فاشل يافاشل..هل معنى انى فشلت مرة ايأس من حياتى؟؟؟ ‏

[kingoffruits]

الحلقة الأولى ..

بدأ حياته زي أى شخص عادي
دخل الجامعة .. حاجة جديدة عليه ذاكر شوية .. بس قصر شويتين
جاء وقت الامتحان .. امتحن .. النتيجة ظهرت
راااسب !!!
الأم: تولول أصل انت فاشل .. الاب :ياريتني ما صرفت عليك .. حرام عليك اللى بتعملوا فينا ده؟!
الشاب : قمة الخنقة .. خرج وترك والديه .. يسهر مع اصدقاءه للتغلب على الحزن القاتل جواه
ارتسمت في ذاكرته كلمة (( فاشل )) وسيطرت عليه تماماً

ثم ماذا ؟؟
السنة اللى بعدها .. ناجح بالعافية اللى هي اعادة سنة أولى
السنة اللي بعدها دبلر (عادها تانى)
مبيحضرش محاضرات !
مذاكرة خلاص .. بح
والديه .. لم يضعون أملاً ولو واحد في ال100 انه يتفوق مرة تانية
بعد ما دخل كلية الهندسة او الطب بمجموع كبير !!

وبعدين ؟؟
إنت فرحان بنفسك كدة ؟
مرتاح في حياتك كدة ؟؟
دي نهاية الدنيا بالنسبة لك ؟؟

تعالوا نفكر بالعقل ..
مش ممكن يكون التقصير من عندك انت ؟؟
طب لو انا شايف انى ذاكرت ودخلت الامتحان ونسيت ..
نقف هنا ؟!!!
هو ده مش بتدبير من ربنا ؟؟
فكرت قبل كدة ان في حكمة من رسوبك او من انك تجيب مجموع قليل ؟

للأسف كلنا بنحسب انها النهاية ....
ولكنها البداية
...
نعم والله انها البداية
بداية إيه ؟؟ .. بداية طريق الفشل ؟؟
لااااا
دي بداية التفوق والتميز
هي ايه انى افشل في الأول ؟
هقولك مش عيب الفشل خصوصا اول مرة ..
بس الفشل الحقيقي هو الإستسلام ..

ركزوا معايا ..
حساباتنا بتختلف تماما عن حسابات ربنا جل وعلا لينا
إنت شايف انك لما حصل لك كذا وكذا .. ده شئ مفزع وشر كبيير ليك
والله لعله خير ..

اذكر لكم تجربتي في الثانوية العامة ..

في المرحلة الأولى .. كان مجموعى في الثمانينات بالنسبة لهدفي وطموحى .. ولا حاجة ؟!!!
لم استسلم .. فكرت انه تدبير من ربنا .. فكرت ان اكيد ده الخير ليا .. فكرت وقلت ربنا مستحييييل يضيعني
اجتهدت وزي ما بيقولوا عملت اللى عليا
بفضل الله جبت حوالى 95%
كان أمامي أن أدخل كلية كويسة جدا علمية لكن فضلت ان ابقى هنا حتى لا اسافر دون محرم
فكرت كثيرا وقلت أنا تعبت وعاوزة أوصل .. هسافر .. ولكن توقفني نفسي .. لاااا ..ربنا مش هيوفقك

والحمد لله (( وعسى أن تكرهوا شيئاً وهو خير لكم ))
ربنا وفقنى في الكلية و ليا ترتيب على قسمي ..

نتعلم من اللى فات 3 حاجات أساسية ..
1/ الفشل بداية طريق النجاح اذا حاولت بعده الإصلاح الجاد
2/ الفشل الحقيقى انك تستسلم لعدم نجاحك في التجربة الأولى
3/ خلى عندك يقين كبيييير في الله أنه لن يضيعك واسعى واجتهد

ألقاكم في الحلقة القادمة ..