فاااضي و فاااارغ و عم ميمي

[super_man619]

بسم الله الرحمن الرحيم
السلام عليكم و رحمه الله و بركاته

انا مختلفش كتير عن اي شاب مصري .. بس جوايا حاجه بتقولي اني مختلف .. اما كنت فـ المدرسه كل المدرسين اعترفو بأني ذكي و دماغي حلوه و لازم اذاكر و , و , و ... مع اني عمري ما طلعت الاول مثلا
ولا جبت ترتيب ولا 101 % و كنت بعتبر انه لما راجل شحط فحل غدنفر , عريض المنكبين شلولخ " علي رئي عادل امام " يعيط علي نص درجه , تبقي مزهله " علي رئي معرفش مين " يعني ايه تعيط علي نص درجه
فيه حجات اهم تعيط علشانها .. و دلوقتي ايام امتحانات و ف الفتره ديه البلد بتعيش فتره عصيبه و ترتفع معدلات التوتر من جميع الجهات .. امك , أبوك , اختك و اخوك الصغيرين الي حيبو يولعو الجو اما حد يقولك ذاكر .. هنا بقي يحضرني موقف .. واحد قريبنا رزل اوي .. عبيط و اهبل و زمباوي " عادل امام بردو " يشبه الي حد كبير الاخ مورتا " مرضتي منصور " و الاتنين يشبهو لحد كبير خالتي اللاتاته و من حظي السئ اني ارد علي هذا الشخص الافعواني و الحلزوني و المتغترص و المتشفتق .. أرد : مين معايا
الشخص : طب قول سلامو عليكو الاول
انا : سلامو عليكو , مين معايا
الشخص : عليكم السلام " لاحظ لحد دلوقتي مش راضي يفحص عن هويته " .. , مش عارف صوتي
انا : اللهم طولك يا اريال ... انت عارف ايه الي مصبرني عليك يا شخص انت
الشخص : ايه
انا : أولا اني زي منتا شايف او سامع .. فاضي
الشخص بحنق : و ثانيا
انا : انها فاتورتك و انا بخسرك فلوس
الشخص : انا عمك عبد الحميد ياض
انا فـ سري : ياض .. مين ابن الجزمه ده
اهلا عمو ميمي " بيتغاظ اوي من الاسم ده "
ميمي : ايه ياض قله الادب الي بتكلمني بيها ديه
انا : معلش يا ميمي " من غير القاب " الي ميعرفك يجلهك
ميمي : بتذاكر ياض
انا فـ سري : ياض تالت .. دنتا ابن جزمه بقي
انا : اه اه طبعا
ميمي : والله ما باينلك مذاكره ولا نجاح
انا فـ سري بردو : اول كلمه عدله تقولها من اول المكالمه
انا : يا انوكل Give From The End
ميمي : ايه ياض
انا : يعني هات من الاخر
ميمي : خلي امك تبعت الاربعه كيلو فسيخ
انا : حاضر و هبعتهملك ديلفري كمان " و عليهم كيلو فضلات حيوانات هديه مني "
ميمي : سلام
انا : طب قول سلامو عليكو
ميمي : يابن ..

قفلت السكه ف وشه


ناس كتير بتقول اني قليل الادب لو اخذنا بعين الاعتبار ان الشخص ده عمره 59 سنه .. بس بيتيهقلي ان هوه الي استفزني .. هوه عارف اني من زمان مبطيقوش .. يحصل ايه لو جابن من الايند و قال انه عايز الاربعه كليو فسيخ بتوع العزومه .. طب بلاش ديه .. هيحصل ايه لو عمل زي الدول المحترمه و اول ما يرفع السماعه يقول اسمه .. بدل ما يدوخني و يقل من قيمته .. خد عندك مره زمان لسه فاكرها علشان كانت اول مره اترفد من المدرسه .. مدرس العربي .. بالصدفه البحته اسمه نجاح .. اهي مع شخص زي ده يبقي اسمه نجاح .. لا و ايه مدرس .. اهي ديه صدفه واحد ف المليون فعلا و المشكله انه ملوش ادني علاقه بأسمه .. ده راجل بويستي بو " علي رئي احمد مكي " .. قاعدف الفصل و حاطط الموبيل ف وداني و فاتح الاي بادي و بكلم البنت الي ف الدور الي تحتينا و عااااااايش .. يجي الصرمه ده يقومني اجاوب .. المعروف اني شاطر شويه و السؤال كان سهل .. احرجته و جاوبت و قعدت .. قومني تاني , ايه الي انت لابسه ديه مشيرا للكوفيه الفلسطيني الي لابسها ..
ديه فوطه يا مستر و طلعتله رجلي و شاورت علي الكونفرس , و ديه قبقاب اسود و طلعت الموبايل و قولتله ديه ماكنه حلاقه .. و طلعت من الدسك و عديت من جنبه و قولتله وسع بقي علشان الحق المدرسه , و سبتله الفصل و مشيت .. نص ساعه لقيت المدير ذات نفسه جايلي و مديني جواب فيه اسبوع رفد

انا شايف المدير جاي من بعيد : اسبوع ولا تلت ايام
المدير : استماره 6 يا خفيف
" معروف علاقتي ب المدير كويسه و انا بحبه بجد مش هزار و هوه بيعاملني زي ابنه "
انا : اه كده ماشي
المدير : ايه الي انت عملته مع نجاح ده ياض
انا : يعني يرضيك يا مستر محمد يقومني و انا بكلم البنت
المدير : لا طبعا يا " لفظ قبيح يشير اني مش راجل يعني "
انا : و انا جاوبتله علي السؤال الي قاله و صح و قعدت
المدير : و بعدين
انا : قومني تاني بيقولي ايه الي علي كتفك ديه
المدير : ها
انا : قولتله فوطه
المدير : ههههههههههههههههههههههههههههههههههه " ضحك جامد " خد ياض دول اسبوع و امك تجيلي
انا :ايه ده انا اترفدت
المدير : مبروك يا حيلتها
انا : انتو كده بتخسروني
المدير : يديني بالقفا و يضحك


يحصل ايه لو الرجل البالغ من العمر ارزله .., احترم نفسه و احترم حريتي الشخصيه و مسألش ايه الي علي كتفي ده .. هيكون ايه يعني .., انبوبه مثلا .. شخصيه رخمه