أحداث مباراة المصرى والاهلى (شاهد عيان)

[Just_Warrior]

احنا كنا رايحين الماتش عادى خالص وكنا عرفيين ان هيحصل شغب بسبب الكلام اللى التراس الاهلى بيقولة و بردو مش هقولكم ان احنا ملايكة الجانبين فيهم متعصبين كتير
المهم لما رحنا الاستاد لقينا فى كذا اتوبيس موجودين من بدرى و افتكرناهم تبع الاهلى ولما شفنا مناظرهم (من الاخر كدا ناس جايا تقول شكل للبيع) وعمالين يسيحو و خلاص
قلنا نستنى لحد ما ندخل الاستاد عشان الحكومة برة الاستاد كانو كتير
المهم دخلنا الاستاد و بقدر قادر لقينا الناس دى بتقول مصرى مصرى
قلنا يلا زيادة الخير خيرين
اول جون جه فينا لقينا واحد فى مدرجات الاهلى رافع لوحة وكاتب عليها (بلد البالة مجبتش رجالة)تخيل دى بقى و احنا خسرانين يعنى موتا وخراب ديار
طبعا بقى المسخناتيا اشتغلو وبدأ الشتايم
ومما زاد الطين بلة ان مانول جوزية لما دخل فيهم الجون التانى قام باصص لجمهور المصرى وطلع فلوس وعمل بإيدة حركة كدا قال اية ياعنى ان الحكم مرتشى و ان احنا مقباضينة على اساس يعنى ان الجون اوف سايد
وعينك ما تشوف إلا الشماريخ و الصواريخ
المدرج اللى كنا فية كان فية شماريخ بس
المدرج اللى فى النص دا كان بيضرب صواريخ زى بتاعت الافراح وكانو برضو بيضربو على اللعيبة و جمهور الاهلى
لما لقينا الحكاية كدا قلنا نروح عندهم نشوف اية النظام
وطبعا زى ما انتم تابعتم ان مع كل جون للمصرى كان ينزل كام واحد كدا يسلمو على اللعيبة ويطلعو تانى
دول كانو بينزلو من المدرج اللى ورا حارس المرمى إكرامى
وجبنا الجون الثالث والناس كانت طايرة من الفرح و الناس كانو نازلين الملعب عشان يسلمو على اللعيبة و حسام حسن
اقسم بالله لقينا الناس اللى فى المدرج اللى فى النص نزلت الملعب وجرت ورا اللعيبة بتوع الاهلى
احنا قلنا عادى بتحصل كتييييييييييييييييييييييير وبيصلو لحد السور و بيرجعو تانى
و احنا رحنا نسلم على اللعيبة ونسلم على حسام حسن
ولقينا الناس اللى نزلت من مدرج نص الملعب طلعت تجرى ورا اللعيبة بس الامن وبعض الناس وقفوهم لحد ما اللعيبة خرجو بالسلامة لكن سيد عبد الحفيظ هوا اللى كان فى الاخر والناس اتلمت علية وكان هيموت ضرب لولا ستر ربنا وان حسام حسن كان واقف جمبة وحاش عنة الناس لحد ما خرجو
و انا افتكرت ان الموضوع كدا خلص
لكن لقيت الناس كلها بتجرى على جماهير الاهلى
وجماهير الاهلى فاكرين ان الامن هيقدر يدافع عنهم و فضل ناس منهم يشتمو و يسبو
لكن تأتى الرياح بما لا تشتهى السفن
الامن عمال يكلم الناس وبيمنعم بالكلام مش اكتر
وطبعا فى وسط الزيطة دى محدش هيسمع كلام حد
و اقسم بالله كان معظم اللى رايح هناك رايح يتفرج مش اكتر والناس دى كلها طالعين يجرو على باب تقريبا عرضة ميكملش متر
واللى كان بيقع مكنتش هتشوفو تانى
ولقيت اسلحة بتطلع ودم واسعاف عمال يشيل فى ناس
وحسيت ان الحرب قامت
كإن المصريين بيضربو فى اليهود
ناس كتير اتجمعت و حاولنا نفصل مابين الناس اللى بتضرب و مابين جمهور الاهلى
و اقسم بالله لولا ستر ربنا وجماهير المصرى (مش كلهم طبعا لان كان فى ناس بردو بتضرب)مكنش هيبقى فى 74 حالة وفاة دا كان ممكن يعدو ال150 واحد والله
لحد ما الجيش وصل و الناس طلعت تجرى برة الاستاد
و الناس بقت تمسك اى حد معاه سلاح و تسلمة للامن
لحد لما الامور هدت
رحت عشان اتجمع تانى انا وبقيت صحابى لقينا اتنين راحو المستشفى
واحد 10غرز فى دماغو
والتانى كان فى غيبوبة لسة فايق منها النهاردة الصبح وعندة رجل مكسورة
__________________________________________________ ________________________
ارجو من الله ان الناس تفهم ومتخدش اهالى بورسعيد بذنب المتخلفين الاغبية دول