يوميات عضو معتزل

[mizo82]

يوميات عضو معتزل
النهاردة هبدأ بسلسلة حلقات بعنوان يوميات عضو معتزل أتمني أنها تعجبكم والنهاردة الحلقة الأولي وهبقي أكمل باقي الحلقات أذا لاقت الحلقة الأولي أعجابكم

الساعة دلوقتي الساعة 3 العصر وصاحبنا لسة بيفرك عينيه ولسة قايم من النوم أصله كان ياعيني طول الليل سهران في الشارع بيلعب كوره
المهم صاحبنا ده بما أنه من مواليد عصر التكنولوجيا الحديثة فلازم يبقي إبن العصر ده ويستعمل الموبايل والاب توب وصاحبنا ده قبل ما يقوم من سريره ويغسل وشه او حتي يمسح العماصة من عينيه قعد يدور علي الموبايل ولما مسك الموبايل وبص فيه ظهر الذهول علي وشه وقال " لااااااااااا مش معقول مفيش ولا رنة ولا حتي رسالة من ساعة مانمت لحد دلوقتي "
( أصل يعني الدنيا هتقف لو هو نام .... ما علينا)
فقام صاحبنا ده رمي الموبايل بعصبية وقام فاتح الاب توب علشان يشوف مين من أصحابه عالنت فلقي الناس كلها أوف لاين فقفل الاب توب وقام رايح للتليفون علشان يكلم أي حد من أصحابه علشان يخرجوا ويتفسحوا فراح قعد شوية جنب التليفون وقعد يفكر ويقول لنفسه أكلم مين أكلم مين ......

خلاص أكلم نونه

أتصل بأ نونه موبايله مقفول فقال خلاص أكلمه في البيت أتصل في البيت وجري الحوار التالي
( علي فكرة نسيت أقول لكم أن صاحبنا العاطل ده أسمه معاذ )

التليفون رن ثم ردت مامة أحمد فقال لها معاذ

معاذ: مساء الخير..أزيك يا طنط
طنط: أيه ده معاذ فينك بقالك فترة مبتكلمش أحمد
معاذ : معلش يا طنط الدنيا تلاهي
معاذ: هو نادر (الى هو نونه ) فين يا طنط بتصل بيه علي الموبايل موبايله مقفول
طنط : ده نادر لسة مرجعش
معاذ : مرجعش منين ( الندل راح يتفسح من غيري ..."ده معاذ بيكلم نفسه")
طنط : ده نادر لسة مرجعش من الشغل
معاذ(بإستغراب) : وهو نادر بيشتغل
طنط : ايوة ده بقاله كذا شهر
معاذ : طيب كويس
معاذ: طيب سلام دلوقتي ياطنط ولما نادر يوصل البيت قولي له أني أتصلت بيه
طنط : حاضر يا معاذ
معاذ : سلام
طنط : سلام

قعد يفكر معاذ ويقول لنفسه كده الخروجة باظت طيب هخرج مع مين وقعد يفكر طيب خلاص اخرج مع لبنيتا وأتصل با لبنيتا وحصل نفس السيناريو وأتصل تيتا والجوكر وميدو ورسكه نفس القصة

معاذ أتعصب قوي وقال خلاص يغور كل العيال دي أنا هكلم أي واحدة من البنات وهي هتنزل معايا علي طول

وفعلا قعد معاذ يدور في الموبايل بتاعه علي نمر البنات طلع له أول أسم منه فقال لا البت دي خنيقة دور شوية تاني طلعت له بسمة فقال لا دي عايشة فيها دور الأميرة ديانة فقال طيب أجرب أجرب أكلم دينا وحصل الحوار الأتي

معاذ : هاي دينا عاملة أيه
دينا :معاااااااااااذ فينك ياعم
معاذ : مشغول يا بنتي علي طول
دينا : ماشي ياعم المشغول
معاذ: المهم كنت عايزك في موضوع مهم
دينا : خير يا تري
معاذ : كنا عايزين نخرج خروجة جامدة
دينا : أسفة يا معاذ مشغولة والله جدا
معاذ : يعني هيكون وراكي أيه
دينا : ورايا شغل كتير جدا اصل أنا بشتغل مع بابي في الشركة
معاذ : طيب خلاص هكلمك في وقت تاني ... سلام

وقام قافل معاذ التليفون وهو مخنوق قوي وقعد يفكر وقال لنفسه الظاهر ان الموضة اليومين دول الشغل وأنا من بكرة هروح أشتغل بس هشتغل ايه....
مش مهم هشتغل أيه المهم أبقي ماشي مع الموضة وأهم حاجة أني أصحي بكرة بدري علشان أروح الشغل

وهكذا أنتهت الحلقة الأولي وأستنوا الحلقة التانية وأزايمعاذ هيصحي من النوم بدري