شروط مرشح الرئاسة

[gahanabobo]

ألا يكون الرئيس الجديد مخلف علشان ميورثش

ألا يستخدم مصطلحات مثل "محدودي الدخل"، "المرحلة المقبلة"، "لا مساس"

ما يعملش زيارات مفاجئة للمصانع يوم السبت الساعة حداشر، احنا اللي حنعمل له زيارات مفاجئة كل تلات ساعات

كل يوم الصبح يسمع أغنية دامت لمين.

مايفتكرش انه عشان بقى رئيس انه قائد الثورة

مايقولناش الإخوة و الأخوات.. أمي ما خلفتش غيري انا واخواتي

الي يقول كلمة بناء علي تعليمات السيد الرئيس يعدمه مباشرة من غير محاكمة

يكون بيتكلم و يفهم إنجليزى من غير ما يطرطق ودانه

ولو نجح بنسبة اكتر من 60% في الانتخابات يتحاكم

يبقى عارف اننا منتخبينه هوه مش هوه ومراته و ابنه و اخواته و امه و عيلته كلها

يبقى عنده فيسبوك و تويتر بس معندوش فارم فيل ..ويكتب تويت واحده ف اليوم عشان ميضيعش وقت الشعب

ميكونش ف لمعان و بريق حمادة هلال

يكون متواضع جدا ...اه طبعا .....لا مش لدرجة يقعد في خيمه دي تبقي فال شؤم

مراته لازم تاخد لقب سيدة مصر الأخيرة

مايقعدش فى القصر الجمهورى ياخد شقة ايجار جديد احسن

لازم كل جمعة بعد الصلاة يزور منطقة ويتكلم مع اهلها

ياكل العيش أبو شلن ويشرب من الحنفية

ماتكونش البدله بتاعتو مكتوب عليها اسمه.. عايزينه يجيب بدل من عند ابو نسمه

المفروض يقعد يفر كل حاجة في البلد ، يا راجل كبر مخك.

لازم يبقي عنده ريسيفر وتيلفزيون وبيتفرج علي قناة الجزيرة

بيقول الكيان الصهيوني دوله الإحتلال مش دوله إسرائيل

مايكونش عمل أي ضربات جوية أو أرضية أو فضائية يذلنا بيها

مش كل ما نكلمه يقولنا عيب انا زي ابوكم

ميعطلش المرور عشان يروح مشوار يمشي في الشارع زيه زينا ياما يستخدم الطياره

لا يبدأ اي جملة بكلمة "سنظل"

ما يقولش على منتخبنا كويس ومايتصلش بحسن شحاته ولا يزور اللاعبين في التمرين.

لازم مايكونش راعى الرياضة والرياضيين ولا راعى الثقافة والمثقفين ولا راعى الفن والفنانين.

ميضحكش علينا ويروح يفتتح نفس الحاجه عشرين مرة.

ميكونش بيصلي العيد قبل العيد ما يبدأ و تلاقي صورته ملطوعه عالاهرام يوم الوقفه الساعه اتناشر بليل.

يبطل كلمة نشجب و ندين.

مايكونش من محبي الاستقرار.

واللي عنده اقتراحات تانية يتفضل نسيت حاجة كمان

يلبس جلابية بيضا وطاقية بيضا ويروح يصلي الجمعة في الجامع وسط الناس