๑۩۞۩ شوفولى حل فى الواد ابو صاحبى ๑۩۞۩

[Un_Wanted]

مع السلام عليكم

ما انتو اصلكو لازم تشوفولى حل لازم يعنى الولا صاحبى مش عارف ينزل من فوق
اه والنعمة ما عارف ولا عارف يعمل حاجة خالص

طيب بصو انا هحكلكو الحكاية زى ما قالهالى
اسمعو منو الكلام بقا

في يوم كنت قاعد أنا وشوية من زمايلي في الكفاح والجهاد في كافيتريا ( حماده حلامبوحة ) جانب ورشه ايمن خبينى وكنا قاعدين نقزقز ونشرب وناكل و بنضرب شوية حاجات كده عالماشي أنا وزمايلي المجاهدين
...و يا دوب أنا خلصت كام حتة الجاتوه بتاعتي ونص التورتة بتاعت الواد حودا
وشربت النسكافيه بتاع الواد عمار وأكلت الكيكه بتاعت الواد فايز والدنش بتاع الواد سامى
وشربت عصير المانجه بتاع الواد طاطى وأخدت شفطتين عالطاير من عصير الجوافة بتاع الواد أحمد
ولساه هاضرب عصير الدووم بتاع الواد مصطفي بصيت في الساعه لقيت الساعه بقت حداشر
قولت يا نهار أسود أبويا زمانه مولع في البيت حريقة دلوقتى وهايطلق أمى بسببي
لازم أروح حالآ الا ابويا هايطلع البلا علي جتتى
لأنه محذرني ييجي خماشر تماشر مرة كده أنى ما أتأخرشي برة البيت لبعد الساعه عشرة
قولت للعيال زمايلي سورى يا مكافحين انا هاضطرأخد عصيرالدووم تيك اواي علي السريع
لأنى لازم أروح حالآ دلوقتى أهوه الا يومي باين عليه فوحلقي غامق وابويا هايطين عيشتي
وضربت عصير الدوم علي بوق واحد وأخدتها طيران لحد بيتنا
وفتحت باب الشقه بشويش خالص وروحت قافله بمنتهى خفه اليد ( ولا أجدعها حرامى شقق ) ومن غير معمل صوت خالص
وبلف ورايا لقيت الحاج ( تيفا ) أبويا الحاج عاطف ( بس أنا بدلعه شوية هههههههههه)
لفيت لقيته في وشي -- ولقيته ماسك الكرسي الخشب اللى عندنا ولسه بيرفعه من على الارض وهايهبدنى بيه علي نافوخى --
روحت بسرعه الصاروخ عامل شقلباظ أرض جو وروحت جاري علي أوضتى
وناطت فوق السرير ومن فوق السرير قفزه لولبيا إنتحاريه شقلباظية لفوق الدولاب
( وطبعآ عامل الخبره واللياقه البدنية وغريزه البقاء والمحافظة علي الروح هما اللى لعبوا دور البطولة هنا
ونصيحه منى ماتجربوش الحكايه دي عشان تقريبا كده دراعي إتملخ وضهرى طق ورجلي إتلوحت وجالي لمباجو وارتجاج مخ علي خفيف ههههههههههه )
قولت لأبويا : معلش يا حاج تيفا انا عارف إنى اتأخرت بس أصل عربية خبطتنى في الشارع
الحاج : عربية يا روح أمك طبعا بيهزر وعلشان ماما مكنتش واقفه يعنى فكان بيتكلم بقلب جامد
.. أنا أعرف اللي عربيه تخبطه ده يموت .. يتنيل علي عين اللى جابه ويتعور لكن مايدخلش البيت الساعه واحده بالليل
ثم انت مش وراك تربيه عسكرية الصبح
والمفروض انك تصحى بدرى
...... ياعم فكك من الحاجات دى
افتكرلنا حاجه حلوة
أمي : أنت كنت فين يا واد أنت كل ده .. يووووووه !! ايه اللي مطلعك فوق الدولاب كده
قولتلها : أصل خابطة العربيه أثرت علي نافوخى وخلتني أتخيل إني بقيت نسناس أو قرد
الحاج : أنت هتنزل يالاه أنت ولا اكسر الدولاب ده على نفوخك
قولت لأمى : شوفتي يا أما عايز يكسر عفشك إزاى هو مش مكتوب عليه في القايمة إلحقي بقا إشتكيه بسرعه وشحطتيه في المحاكم
امي : يا بنى إحنا قعدنا مستنينك عالعشا ولما اتاخرت قلقنا عليك أنت أتعشيت بره ولا إيه ؟
الحاج : وهو ده اللى هامك أتعشيت ولا لأ .. ماهو ده اللى أنتى فالحه فيه عماله تعلفي فيه لحد مابقي زي البغل أهو
قولتلها : ربنا يخليكي ليا يا أما وتعلفي فيا كمان وكمان بوصي إنا هانزلك بعد بكرة عالضهر كده
.. إبقي إعمليلي ساندويتش بسطرمة ولا هوت دوج أتصبر بيه
أمي : وهوا فيه قرود بتآكل بسطرمة ولا هوت دوج برضه ؟
قولتلها : أه يا أما فيه .. بياكلوا هوت دوج وساعات دوج من غير هوت كمان ..
أنتى هاتتريقي يا أما .. أمري لله طب إبقي إعمليلي بقا ساندوتش موز ... ولا ساندويتش فول سوداني ... ولا فول بالزيت الحار .. او فول بزيت العربيات بس بلاش زيت موبيل ألا بيحرق عالصدر يا أما ..
الحاج : أه ماهو أنت مش فالح غير في التريقه .. إنا مش قلتلك ياض ميعادك الساعة عشره وماتتأخرش لا أطين عيشتك
( هههههه عشم بيني وبين الحاج بس مش أكتر )
قولتله : ماهو بصراحة بقى يا حاج الساعه عشره دي بدري قوي يعني وبعدين ما بالحقش أخرج ولا بالحق أتفسح مع أصحابي
الحاج : وكمان مش عاجبك وبترد عليا .. حد يجبلي سلم اطلع افتح دماغ الواد ده ولا اغزه مطوة وأخلص منه .. أنا عملت إيه يا ربي ترزقنى بالبلوة دى
قولتله : شوف بقا انت عملت إيه في دنيتك .. شكلك كده كنت منيل الدنيا يا حاج هههههههههه
الحاج : بتتريق .. حد يجيبلي سلم لما أطلع أجيبه علي جدور رقبته من فوق الدولاب ..
قولت : لا لا لا اوعوا حد يجيب السلم ولمي كل المطاوى اللى في البيت يا أما وأبعدي أى سلاح أبيض من وش الحاج دلوقتى حتى لو قصافة ضوافر
.. عشره ايه اللى بتقول عليها دى يا عم الحاج بلاش كلام فارغ بلا قله أدب .. هوه الساعه تسعه حلو قوي ولو تمانية يكون أحلي واحلي ..
خلي الواحد ينام بدرى طب ده حتى النوم بدري صحى ومفيد ..
الحاج : صحي ومفيد يا روح أمك أنت هاتعملي فيها الشيف اسامة السيد ..
طب وديني لا أنا قاعدلك هنا لما نشوف إيه أخرتها ولما أشوف هاتنزل إمتى سيادتك من فوق الدولاب ....

وطبعا يا جماعة أنا حاليآ عايش ومتعايش أكل وشرب ونوم فوق الدولاب من أمبارح ومعايا اللاب توب بتاعي بس مسيري هنزل أروح أستحمى ولا اتزنق وأدخل الحمام
...والحاج أجازه وقاعد اليومين دول في البيت وقاعدلي علي الكرسي تحت الدولاب....
ومش عارف اروح التربيه العسكريه بتاعتى
يعنى الحاج تيفا هو اللى ماخرنى انى افيد وطنى
وشكله كده ناوى يضيع الفلانتين منى
ويضيع عليا مقابلة المزة بتاعتى والبت ها تضيع منى
اعمل إيه في المشكلة دي
وأنا عايز انزل وباقصي سرعه ربنا ما يوزنقكم زنقتى ههههههههه
شوفولو بقي حل بسرعه ..

يلا بقا حل على السريع كدة