ਊỘộ४܊ಱਲൂ مشاغل الحياة لسه وخداكو لبعيد ൂਲಱ܊४ộỘਊ

[الحب]

السلام عليكم ورحمة الله وبركاته

النهاردة حبيت أتناقش معاكم في موضوع صلة الأرحام ..

كتير أوي مننا دولوقتي مش بيروحو يزوروا قرايبهم

والحجة الأكيده اللي بتتقال دايما .. مشاغل الحياة ..

فيه ناس بتعدي عليهم الشهر والشهرين والسنة والسنتين وهما

ما يعرفوش فلان اللي يبقى عمهم اخباره ايه .. ولا فلانه اللي تبقى الخاله عامله ايه

فيه ناس قرايب مش بيشوفو بعضهم الا في المناسبات زي اعراس ولا عزا وزي كده

معلش حتى لو الدنيا واخدانا وعندنا مشاغل كتيرة مش هتضرنا ساعة ولا ساعتين

أروح أسأل فيها على قريبي وأطمن عليه .. وحتى بتبقى عندنا موبايلات واجهزة حديثة

ومش بنستخدمها برده ولا بنسأل على حد ..

اللي خلاني أكتب الموضوع اني رحت زيارة لناس اعرفهم بتقولي احنا مش بنشوف بعض

الا في المناسبات بس .. قلتلها طيب لو السنة ما فيهاش مناسبة من عزا او فرح او غيره

بتقولي عادي بيحصل ما فيش حاجه كل واحد في حاله .. قالتلي احنا قبل كده قعدنا ست

سنوات ورا بعض ما فيش بينا غير مكالمات مع عمي وغيره .. بجد انصدمت منها ..

6 سنوات ما أشوفش عمي ليه كده .. للدرجة دي مش لاقين وقت نروح نزور قرايبنا

ده احنا في يومنا بيبقى عندنا اوقات فراغ ليه مش بنروح نزورهم فيه


انتو عارفين ان صلة الرحم واجبة وربنا توعد اللي يقطع صلة الرحم بقوله ( فهل عسيتم إن توليتم أن تفسدو في الأرض وتقطعو أرحامكم أؤلئك الذين لعنهم الله فأصمهم وأعمى أبصارهم ) .. شفتو وعيد اللي بيقطع الأرحام ازاي .. ربنا يعفو عنا

وكمان الرسول عليه الصلاة والسلام قال

( من أحب أن يبسط عليه في رزقه وأن ينسأ له في أثره فليصل رحمه )

ليه احنا نحرم نفسنا من الأجر العظيم .. ونخالف اللي أمرنا بيه ربنا

ليه ما نبدأش من النهاردة كل واحد يفكر يزور قريبه ويروح يطمن عليه

ولو كنا في مكان بعيد او ما نقدرش نروح لظروف خارجية نرفع السماعه

ونسأل عليه .. بجد مش هيكلف حاجه



في نهاية كلامي .. حابه أسمع آرائكم في الموضوع ده

هل انتو من اللي بتحرصو على زيارة أقاربكم ولا مشاغل الحياة لسه وخداكو لبعيد ؟

عايزين اجابات بصراحة




مع أرق تحيه