محضر غش!!!!!!

[محسن الكاشف]

محضر غش


قاعد فى أمان الله فى قلب اللجنة ولسه بنقول يافتاح ياعليم وبنفتح ورقة الاسئلة الاولى مش عارف فيها حاجة ابص حواليا واسأل : حد عارف حاجة ياجدعان ؟ طب حد معاه حاجة يطلعها طيب. وكان رد فعل اللجنة ليه هو مط شفاههم ببلاهة.
قولت خلاص اطلع انا بقى البرشام
لسة بفتح اول برشامة لقيت واحد بيخبط على ضهرى افتكرته اللى ورايا عايز حاجة لما لقى ان معايا برشام فقلت فى منتها البراءة : هانقلها وابقى اديهالك !!! وطبعا من غير ماأبص للى بيخبط اساسا
شوية ولاقيت الخبط زاد رحت قايله ياجدع اتقل خمسة شوية صبر ياعالم
شوية وحسيت افايا سخن طنشت. شوية ولقيته سخن اوى قلت ابص وياريتنى مابصيت انـــــــــه
الدكتـــــــور!!!!!!!!!!!!!!!!!!!!
طبعا مش عايز اقولكوا اللى حصل كل الحكاية :

سألنى الدكتور: ايه اللى فى ايدك ده ؟
رديت فى استعباط: مش عارف ايه اللى جاب ده فى ايدى؟ وبعين ايه دة اصلا ؟

رد عليا الدكتور : دة برشام !!!!!!!!!!!!!!!

رديت فى استعباط بارضو : برشام لاحول ولا قوة الا بالله .. هى وصلت لكدة
رد الدكتور : شفت بقى ؟
رديت فى براءة : طب ورينى كدة يادكتور .. اة والله فعلا دة برشام ..

قمت من مكانى وانا اسلم له ورقة الاجابة وقلت له : اتفضل ورقة الاجابة ... ولسه ماتحركتش من مكانى جالى ماسج على الموبايل وطبعا انتوا عارفين الصوت بيكون قد كدة لقيت الدكتور بيبصلى ويقولى وماسج كمان ورينى ياخويا كدة
رديت : لايادكتور دة ابويا باعتلى رسالة من السودان بيطمنى فيها على نفسه اصله بيشتغل هناك !!!!!
الدكتور : لامعلش وريهالى بس
الدكتور يقرأ الماسج : تعريف محاسبة البترول ..... اهمية دراسة الجدوى للمشاريع الاستثمارية ..... نطاق عمل البورصة المصرية الخ الخ الخ

قلت له : بص بقى انا ابويا عيان وامى مابتشتغلش واختى على وش جواز وانا اللى بصرف على البيت
الدكتور : انت مش قلتلى ابوك بيشتغل فى السودان ؟؟

قلت مكملا غير مبالى بمقاطعته : وعشان كدة ربنا يخليك سماح المرادى
الدكتور : انت مجنون يابنى انا اقل حاجة اعملهالك هى محضر غش ..

انا : ربنا يخليك يادكتور انا ابويا عيان بأنفلونزا خطيرة وبتهدد حياته , وانا لو سقطت البيت هايتخرب
الدكتور : خلاص بقى يابنى كفاية دة انت حالتك تقطع القلب .. ومد يده فى جيبه مخرجا خمسة جنيه واعطاها لى.. وقال: طب خد القريشين دول ..

انا وامثل ان الدمعه تكاد تفر من عينى : لا شكرا احنا صحيح فقرا بس مابنشحتش من حد يابيه انا بس كل اللى عايزه منك تسيبنى اكمل الامتحان ..

الدكتور : آه اوى اوى بس اجراء صغير كدة بس هاعمله فى ورقتك
وامسك بالبرشام ودبسه فى ورقتى واعطى الكراسة للمراقب وقاله اديله كارنيهه ومشيه !!

انا فى ازبهلال : ايه يادكتور انت مش مصدقنى ولا ايه طب اصرف على ابويا وامى منين دلوقتى انا
الدكتور : امك مين ياروح امك؟ .. بره ياحيوان ..
انا : طب هات الخمسه جنيه طيب !!!!
الدكتور : بره ياحيوان
انا : طب تصدق بقى انك دكتور جاهل والطلبة مابتفهمش من شرحك حاجة ..

الدكتور : آدى دقنى لو نجحت فى المادة دى طول مانا فى الكلية
انا والمراقبين يحاولون اخراجى من اللجنة : حسبى الله ونعم الوكيل , حسبى الله ونعم الوكيل , حسبى الله ونعم الوكيل
وكانت النهاية انى خرجت من الامتحان متوجها الى المنزل وطبعا لما ابويا عرف الموضوع لم يتوانى على الفور بأصدار فرمان بطردى من البيت ,,وطردنى وهو يقول : رايح تتخانقلى مع الدكتور يافاشل , طاب لايمها شوية واتخانق مع المعيد !!
.................................................. .............
وآدى كمان عمر جديد اتكتبلنا فى هذى الكلية لأ وايه على آخر سنة
.................................................. .............
لهواة الاستضافة : انا بايت فى الشارع كل يوم على ناصية الاجزخانة اللى على باب شارعنا
.................................................. ............
يعنى انا كدة ساقط ومطرود من البيت .... يعنى فاشل و حاليا صايع (موت وخراب ديار )

آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآآآآآآآآآآآآآآآآآآآآآآآآآآآآآآآة