كام طريقة علشان ان شاء الله تتخلع وانت مغمض العينين

[!(Black Jack)!]

كام طريقة علشان ان شاء الله تتخلع وانت مغمض العينين... مسدود الانف والاذن والحنجرة

من كام يوم نوارة جزاها الله كل خير قعدت تنصح بنات حواء أزاي تحافظي على جوزك لحسن يطير زي العصافير
وبناءا على طلب الشموع البيضاء حبيبتي اللي طلبت بوست كبيان لجمعية المرأه المتوحشة
وبناءا على إن زي ما قلنا في بوستات كتير للستات خدي بالك ياأوختشي من سي السيد .. ده عزك والحيطة "أخرسي يا بنت مش مايلة ولا حاجة أهو أحسن من مفيش" اللي سانده بيتك

قررت أنا سوتيتة عضوة الجمعية الرد على بوست نوارة وأديك يا سي مدون يا صديقي كام نصيحة من اللي وصى عليهم داوود في التذكرة .. بالشفا ان شاء الله

شعارنا في هذه المرحلة الحرجة

تديها حب وأحترام 00 تديك عينيها كمان
تديها تجاهل وتعدي 00 ليلتك ان شاء الله مش ها تعدي

1- كن بخيلا وباقتدار وأحرمها من أبسط الحقوق على أساس "وأنا بحوش لمين يعني؟ ماهو علشانكم" "وهو أنا مستخسر فيكم شيء يا ناكري خيري؟ مش لسه جايب لكم بجنيه حرنكش يشيل ويحط عليكم" "هو أنتي مستنياني أجيب ليكي لبس دول في الواحات بيجيبوا للعروسة لبس يكفيها عشر سنين روحي اطلبي حقوقك من باباكي" "محتاجة لبس ومكياج في أيه؟ خروج ومفيش وأديكي مرزوعة وبعدين أنا بعبك من غير مكياج والحاجات المكلفة دي" .. وحط القرش ع القرش والمليم ع المليم وآخرها مال الكنزي "اللي هو إنت" للنزهي "اللي هي المدام وولادها" إن شاء الله لما تفلسع ويورثوك والست تروح تتجوز راجل عدل والعيال تفرتك الفلوس على الرقاصين زي افلام فريد شوقي


2- لا تفوت النظر لكل مزة معدية في الشارع أو النادي أو التلفزيون .. ودائما ماأظهر لها وجه قاسم السماوي بتاع "جتنا نيلة في حظنا الهباب" .. وده على أساس أنها متجوزة سي فضل شاكر في رومانسيته أو أبو هشيمة اللي دفع في الفرح 9 مليون دولار .. ما تقوم تغير الفانلة اللي إنت لابسها دي لحسن خلاص لونها بقى زفحلؤي غامق وريحيتها وصلت لينا من الكمبيوتر


3- أوعى تحترمها قدام غريب أو قريب ودايما بهدلها أو أسخر منها لحسن يقولوا عليك كوكو وماشي ورا كلام المدام والكلام ده كله .. وأهم شيء تعالى قدام مامي وانتقد أكلها ونظامها في البيت وأظهر عدم الرضا في كل حركة أو لفظ أو إلتفاته


4- إحرص على انتقاد سمنتها بشكل دائم حتى تكون عبرة لمن يعتبر .. بس وحياة طنط ظاظا تاخد لي بالك من كرشك أو كما سماه د. ياسر عمر "منحنى الرفاهية" أو كما يسميه أخويا ضايع "عندك كرش يبقى معاك قرش يا قرش لِس" .. بمعنى إن منحنياتها وتضاريسها صعبة طحن وانت منحنياتك كول آخر حاجة ومجننة البنات


5- إياك وكلمة شكر أو نظرة رضا أو لمسة حنية .. خليك عملي لحسن الست تتمرع .. يعني طلباتك وهوب خلصنا خلاص .. هي فتة ولا الصحة دي ملهاش حساب .. أوعى تفتكر أبدا إن الست مفتاحها الكلمة ثم النظرة ثم اللمسة .. خليك متحجج ليها بإن وزارة الصحة بتحذر من اللمس علشان أنفلونزا الخنازير .. دي حاجات فاضية ورفاهيات والوقت من ذهب إذا اتكلمنا ونظرنا ذهب .. خلي شعارك في علاقتك معاها أنا وبعدي الطوفان .. بس أوعى الطوفان يشيلك .. كل إنسان ليه إحتياجات عاطفية .. ممكن ياكل أي كلام يشرب ميه ملوثة يسكن في بيت صغير يشوف أهل زوج من نوعية مرارة الصبار .. لكن الإحتياجات العاطفية مهمة ليها زي ما هي مهمة ليك يا سيدي الفاضل .. ولا عاوز المودام تنحرف وتشرب عرق سوس علشان تنسى


6- صبحها ببوز معتبر ومسيها بقلة أدب على مختلف أنواعها من لفظية لفيزيكالية .. وعلى رأي زينات صدقي ضرب الحبيب زي أكل الزبيب .. بس حاسب تدبح القطة يفيض بيها وتقرر علشان كرامتها بدل ما تخلعك تصفيك زي أي خصم سياسي في دولة فسخونيا العظمى


7- أوعى تديها شعور الأمان أبدا أبدا .. أوعى تسمع كلام علم النفس والهبل ده "إن الست جُبلت على عدم الأمان بشكل فطري وبتحتاج كتير قوي من تصرفات الرجولة الحقيقية على ما تحس بيه" .. لأ يا معلم دايما حسسها إنك مطلوب في السوق ولا الفراخ الخالية من الإنفلونزا .. وإن مسعدة بتاعة الفجل وصابحة بتاعة المش ومرات البواب بيدوبوا في جمالك الفتاك اللي بيفكرهم دايما بعبد الفتاح القصري الله يرحمه .. وإن صلعتك دي دليل زيادة الهرمونات النادرة في السوق .. وأشتغل على نفوخها صح وخليك صاحب تكتيك .. بس أوعى هي تشيط وتقرر تولع فيك بنفس الطريقة لحسن شكلك ها يبقى وحش قوي في المنطقة العربية وممكن تحصل على لقب قرني


8- كل ما تلبس شيء حلو وشيك قول "ضيق ومش لايق عليكي وشكلك زي رئيفة الخفيفة" .. كل ما تتكلم وتعبر عن رأيها قول "حسك عالي وتخين وشبه علي هوبا" .. كل كام يوم حسسها إن كرومبو مراقبها في الشغل وإن أي حركة زي فوئة المزنؤة ها تلاقيك في وشها .. بمعنى أصح الستات السوية بيحبوا الراجل كده اللي معندوش ثقة في نفسه ولا فيهم .. ومش بيزعلوا ولا بيتخنقوا ولا بيخلعوا الراجل ده ابدا بالعكس ده كل ما بيقدم كده بيحلو زي السجاد العجمي


9- إياني وإياك تفرح لنجاحها في أي هدف ليها في الحياة .. حتى لو نجاحها في تربية ولادك ووصولهم للمراكز الأولي في المدرسة والنادي .. دايما عرفها إنها صفر ع الشمال .. ولا المصيبة تساعدها كمان في الوصول لطريق نجاح بتتمناه وتتعب معاها بلا أي أغراض دنيوية .. دايما إسخر منها وشنف آذانها بإن نجاحك هو نجاحها أما نجاحها فده مش مهم ابدا وغير مؤثر في مسيرة أمتنا اللوزعية .. وقول لها إن ورا كل راجل عظيم ست أعظم كتير لكن العكس لم يرد عند ابن حنسه ابدا في كتابه "تأديب العروسة .. الزوجة المفروسة" .. وميمنعش كام كلمة من بتوع إنتي جوهرة والجواهر لازم نعينها في الخزنة اللي في الحيطة وأرقامها السرية لازم تبقى معايا ومحدش يشوفها .. بس لو هي جواهر ياترى انت علبتها القطيفة الغالية؟ ولا خزنة مؤمنة ضد سرقات الغدر والخيانة؟


10- أوعى عمرك تديها سرك أو تحسسها إنك بتثق في عقلها .. ولو استشرتها خد رأيها على سبيل ان الأطفال أحباب الله .. وخليك على المثل الرائع المبدع المفتكس اللي قاله واحد مضروب في المتوسط عشر شباشب يوميا "شاورهن وخالفوهن"


11- إحرص في كل قعدة مع اصحابك على إظهار الضيق والحنق وسب اللي شار عليك بالجواز وسنينه وأيامه .. ولا تنسى الذم المطلق في حماتك اللي مطفشة وقارفة حياتك .. ده مش كفران عشير ولا حاجة ده مجرد تحذير للي لسه متجوزش تؤجر عليه إن شاء الله بالواوا في جهنم ومحدش يبوسها


12- أيام الحمل دي أيام رفاهية النساء حيث الهرمونات وتغيراتها تجعل الست بقوة هرقل وحكمة سقراط وجمال إليسا المتفجر .. وعليه فهي أفضل أيام لقياس مدى تحمل المدام للضغوط بكافة أنواعها بدنية ونفسية وعصبية .. إياك تدلعها كونها حامل في ولادك اللي ها يشيلوا اسمك والكلام ده .. الستات ميجوش غير بالدق على النفوخ


13- لما ابنك العفريت الأزرق يوصل بقى بتبقى فترة ذهبية حيث المدام مش ها تنام سنتين كاملتين .. من رضاعة لإسهال لسخونية لتسنين لطبيخ وغسيل وتنضيف .. وبتبقى المدام بالضبط دايخة زي الطور المربوط في ساقية .. وبتحس إنها عملت في نفسها عملة مفتخرة جدا يوم ما اتهببت قصدي يوم السعد يوم ما اتجوزتك يا خويا .. في المرحلة دي تقدر تعمل معاها شيء .. تمضيها على شيك بدون رصيد .. تاخدها على سور البلكونة تفرجها على غسيل الجيران الرائع في الدوووووووووووووور اللي تحت ده .. "أوبس أنتي وقعتي .. مكنش قصدي" .. بس استفزازها في السنتين دول بيكون كول ع الآخر .. حيث إنها تمثل فعلا كلمة واحدة "أتقي شر المدام بعد كام شهر من غير نوم"


14- طبعا مش محتاج مني وصاية لأن أهلك وصحابك والمجتمع والناس وصوك من قبل مني .. أوعى تساعدها في شيء جوا البيت .. دي مش مهمتك أبدا بوتيتا إنك تكون في حاجة أهل بيتك .. ليك وظيفة محددة تجيب الأبيج وتنااااااااااااااام وتطلب كوباية المية من موقعك في السرير .. كل مساعدة منك هي ها تعتبرها حق مُكتسب .. وإن قالت لك الرسول صلى الله عليه وسلم كان في حاجة أهل بيته .. رد أنت فورا "وبرق قوي علشان تخوفها" ويعني أتشبهنا بالرسول في كل شيء وهي دي اللي باقية؟ .. دايما بص لها وقول لها بطريقة ذكي رستم "مش وظيفتي يا سعادة الهانم"


15- طبعا مش هاأوصيك كل خمس دقائق بدأ من الصباحية تقول لها "ده أنا طول عمري مدلع وماما بتجيب لي الفطار في السرير .. دي خالتي كانت ها تفطس وتجوزني بسيمة بنتها وكانت ها تديني مهر بس أنا اللي نفسي بتجزع من الحاجات الحلوة .. أنا عووووووووووومري في بيت بابا ما شيلت كوباية ولا حتى منديل كلينكس" .. هي لو هابلة ها تصدقك وها تاخد كلامك أمر مسلم بيه .. ومش ها تروح تفحص آثار الأقلام اللي على قفاك .. ولو مش هابلة ها تقول لك تعالى تعالى شوف العصافير اللي أنا دقاهم .. إنت وبختك بقى


16- قف أمام المرآه وأتأمل جمال تقاطيعك المسمسمة وأرفع كرشك وشد نفسك وقول لها بفكر أعدد يا حبي علشان نغير شوية والواحد زهق وأهو نقوم بواجباتنا الإسلامية صح .. ها تحبك أكتر بكتير وتحس بثقل "لأ مش دمك" مسئولياتك تجاه الأمة .. بس حاسب يا معلم يعددوا عليك ساعة ويسكتوا


17- كبرت بقى وهي كمان كبرت وبقت عاملة زي الخيارة البايتة في التلاجة من أسبوع .. وأنت طبعا مش شبه الجميز ولا حاجة .. هو الراجل يعيبه إيه غير جيبه يا سي حوكشة .. إضغط بثقة إن اللي استحملتك سنين العمر وشافت المرار وسكتت مؤكد بعد ما بقت كبيرة خلاص ها تقعد ومش ممكن تخلع .. كان زمااااااااااااااان .. دلوقتي الخلع في الكبار اللي استحملوا علشن خاطر عيون ولادهم لحد ما دخلوهم بيوتهم أكتر بكتير



خد من أختك ستيتة النصايح دي وأعمل عكسها لو نفسك في السعادة .. وطبقها بحذافيرها لو أنت من النوع المغرور اللي بايع راحة البال وحسن الختامة في الدنيا والحساب اليسير في الآخرة .. وتذكر دائما إن "كتر الأسية يعلم الجفا" ولا تنسى إن ثومة بكل حرقة قلب غنت بعد ما بلغت من العمر عتيا

للصبر حدود يا حبيب قلبي .. متوصلش حب عمرك "للحدود" وتيجي تطلب من دريد لحام يعدي بيك بر الأمان