زي الملايكة في رقتها(بليز المساعدة)

[love_hunter]

أنا طالب ف ثانوية عامة 3 بالتحديد علمي علوم
أنا هقولكم علي حكايتي معاها وعايز حد يقولي أتصرف ازاي
بنت جميلة وهادية ومؤدبة جدا ودحيحة(ممتازة) باباها ومامتها دكاتره وأخوها الكبير في بعثة لأمريكا عائلة محترمة جدا جدا وبنت أكتر من الأحترام متلاقيش
كانت معايا ف درس من الدروس أعجبت بيها قوي بنت زي دي استحالة تتعوض
في البداية كنت ببصلها لحد ما خدت بالها والمفاجأة أني أكتشفت انها معجبه برضو بيا ودا اكتشفته لما لقتها بتبصلي كل فين وفين أخري معاها كان أبتسامة تعبر عن المشاعر الي جوايا وهي كمان...كنا زي ما نكون عارفين بعض من زمان كنت مرتاحلها قوي كنا دايما نتكلم بلغة النظرات كنت بحترمها قوي وهي كمان كنا عارفين ان احنا مش ممكن نعمل زي التانيين الي بنشوفهم ف الشارع كنت عارف اني مش هعرف اكلمها غير لما ندخل الجامعة
هتقولي أكيد كنت مخدوع فيها هقولك دي بالزات لأ أنا عارف أصلها من فصلها ومش ممكن أصل كل بنت تعرفها من أصلها والعائلة الي اتربت فيها
المهم كان شهر ولا أي شهر قضيته ف حياتي
تخيل الأحساس البرئ الي بينا
كان فعلا إحساس برئ
كانت أسعد لحظات حياتي لما عيني تيجي ف عينها وأبتسملها وبسرعة أوي كانت اللحظة دي بتخلص وتغمض عينها
أخر حصة قبل أجازة العيد لقتها بتبصلي بحنية بشئ من الحب :‎‎)‎‏ وكأنها بتقولي مع السلامة أنا ماشية ومش هتشوفني تاني

اه كانت بتودعني قبل ما تسيب المجموعة
كان يوم غريب
أنا مكنتش أعرف ويارتني كنت أعرف علي الأقل كنت هحفظ شكلها كنت هوريها دموعي وهي بتقلها مع ألف سلامة
أنا كل الي فاكرة أبتسامتها لما عيني تيجي في عينها
بجد وحشتني قوي ونفسي أشوفها تاني
خلص العيد ورحت الدرس فرحان قوي عشان هشوفها تاني وكانت الصدمة لما عرفت أنها غيرت المجموعة عشان المواعيد بعد رمضان اتلخبطت عندها
أنا بجد نفسي اروحلها المجموعة بتاعتها الجديدة بس مينفعش
أنا بجد مش عارف أعمل اية
بس بجد وحشتني
يا ترا أنساها ولا افضل عايش علي ذكري بسمتها في قلبي ولا اية?
ياريت الردود وتقولولي اعمل اية