[ حــوار مفتـــوح ] اسبــاب الاعــتزالات !!

[Midget1337]

هوا أيوة أنا ماكنتش فترة طويلة في الإدارة لكن شوفت و سمعت عن حاجات كتييييير جدا..و شهدت حوارات ياما من و مع جميع الأطراف.

الكام السنة اللي فاتوا ظهر كام منتدى عربي منافسين،، و كانوا بيعملوا أي حاجة في قدرتهم عشان يجيبوا الناس من الموقع هنا لحد هناك. و الناس بتقترح حاجات للنهوض بالمنتدى و بتترفض من الإدارة لأسباب "هريانة" و ملهاش دعوة بالواقع...و تروح المواقع المنافسة تاخد الفكرة و تطبقها عندهم و يسحبوا أعضاء من هنا لهناك.

بعد ما الموقع المنافس يقفل أو ما يجيبش همه..الناس اللي راحت هناك ايه اللي هيخليها ترجع؟ كان فيه إدارة بتسمع للأعضاء و تتناقش معاهم في المنتدى المنافس،، انما هنا؟ "ممنوع" ،"دعايا" ،"مرفوض" ،"هنفكر و نقولك" ،"حاضر (ابقى قابلني)".

بعد كده جات إدارة أحمدنت و قولنا الوضع هيتحسن و لكن مفيش حاجة بقت أحسن من أي اتجاه..الفرق ان بقى فيه واحد بياخد اللوم عن مستر خالد و هوا أحمدنت..في حين ان اللي في ايده كان بيعمله و مش مقصر في أي حاجة.

قعدنا نهاتي و نقول عاوزين و لازم يتعمل و بتاع.. كلمة (بعد يومين بالكتير) سمعتها أكتر من 50 مرة على الموبايل في مكالماتي مع أحمدنت و خالد و لم يحدث شئ حتى الآن..و لا أنا غلطان؟

موضوع ان المشرفين عندهم 12 سنة و بتاع.. عشان مش لاقيين أي حد ينفع،،مفيش أعضاء و بالتالي أي حد يقدر يعمل كام مشاركة و يقولك أنا عاوز أبقى مشرف و هيتعين..مش عشان جمال عيونه و انما عشان مش لاقيين. و الموضوع دا مش هيتغير و هيفضل زي ما هوا (طول ما حال المنتدى كده).. بس الفرق ان اللي كان عنده 13 هيبقى عنده 14 و اللي عنده 15 هيبقى عنده 16 بمرور السنة.

ايه اللي خلاني أمشي؟
فقدت الإهتمام بالمنتدى.. الإدارة اللي مشيت و أنا منهم مفيش حاجة كانوا طالبينها غير ان صاحب المكان يهتم بالمكان.. بغض النظر عن انه كان فاكر اننا عاوزين الحاجات دي لنفسنا، بس فعلاً كانت هتخلي المنتدى حاجة تانية.

ناس كتير قعدت تتكلم..قليلين بس هما اللي فضلوا يطالبوا بالحاجات دي و لما زهقوا مشيوا..و الباقي فضل قاعد و متمسك برتبته في المنتدى.

بالنسبة للظروف "الشخصية" .. أنا أوافق metalhead في كلامه ، الواحد عنده وقت فراغ كبير. و لكن مش هقضيه أنفخ في قربة مقطوعة زي ما بيقولوا. أنا أنام في بيتنا أحسن ما أقعد أهري و أنكت و لا حياة لمن تنادي.

-ايه اللي ممكن يتم أو (المفروض كان تم من زمـــان)؟
افتح قسم المشرفين..دور على المواضيع بتاعتي في الادارة العليا و هتلاقي موضوع عن التطوير (نفس الموضوع اللي كان عامله أحمدنت بس أنا نظمت كل المقترحات و حطيتها في موضوع)..الموضوع دا فيه حاجات كتير أوي مفيش حاجة منهم اتعملت..اعمل اللي في الموضوع و هتلاقي المنتدى يقي حاله أحسن و احتمال كبير ناس ترجع (مش بتكلم عن نفسي لأن خلاص دي كانت مرحلة في حياتي و عدت).


معلش طولت في الكتابة، بس دي ان شاء الله هتكون آخر مرة أفتح فيها الموضوع دا ، عشان كل واحد يبقى عارف اللي فيها.. و مش كل واحد مشي يبقى عشان "أسباب شخصية".

تصحبكم السلامة :)