و الله حسبلك الدين يا ابن .....

[WELFA]

السلام عليكم .....


كتير منكم تسائل هو انا ليه مش بكتب ادب ساخر - والله ولا واحد سألني –

وبما اني ساخر فقولت اسخرر معاكم شويه >>>

هكلمكم النهارده يا كتاكيت عن السب بالدين اه ايوه السب بالدين , الموضوع دا مهم اوي

خصوصا ان الدين دا هو كل حاجه يعني انت من غير دين زي الانعام كدا مالكش فايده

وفي الاخره هتتشوي ان شاء الله


نرجع للموضوع اللي هو السب بالدين

هقولكم قصص اقروها واحكموا بنفسكم

اتنين من اصحابي بيتناقشوا في مسأله فقهيه عسره واحد منهم حالاتي طول عمره في السعوديه والتاني صوفي ...

قعدوا يتناقشوا بتاع ساعتين في الموضوع ودا مصر على رأيه ودا مصر على رأيه لحد ما

سخنوا اوي في النقاش – الكلام دا كله في الشارع –

وقام واحد قايل للتاني والله العظيم انا ممكن اسبلك بالدين في 3 دقايق

قام التاني قايل وانا يعني معرفش اسبلك طب يلعن تيييييت والتاني رد بدينين

وانا واقف مستغرب جدا لسببين

الاول : هو السب بالدين سهل اوي كدا ليه

التاني : - ودا اللي شغلني اوي – اشمعنى في 3 دقايق بالتحديد

ولغاية دلوقتي معرفش



وبعدها عادي بقى محصلش حاجه واتصالحوا في ساعتها والدين فضل مسبوب ...

الغريب ان الحوار كان فقهي ووصل لانهم خرجوا من المله

دا برضو فكرني بواحد صاحبي غير الامورين اللي فاتو - والله عيال شرده -

واحنا واقفين في البلكونه بنبص على ... احم قصدي بنتفرج على الشارع

فجأه الواد قال لبنت في الشارع ما نعرفاش : يا بنت تيت التيت انتي اللي في القلب

جمله مقفاه لو فاهم يعني ايه مقفاه اساسا

وعادي وكمل كلامه معانا ولا كأن حاجه حصلت طبعا انا برضو استغربت – مقضيها استغراب مش عارف ليه – واستغفرنا ربنا وزعقناله وهزقناه شويه وخلاص

مش عارف الموضوع سهل اوي ليه

لا والغريب ان كتير اوي ممكن يسمع واحد بيسب بالدين ويسكت انما لو شتمت عمرو خالد

ولا حتى تامر حسني تلاقي القيامه قامت


هو البشر اغلى عندنا من ربنا خلاص ؟!

اذكر مثلا – اشمعنا السادات بيذكر مثلا وانا لا – اني في رمضان وانا راكب المواصلات والسواق ماشاء الله

مشغل قرآن وحاجه فل ولسه صاحين وفجأه واحد كسر عليه بموتوسيكل ..

قام السواق سابب له بالدين وشاتمه بامه ونزل له وكانت حاجه تمام اوي

اللي غاظني اني مشغل قران ,

دا زي لما واحد يشوف بنت عاوزه تخلي معاد المحاضره من 8 ل تمانيه ونص ويقول ان كيدهن عظيم – حدث بالفعل –

المهم الراجل اللي جنبي في الميكروباص ماسكتش

اتنرفز وقام باصصلي وقايل : طب هو كسر عليه , ايه ذنب الدين تؤ ... طب بيشتم الدين ليه دلوقتي

هو الدين عمل له ايه – الكلام دا ليا انا – وانا كالعاده مستغرب كالعاده وبقول في نفسي

وانا مالي بالذات جاي يقولي هو انا قمر الدين يعني جاي يشكيلي !

ما يقول للسواق وفضل كدا لحد ما كنت انا كمان هعمل زي السواق بس ربنا ستر

وسكت بعد ست اشهر باين او انا مت باين مش فاكر بالتحديد


اتحكالي مره ان واحد راجل كبير سمع عيال بيسبوا بالدين في شارع قريب من هنا - هنا اه عندي -

قام طالع لهم وقال لهم ما تسبوش الدين يا ولاد تتتت التتتتت بجد حاجه مهزله بمعنى الكلمه

لا وعاوزين يسترها معانا وبنقول مش عارفين ربنا غضبان علينا ليه

ما نص البلد بيسبوا بالدين

طبعا قياسا على كدا اخوانا في بلاد الشام بيسبوا برضو

عمر ما كان السب بالدين له لهجه وانا سمعت كتير

الجميل ان ثقافة السب بالدين دي ما وصلتش الخليج

ابقوا فكروني ابعت اتنين من العماره اللي قصادي يعلموهم

واهو بالمره يقل السب بالدين في العماره لحسن انا بقيت مدمن سماع سب بالدين في كل وقت

- انا قلت كلمة سب كتير لدرجه مغثيه , صح ؟ –

والجمل الاعتراضية اكتر من الكلام نفسه - حظكوا كدا اعمل ايه -



المهم بقى


لما تشوف واحد بيسب بالدين تعمل ايه الاصح عشان تعلم اللي قال ان كدا غلط

وفي نفس الوقت ما يتلعنش اللي جابوا ولا بلاش اكمل