ادخلوا بسرعة شوفوا النصب العلنى لشركة " العربية للشبكات Arabian Link" بالمنصورة

[X_HellCall_X]

السلام عليكم ورحمة الله وبركاته

فى الاول أحب أقول لا حول ولا قوة الا بالله فى الذى يستبيح اموال الناس بغير وجه حق ويستغل مركز قوته فى انه يقول للى مش عجبهم "اخبطوا دماغكوا فى الحيط"

الحكاية

ففى يوم 13/6/2009 قامت هذه الشركة بعمل اعلان مفاده أن من يقوم بالتعاقد على شهر " اشتراك انترنت" يحصل على شهر هدية مجانا.. وقد قمت فعلا فى نفس اليوم بالاشترك لمدة شهرين سرعة 256 ودفعت مبلغ 170 جنيه وايضا اشترتيت روتر بقيمة 110 جنية وكل ذلك فى سبيل اننى سأظل مشتركا لمدة 4 أشهر " شهرين اشتراك + شهرين مجانا "
وظلت الخدمة سارية على هذا النحو حتى يوم 1/8/2009 فتم رفع سرعتى الى 512 بناء على القرار الوزارى وهذا يعتبر أمر مشجع جدا لكل المصريين فى تحديث اشتراكاتهم وزيادة أعداد المستخدمين فى مصر والقضاء على ظاهرة "الوصلة".
فوجئت اليوم بانقطاع الخدمة 16/8/2009 فاتصلت بالشركة.. فتحججوا بان هذا العرض الجديد وهو "ضعف السرعة" يلغى جميع ما قبله من عروض "اشترك شهر+شهر مجانى" وبذلك ضاعت على باقى المدة..

المشكلة الحقيقية ان هناك الكثير من الاصدقاء اشتركوا لمدة 6 اشهر واخرون لمدة عام كامل فى سبيل انهم سيحصلون على ضعف المدة ودفعوا مبالغ تقارب الالف جنيه ... ولكن للأسف تقول الشركة لهم "العروض الجديدة تلغى باقى العروض"

فلا حول ولا قوة الا بالله العلى العظيم

بصوا بقا معايا ....

1- الشركة دى بالذات عاملة تعاقدت مع جميع شركات النت " تى اى داتا ولينك " على انها تصبح هى فقط المزود الوحيد للنت فى منطقتنا الريفية فى محافظة الدقهلية ( قرى ميت عنتر وشرنقاش والطويلة وكفر الطويلة وبطرة و.... ) محتكرة جميع الخدمات وبأسعار أغلى مما أعلنت عليه الدولة بخمسة او عشر جنيهات " على حسب شطارة المندوب وخيابة العميل" ... ولا توفر لنا الخطوط الـمحدودة مجبرة ايانا عند الاشتراك فقط الاشتراك فى الخطوط المفتوحة الذى لا يقل سعر ادنى فئه فيها عن 95 جنيه كما تعرفون....
2- العقد اللى بينى وبينهم لا ينص بأى حال من الاحوال على ما يدعونه من ان عرض يلغى عرض وهذا الكلام الفارغ ... وسئلتهم عن هذا الادعاء قالولى " هوه ده الكلام اللى ماشى فى كل حته " !!!!

لأ وبقى تعالوا شوفوا الحل اللى توصلت اليه معاهم " حاجه تضحك يا جدع "
وعلى رأى بووووحه " أى كلا بيتقال يا عم الحج"

1- الشركة هتتعطف وتتكرم على وتفتحلى خط 256 محدود " بما ان الشركة مش موفرا لمنطقتناا انترنت محدود" وانا اللى هذفه الاشتراك ايضا وهو 50 جنيه فى الشهر.
2- اشترك من جديد كأنك مشترك عادى خالص وانسى اللى فات

وانا بعت هذه الرسالة الى العاشرة مساءا ويرنامج 90 دقيقة والى جهاز حماية المستهلك والى الهيئة القومية لتنظيم الاتصالات ... جايز الاقى الرد

فانا كل اللى عايزة منكم هل فيه نصيحة ممكن حد يقدمهالى فى سبيل رجوع حقى وحق الناس

ويا جماعة ارجوكم عدم الوثوق فى هذه الشركة بتاتا لان تعاملهم فى اى مشكلة يتبع سياسة " هو ده اللى ماشى واخبط دماغك فى الحيط "

والله الواحد لو كان حتى فى اسرائيل كنت خدت حقى تالت ومتلت ومع اعتذار رسمى من الشركة كمان .... ولا حول ولا قوة الا بالله

والسلام عليكم ورحمة الله وبركاته