الرجاء من اعضاء روما الكرام الدخول

[oOoMANDoOo]

بـــــــــســـــــم الله الـــــرحــــمـــــن الرحـــــيــــــم


اولا ازيكم ياشباب ويارب تكونوا بخير ورمضان كريم على الجميع :)

ثانيا عاوز اقول حاجة بخصوص الاعضاء اللى معانا هنا بيعملوا تصرفات فى حق الاعضاء التانيه اللى معاهم مش كويسه هم ممكن يكونوا مش قاصدهم حاجة بس بجد الحكاية دى ممكن تضايق بعض الناس .... ودى تتمثل فى

1- بنلاقى بعض الاعضاء بيعملوا سبام كتير اوى ياعنى بيكتبوا 3 او 4 ردود كلهم زى بعض او مثلا ردود مالهاش لازمه ياعنى مش بيقولوا اللى عاوزينه فى رد واحد لاء لازم 3 او 4 ردود زى مثلا ( اول رد : ازيك - تانى رد : عامل ايه - ثالث رد : مشكور على الموضوع - رابع رد : :) ) طب وده لأيه ؟!!! يقولك علشان ازود مشاركاتى , طيب ياسيدى عاوز تزود المشاركات بتاعتك مش لازم تكتب فى الموضوع الواحد خمس ردود بيحملوا نفس المعنى , طب مانت ممكن تدخل على المواضيع اللى فى المنتدى ياعنى شايف ان فيه موضوع كويس وصاحب الموضوع تعب فى عمله انت المفروض تشجعه وتحسسه انه عمل حاجة يستحق الشكر عليها قوله مشكور على الموضوع او مشكور على تعبك فى عمل الموضوع او مشكور على النصيحه اى حاجة زى دى تكافئ فيها صاحب الموضوع وتخليه يكمل ويعمل مواضيع اكتر وفى نفس الوقت بكده مشاركاتك هتزيد ( ياريت تاخدوا بالكوا من الحكايه دى ... واى حاجة هنلاقيها زى دى هتحذف فى وقتها )


2- بنلاقى اعضاء تدخل ترد على اى موضوع وواحد رد قبله يقوم ناسخ الكلام اللى هو كاتبه بالظبط ويرد بنفس الرد ده وبرضه علشان يزود مشاركاته وفاكر انه كده بيشكر صاحب الموضوع ... طب وليه كده انت ياعنى هتتعب وصوابعك هتوجعك لو كتبت مشكور على الافاده مانت بتقضيها شات طول اليوم مع اصحابك ( ياريت ياجماعه تاخدوا بالكوا من الحته دى كمان لانك كده بتحسس صاحب الموضوع ان موضوعه مالوش لازمه وانت مش هامك فى حاجة واهو ناسخ رد اللى قبلك وخلاص )


3- برضه فيه بعض الناس موضوع الانجليزى والفرانكو عربى ده واخدهم شويه ... نلاقى بعض الناس تدخل ترد على الموضوع بالفرانكو ونجى نقولهم الفرانكو ممنوع يقولك ماحنا بنكتب فى اللعبه بيه طب ياسيدى ماهو فى اللعبه مافيش عربى انما انت هنا الحمد لله ربنا كارمك وتعرف تكتب عربى يبقى ليه بقى تعذب الناس معاك علشان يفضلوا يعذبوا نفسهم علشان يشوفوا انت كاتب ايه بالفرانكو وكمان معظم اللى انت كاتبه غلط .... وكمان موضوع الانجليزى ده والله الثقافه حلوه مافيهاش حاجة بس الكلام ده لما تكون اه بتعرف تكتب انجليزى انما مش يبقى تلت تربع الكلام اللى انت كاتبه غلط وخلاص الواحد شاف نفسه بقى استاذ انجليزى وهيروح يعطى دروس من بكره :o وكمان فيه ناس هنا ضعيفه شويه فى الانجليزى او مثلا واحد لسه فى الاعدادى ومش عارف انجليزى كويس يبقى حضرتك ليه تعذبه معاك وتكرهه فى اللغه بكلامك الغلط اللى انت كاتبه


ارجوا ان يكون كلامى مازعلش حد منى بس والله انا بقول كده لمصلحة الاعضاء اللى معانا هنا وزى مانتوا عارفين اننا هنا مش بنتعامل كمشرف وعضو لاء احنا هنا الحمد لله كلنا اخوات والحمد لله احنا نعتبر من الاقسام اللى مافيهاش مشاكل فياريت بقى تقدروا كده وتنتظموا علشان نخلى القسم ده احسن واحسن :) وياريت اللى عنده اقتراحات علشان يحسن بيها القسم يقول .... وسلامى للجميع ماعدا ( تامر :p )