غلطات الافلام العربى..

[Un_Wanted]

طبعا يا جماعه كلنا عارفين ان فيه غلطات فظيعه في الافلام والمسلسلات العربي ومش عارف ازاي بتعدي علي المونتاج
المهم
اللي شاف غلطه في فيلم عربي يقولها هنا
وانا هابدأ


1- فيلم الناصر صلاح الدين وطبعا الساعه اللي كانت في ايده واضحه جدا وغير كده الفيلم تلاقي فيه جمله نصها عربيه فصحي ونصها عامي بحت واكتر جمله موتتني من الضحك بتقول:"ساعطيك هذا الاناء وارجع الاقيه مليان"

2- فيلم احلام عمرنا لما البتاع بينفجر في اخر الفيلم وهما بينطوا في الميه لو دققتوا اوي في الميه هتشوفوا الغواص اللي رايح ينقذهم

3- فيلم باحبك وانا كمان مصطفي قمر كان لابس طقم ونط في المركب بطقم تاني عادي يا جماعه

4- مسلسل سندريلا بتاع مني ذكي بتجسد فيه قصه سعاد حسني ايام زمان هههههههه فيه لقطه بالعربيه معديه من جنب كشك مكتوب عليه دقيقه المحمول ب 50 قرش

5- ودي من افظع الغلطات واللي اتكررت كتير في مسلسلات وافلام ومنهم فيلم الكرنك
وهي انه يوم حرب اكتوبر اول ما الراديو يقول خبر العبور المعلم اللي في القهوه يقولك وزع شربات علي الناس علي حسابي
والغريبه ان حرب اكتوبر كانت في رمضان والساعه 2 الظهر ههههههههههههههههههه

6- فيلم اسماعيليه رايح جاي بتاع فؤاد وهنيدي كان المفروض انهم بيفتكروا كل شويه العدوان الثلاثي اللي هوه كان سنه 1956 وهما كانوا في ثانويه عامه اوكي واخوه مات في الحرب شهيد عادي برده لكن يقول في اغنيه الفيلم "اجيبلي دش معاه موبايل" ههههههههههه ازاي ماكانش فيه ايامها لا دش ولا موبايل

7- فيلم فتح عنيك لما الاتوبيس وقع من الكوبري المفروض.......الغريبه ان سور الكوبري زي ماهو ماحصلوش اي حاجه


8- فيلم "عوكل" في مشهد النهاية لما محمد سعد و نور بيهربوا بالعربية

و هما في "تركيا" العربية كان مكتوب عليها "ملاكي القاهرة" !


9- في فيلم " حين ميسرة " لما كانت جنب محطة القطر المفروض إنها في أيام التسعينيات وبالرغم من دا في الخلفية ورا ماشي قطر مكيف درجة أوّلى لم يعمل على خطوط السكك الحديدة إلاّ من تلت سنين أو أربعة تقريباً


اللى أخد باله من حاجات تانية ياريت يضحكنا
واتمنى التوبيك يكون عجبكم..