزه لكن لسه مجاش ... ونور قلبها وعقلها وكل حاجه فيها قلقانه عليه وبتدعى ربنا كل لحظه ان حمزه تشوفه تانى ويكون جمبها زى ما اتعودت
عدى اليوم ومجاش حمزه
والاب والام مستائين لحالة بنتهم الجنونيه فى انتظار حمزه الى بتدعوا انه حبيبها دون علمهم
فضلت نور سهرانه تعد اللحظات وتدعى ربنا .... وكانت دايما عشان الوقت يفوت بسرعه ... كانت تفتكر اللحظات الجميله الى عاشوها ويا بعض وكل ماتفتكر كان بيجلها رغبه فى البكاء ... لكن حتى البكاء ممنوع منها ...


الدكتور كان جاى بواسطه من حمزه .... يبقا الدكتور يعرف حمزه
فعلا بحث الدكتور عن عنوان حمزه وقرر انه يروح يجيبه لنور عشان ترضى تفك الرباط
وبالفعل تانى يوم راح الدكتور لبيت حمزه
واول ما وصل الدكتور بيت حمزه .. حس بجو حزين .... وكان فيه صوان عزاء
سال الدكتور الناس عن مين توفى ... جابوه الناس وقالوا ان والدة حمزه ماتت من 3 ايام وده اليوم الاخير للعزا
طلع الدكتور لحمزه شقتهم وخبط الباب ... فتح ليه بنت فى سن 16 من عمرها ... وطلب منها مقابلة حمزه ولما اذنت له بالدخول وراحت تنده ليه اخوها حمزه
اول ماشاف الدكتور منظر حمزه وهو فى منتهى الحزن لموت امه ... قدر موقفه واتاثر بيه كتير
بعد مقدمات كتير عرف حمزه الموضوع من الدكتور وبسرعه استعد حمزه انه يروح معاه المستشفى يشوف نور
وكان حمزه ملهوف انه يشوف حبيبته ويطمن عليها وفى باله بيتاسف ليها عن التاخير .........



وصل حمزه اخيرا المستشفى ووقف على باب الغرفه بتاعة نور ووقف شويه يستعد لمقابلتها وهتكون ايه نتيجة العمليه
حط ايده على قلبه وتوكل على الله ودخل .... حست بيه نور اول مادخل ... ابتسمت وحاولت تقوم من ع السرير
نور : حمزه ... انت جيت ياحبيبي ... حمزه رد عليا انا حاسه بيك
شاف حمزه منظر نور كده وكلامها المؤثر ... عيونه دمعت ومقدرش يتكلم ولا عرف يقول ايه .... نطق اسمها " نور " سمعته نور من هنا وجريت ناحية الصوت عشان تاخده فى حضنها ... يمكن الحضن ده يعوض جزء بسيط من الايام الى غابها ويروى اشتياقها ليه
اخدها حمزه فى حضنه بكل حنيه وحب واشتياق ودموع ... لا اعرف ان كانت دموع الشوق ولا دموع الحب ولا دموع الفرحه
الدكتور : انا وعدتك انى اجيب حمزه ... وادينى وفيت بوعدى ... ممكن انتى تقعدى على السرير وتوفى بوعدك
مسك حمزه ايدها وقعدها على السرير وجه الدكتور عشان يفك ليها الرباط وكان وقتها جت امها وابوها عشان يطمنوا على بنتهم
مد الدكتور ايده عشان يفك الرباط ... لكن منعته تانى نور انه يفكه
نور : خلى حمزه هو يفكهولى ... عاوزه اشوفه اول حاجه ... عاوزه عيونى تفتح عليه
امر الدكتور لحمزه يفك الرباط برفق .... واتردد حمزه وهو بيفك الرباط ... كانت لحظه صعبه وقلبه كان مقبوض وخايف من النتيجه
وهو بيفك الرباط ... كانت نور سعيده جدا ... وبتدعى تقول " يارب تنجح عشان اشوف حبيبي ... اشوف حبيبي وبس يارب "
وفك حمزه الرباط ... وكانت نور مغمضه .... امرها الدكتور تفتح عيونها
ها ؟؟
فتحت نور عيونها
حاسه بايه يانور .... شايفه ايه
نور اول مافتحت شافت غيامه زى الضباب .... بدات تتضح الرؤيه لحظه فى لحظه ..... ابصرت نور .... وشافت حمزه ... وهو مبتسم ليها
كان بالنسبه لنور وانها اول مره تفتح عيونها فى الدنيا وتشوف انسان
كان احساس غريب وكانت مندهشه وفرحانه واحساس ميتوصفش بالمره
نور : انت حمزه
ومدت ايدها تلمس ملامح وجهه
اتاثر حمزه من الموقف ومن شدة فرحته عيونه دمعت
عرفت نور ... ان دى دموع وسالته ليه بتبكى ياحمزه
مقدرش يجاوب ... ضمها لحضنه وهو بيحمد ربنا ان العمليه نجحت
وكان الكل مبسوط بنجاح العمليه .... لكن جه ابو نور ... وسحب حمزه من ايده ... وقاله لو سمحت عاوزك بره



خرج بره حمزه مع والد نور المتعجرف
والد نور : انت اسمك ايه بالكامل
حمزه : حمزه حسن على ... مهندس لسه متخرج
والد نور : اه ... قولتلى .... ممكن بقا يا حمزه ... تسيبنا نعيش جو عائلى شويه
حمزه : اه مفهوم .... عن اذنك تسمحلى اسلم عليها قبل ما امشي
والد نور : لاء ... معلشي
اتصدم حمزه من معامله الاب ليه وكان موقف محرج جدا ليه وقرر يمشي من المكان باقصى سرعه
بعد ما مشي حمزه ... اتصل الاب من تليفونه الخاص بواحد وقالوا " عاوزك تجبلى تقرير عن اسم طالب جامعى لسه متخرج من كلية الهندسه اسمه حمزه حسن على "



دخل الاب على نور .... سالته فين حمزه ... قالها انه مشي بدون سبب ... طبعا زعلت نور من الموقف ومكنتش عارفه ليه فجاه هو مشي بدون سبب



نرجع لحمزه ... ماشي فى الشارع مش عارف لفين رايح ... ورجليه هتوديه على فين
فجاه وقف وكلم نفسه وقال " لاء مستحيل ... انا ونور بنحب بعض ... وهما مش هيخافوا عليها قدى ... هما سابوها ونسيوها وانا فضلت معاها واسعدتها واسعدتنى ... ده انا اموت لو منعونى منها .... مستحيل .... فاهمين ... بقولكم مستحيل يمنعونى منك يا نور ... نور .... سمعانى .... نور ... انتى فين "
ووقع حمزه على الارض منهار يبكى وينادى على نور




يوم جديد .... ومداقتش نور طعم النوم حزينه من الى حصل
لسه قاعده فى المستشفى .. كانت لوحدها محدش معاها
فجاه لقيت الباب بيتفتح ... ولقيت مين داخل
جدتها وفى ايدها حمزه
بصت ليهم ساكته
الجده : حمزه عمره مايسيبك يانور ... انتى حته منه وهو حته منك ... مستحيل حد يقدر يفرقكم عن بعض
ابتسمت نور ... وقعد حمزه يشرح لها الى حصل
فى نفس اللحظه دخل مين عليهم
دخل ابوها وامها وفى عيونهم قسوه
الاب : انت ايه الى جابك هنا
الام : نور حبيبتى ... انتى لازم تقطعى علاقتك بالاشكال دى
نور اتصدمت : ليه ياماما ... ليه بابا ... ماله حمزه .... حمزه ده احن قلب عليا ... حمزه ده حياتى الى كنت مفتقدها وبيه لقيتها وعيشتها ... هو مصدر ساعدتى ... هو الى عوضنى عن التعاسه والحزن الى كنت عايشه فيهم ... هو الى ونس وحدتى ...........
الاب : البنى ادم ده ... ابوه تاجر مخدرات ولسه ممسوك من قريب
الصدمه على وش الجميع والحزن والاحراج كان على وش حمزه
ايوه كلام الاب صح ...... حمزه امه خلال الاسبوع الى فات اكتشفت ابوه انه تاجر مخدرا كبير اوى وجالها ازمه قلبيه لما عرفت كده وانه كمان اتمسك وهيتحاكم ... نقلوها المستشفى .... عشان كده حمزه اختفى ... وغاب عن نور المده الى فاتت ... كانت ايام صعبه ومره اوى على حمزه وامه بتموت قدامه .... وماتت امه وحزن حمزه على وفاة امه
واليوم الحزن كاد يقتله من المواجهه الصعبه دى
لكن نور وقفت تصرخ باعلى صوتها تقول : لاء ... انا بردو بحبه ... انا بحب حمزه وهتجوز حمزه ... انا مايهمنيش ابوه مين واصه ايه ... انا يهمنى هو وبس ... قلبه .... انا عمرى ماهسيبك ياحمزه ... متخافش ياحبيبي .. اوعى تحس بالنقص ابدا ... لاء انت تفتخر بانك حمزه ... انا مفتخره انك حبيبي وعمرى مهسمح لاى حد مهما كان انه يبعدنى عنك
الاب : انتى اتجننتى فوقى
نور : موتونى قبل ماتمنعوه منى ... ولا اقولكم مجرد بس خرجوه من هنا ... انا كمان هخرج من الدنيا
الام : بعد الشر عنك ياحبيبتى
نور : انا مش حبيبة حد .... انا حبيبة حمزه وبس .... وهو حبيبي .... كنتم فين ... سيبونى وسافرتوا ... رمتونى واهملتونى ... جايين دلوقتى تقلولى بنتى وحبيبتى لاء ... مش من حقكم ... الى من حقه الحب ده هو حمزه ... جدتى ... انتم اهلى فى الشهاده وبس ... حمزه خدنى من هنا مش عاوزه اقعد هنا مع الناس دى ثانيه واحده ... ارجوك خدنى



بعد المواجهه دى والكلام الى قالته نور لابوها وامها .... ندموا على معاملتهم ليها وحاولوا يعتذروا ويعوضوها عن الى فات وكان اول حاجه يثبتوا بيها حبهم ليها انهم وافقوا بجوازها من حمزه ومع الايام كانوا بيثبوا حبهم لنور ومع الايام الحب الى بين نور وحمزه كبير وفضل يكبر ومازال



كنتم مع قصه من قصصى
يارب تكون نالت اعجابكم
نورتونى
منتظر تعليقاتكم