الـفـراغ و الـكـتـابـه و عـربـيـه الـفـول

[super_man619]

بسم الله الرحمن الرحيم
السلام عليكم و رحمه الله و بركاته

ياااااسلام يا جدع .. اليومين دول منتابني حاله من الحنين الي ايام اعدادي .. كانت هنا .. من اجمل ايام حياتي كنت ف حاله من الحب الشديد لكل ما حولي .. حتي الحجات الوحشه , انا عندي نظريه بتقول " ان كل حاجه حلوه زي ما هي "
و مينفعش تتفزلك و تحاول تخلي حاجه احلي , و ثق انه ربنا عز و جل مش هيعمل حاجه وحشه , في احد ايام الامتحانات ب تالته اعدادي " ان مخانتنيش الذاكره يبقي الترم التاني و ان خانتني ادبحها " سعات تحس ان ايام زمان ديه لازم تطلع و ف حالتي هنا الكتابه هيا الحل , صاحي الصبح , مدي الوش الجبس , دخلت الحمام , مدي نفس الوش حتي لنفسي ف المرايه لدرجه ان اكتئابي زاد , استمريت لمده ساعه بهذا القناع
ماما : ايه ياض البصه ديه
انا مبردش
ماما : متتكلم عدل يانبي
مبردش
ماما : ماهو الغلط عليا انا الي مربتكش
انا : ماما انا حملتك زوما و الاقصر
ماما : بجد يا واد
انا : اه و جبتلك السيريال بدل التريل الي بيقرفك
ماما : شاطر يا واد , دول بيذلوني بتوع التريل دول
انا : و لو سبتيني انزل ف سلام ممكن افكر اعملك اميل
ماما : شريف , هوه انا خلفت غير شريف
انا : ربنا يكرمك و يوقف ف طريق ولاد ابو اسماعيل يا رب
ماما : اسماعيل !! .. , طب امشي يابن الجزمه منتاش واخد ولا مليم
انا : لاحظي انك بتطيري حلمك فأنك تبقي من ملاك الياهو
ماما : هبقي من ملاك جاردن ستي يا خي .. روح اتنيل علي خبيتك
انا : خيبتي .. و سبتها و مشيت
ماما : و البستك يا معفن الي راميها ف كل حته .. , تلمها يا روح امك انا مش الشغاله الي جابهالك ابوك
انا فـ سري : اهو ابويا اتكل من الاصطباحه ديه
انا : حاضر هبقي المها هي و الشرابات كمان عايزه حاجه
ماما : عاوزه سلامتك يا خويا , هعوز منك ايه يعني يا زينه الرجال
انا : يا ماما شوفي ابنك ده اما يكبر هيبقي ايه .. , دنا لو كتبت حوارتي انا و انتي ديه هجيب ملايين
و سبتها و مشيت قطمنا و حقننا للكلام

نزلت من بيتنا مع اعز اصدقائي الزفت مصطفي .., ايوه يا زفت بقي تشتغل امي امبارح و تقولها ان عليا درس فرنساوي الساعه 8
تيفا : بس ايه رئيك ف المفاجئه
انا : يابني انا الماني اساسا
تيفا : و حيات ربنا
انا : حيث ان قدامنا 4 ساعات وقت بدل ضايع
تيفا : يبقي علي القهوه
انا : علي المسمط علشان هموت من الجوع
تيفا : لا مش بحب البقسماط من غير شاي
انا : نعم ياض
تيفا : السميط يا شري , مبيدخلش بيتكو ولا ايه
انا : بقولك المسمط يا جلنف
تيفا : و انا بقولك مش عايز سميط
انا : يا ابن الجاهل المسمط ده سمين و لحمه راس و مشنكاح و عكاوي و كوارع و ممبار و مخ و قشده يعني
تيفا : انا مباكوش الحجات ديه
انا : اهو انا مباكولش الا الحجات ديه

دخلنا علي مسمط اسمه الباب العالي , كان اجمد مسمط فيكي يا منطقه ايامها

ايييييييه يا مينا .. عامل ايه ياض
مينا : شريف منورنا حبيبي ياض
انا : بدايتا كده احب اقولك تدي ضيفنا الكوكتيل التمام و انا ساندوتشين سمين و كارعين و شوربه ياض
تيفا : كوكتيل ايه و هنا عصاير كمان .. , حيت كده انا بحب الجوافه
انا بأبتسامه خبيثه : لا لا يا تيفا الكوكتيلات هنا لا توصف لا تقولي فرغلي ولا العائلات شوف هنا و جرب
مينا جه و معاه طبق المشنكاح التمام و حطه قدام تيفا
انا : ايه رئيك ف المفاجئه ديه بقي
تيفا : جتك الارف و انت فاكر اني هاكول ده
انا : مانا عارف انك " تــــــيـــــــــت " و مش هتاكله ف انا عامل حسابي اني افنشه
تيفا : طب اطفح
و انا شوفت من كده ان تيفا كان استحمال خمس تفات نخاع منهم 3 علي وشه و سابني و طلع علي القهوه
و ضربت انا الوجبه المهوله ديه و طلعت علي القهوه