أنا حر ياجدع أنتا مالك ( أنتا فعلا كده ) ؟؟؟؟؟؟؟؟؟؟

[angel2022]

بسم الله الرحمن الرحيم

أنا حر... يا جدع !!

الحياة مملة وروتينية و"اللي بنبات فيه بنصبح فيه"..
القعدة على القهاوي والكافيهات ما عادش ليها طعم..
والتليفزيون "خنيق" والبرامج تافهة ومكررة ودمها تقيل

ومش لاقي حاجة إيجابية ممكن أعملها في حياتي غير إني أصوت -بفلوسي- لصالح البنت "زيزي" في ستار أكاديمي عشان أبقى وطني و"وطنطن"!

طب الحل إيه؟!


الإنترنت..

أخبار.. وترفيه.. وشات.. ومعارف.. وأصحاب.. وعلاقات.. كل اللي انت عاوزه في مكان واحد.. ده"سوبر ماركت" عالمي فعلا.. مش بس كده..
ده أنا على الإنترنت حر.. حر خالص.. حر 1000 %..
لا حد هيقول لي عيب.. ولا حرام..
أدخل على أي منتدى.. أو غرفة من غرف الدردشة.. وأقول اللي أنا عاوزه.. من غير ما حد ممكن يعرف حتى أنا مين..
بس برضه فيه حاجة ناقصة..
حاسس إن عندي قدرات مستخبية مش عارف أطلعها ازاي..
ولا أطلعها فين..
يعني أنا أعرف كتير في خبايا وأسرارالكمبيوتر والإنترنت ومع ذلك حاسس إن زيي زي أي واحد ما يعرفش يكتب على الكي بورد.. صحيح إيه
الفارق..؟!


النهارده قابلت الواد "شيكو" في السيبر وكان مبسوط قوي وبيضحك ومتكيف على الآخر سألته:
"إيه سر البهجة اللي إنت فيها دي؟!"
رد عليَّ وهو مش قادر يمسك نفسه من الضحك:
"الواد شريف.. بتاع كلية التجارة عملت فيه حتة حركة.. موت طحن!"

إيه.. ضحّكنا معاك؟

أصل اللي إنت ما تعرفوش إن أنا "هاكر" قديم.. امبارح وأنا باكلمه على الشات.. بعت له وصلة.. وقلت له ادخل عليها هتعجبك قوي.. هاهاها.. والعبيط صدق.. بس دخل من هنا وبس.. من خلال البرنامج اللي عندي قدرت أدخل على الإيميل بتاعه.. وشفت كل الرسائل اللي عنده.. حتى رسائل البنت "سالي" اللي معاه في الكلية شفتها.. وبعدين.. هاهاهاها.. عملت حركة بقى الواد يا عيني هيموت منها.. غيرت "الباس وورد" بتاعته.. وهووب.. طردته من الشات كمان.. هاهاهاها!

طيب وهو عمل إيه؟!

ولا حاجة.. اتصل بي النهارده ومش فاهم إيه اللي حصل.. ومش شاكك فيَّ خالص.. هيتجنن عشان مش عارف يدخل على الإيميل بتاعه.. مش عارف بافكر ما أقول لهوش على اللي حصل وأخلي الإيميل بتاعه معايا؛ لإنه ابن الإيه.. مليان إيميلات بنات!!


حلوة اللعبة دي.. واد يا شيكو.. تعرف تقول لي عملت الحركة دي إزاي؟!

ستوب..

حصل لك حاجة زي كده..

جربت مرة تسرق إيميل حد تعرفه ولا ما تعرفوش.. لمجرد إنك تقول لنفسك.."أنا.. جدع"!
لقيت موضوع منشور في موقع على الإنترنت مش على هواك قمت نازل شتيمة في الموضوع واللي كاتبه والموقع واللي عامله.. واللي بيدخل عليه كمان!

طلبت معاك مرة تدخل على خدمة S.M.S الموجودة في بعض المواقع وإنك تبعت رسالة لأي رقم عشوائي تهدد فيها مثلا باختطاف ابنه على اعتبار إنك عضو فعال في عصابة "اللهو الخفي"!

- "أنا حر يا جدع.. إنت مالك.. يعني حتى على الإنترنت هتعملوا عليّ رقابة؟!"

- "احنا معاك.. إنت حر يا باشا.. بس يعني تحب إنت شخصيا واحد يسرق إيميلك ويعرف كل أسرارك.. تحب وإنت والدك قاعد معاك تيجي له رسالة من مجهول تهدده بإن ابنه "اللي هو إنت" هيتخطف ويتحط "السيخ المحمي في صرصور ودنه!"..تحب وإنت بتتكلم على الشات مع واحد لسه عارفه من دقيقة واحدة أول ما عرف إنك بتحب النادي المنافس لفريقه في الكورة.. يكتب ويقول لك "إنت حمار ما تفهمش حاجة"...

زمان فيه حد قال (مش عارفين مين اللي قالها بس أهو قالها وخلاص):

أنت حر.. ما لم تضر..

أول ما حريتك تجرح حد تاني.. تتحول مباشرة من حرية إلى.. ضرب تحت الحزام..
ومن ناحية تانية.. اسأل نفسك سؤال..
"إيه اللي أنا هاستفيده لما أعرف الباس وورد بتاعة إيميل واحد صاحبي وأعرف أسراره وخصوصياته.. إيه الفايدة اللي هتعود عليَّ لما أشتم على الشات أو أبعت رسالة لواحد ما عرفهوش أرخم عليه فيها.."
لو لقيت فايدة واحدة قول لنا..

وعقبال ما تلاقي.. مستني رأيك.. في الصندوق اللي تحت ده..

مع تحيات : ( * angel2022 * ) زيــــــــاد خــــــالــــد