بِخصوص الـ Free P.lvl

[Al.Qanas]

السلام عليكم ورحمة الله وبركاتة
ازيكم يا جماعة واية اخباركم :) ..

النهاردة فيه موضوع ضايقنى اوى وحبيت احطه هنا علشان كله يبقى عارفة وفاهم اية اللى بيحصل بالظبط .
من كام يوم انا اشتريت حاجات كتير استونات وكلام فاضى من دة لحد ما الجولد بتاعى خلص وتقريبا مبقاش معايا غير 3 مليون اجيب بيهم HP و MP وشوية ايتمات مش عارف ابيعها لسه .
قولت هعمل تاكسى اجمع شوية جولد للأكونت وكدة . روحت عملت تاكسى Cave
بدون مبالغه بعد ربع ساعة بالظبط كان التاكسى اتقلب Free P.lvl معدا واحد تركى بس اللى مش بيدفع . وفضلت على كدة طول الليل .

وكل اللى يقرا الاسم ويعرف انى مصرى حتى لو هو مش عارفنى تلاقية عمال يقولى ازيك وبتاع ولو سمحت لفلنى فرى . طيب انا هلفل كام الف مصرى يعنى ف اللعبة وانا هلعب امتى وازاى ؟؟؟

لكن كل واحد بيفكر ف نفسة وخلاص . وواحد تانى يكون اصلا بايعنى من قبل كدة وخارج من الجيلد بتاعى ومن غير ما يدينى فكرة ومنفضلى ع الاخر واول ما يشوف التاكسى تلاقية جاى بيكلمك وبيقولك لفلنى فرى والنبى . مع انه كان ف الجيلد قبل كدة وبياخد فرى p.lvl . طيب بأى حق بتطلبه دلوقتى ؟

الصبح النهاردة بعد الابديت قولت هعمل تاكسى تانى ف الـ Karra علشان اجيب جولد بردو .
اى مصرى بيشوف اسمى يروح داخل ويقولى فرى بليز
وناس من الجيلد بتاعى انا قولتلهم لاء مش دلوقتى لان فعلا انا لو فضلت بالشكل دة عمرى ما هعمل تاكسى ف حياتى .
انا الناس اللى تعرفى ف اللعبة يمكن اكتر المصريين يعرفونى وناس كتير ومجرد انى اعمل تاكسى بلاقى اكتر من 20 واحد عايزين يدخلوا مش 8 بس .

واللى اقوله يا معلم مش هينفع دلوقتى علشان انا بجمع جولد لانى مفلس دلوقتى الاقية يقولى بليز ومعلش وبتاع
المفروض انه يقولى بليز دى لما اقوله مش هينفع وخلاص لكن انا بقولك انا مش معايا جولد .
ادينى مساحتى بقى اجمع فيها اللى انا عايزة بعدين نشوف نعمل تاكسى فرى ياعم .
و ف الاخر يزعل ومنهم اللى خرج من الجيلد .
مع انى ملفلهم كتير فرى قبل كدة . جه على المرة دى ويروح خارج من الجيلد
انا زعلان على الحركة دى بس فرحان انى بعرف الناس على اصلها وانه عارفك مصلحه مش اكتر .

وناس كتير ف اللعبة مش تعرفى غير مصلحه ومنهم ناس هنا ف المنتدى كمان لدرجة انهم مش عارفين اسمى اصلا واسمنا صحاب يعنى ولفلنى فرى يا صاحبى وكلام من دة
دة كل اللى بيعرفنى علشانه .

على العموم من النهاردة انا مش هعمل اى Free P.lvl غير لأصحابى اللى هما اصحابى بجد
والناس اللى ف الجيلد عندى . ومش طول الوقت
يعنى هيبقى فيه وقت معين للفرى ووقت تانى لو انا حبيت اجمع جولد ليا زى ما كان بيحصل النهاردة كدة .

انا سبقت اى حد وقولت احط الموضوع هنا
الموضوع دة اتحط ردا على اى واحد بيفكر يقول انى مش بساعد حد او انى مش تمام معاه .
علشان تبقوا عارفين اية بيحصل ف اللعبة وكل واحد ماشى ازاى .

موضوع تانى بيحصل بردو .
واحد يبقى جاى يدخل التاكسى يقولى معلش يا مان انا مش معايا غير 900 الف وبليز وكلام من دة . والتاكسى بيكون مثلا بمليون . اقوله اوكى مفيش مشاكل
يدخل ياخد ساعة وبعدين الاقية بيقولى كمان ساعة ^^ دة اقوله اية ؟؟؟؟؟
ودى اتكررت معايا كتير اوى اوى اوى كمان.

وناس تانية تقولى نفس الكلمة . بردو يقولى بليز يا مان وانا كل اللى معايا 800 الف والله ويقعد يحلف وكلام من دة . واول ما اقوله اوكى بردو . ياخد معايا ساعة . وتلاقية دخل ع التاكسى اللى جمبى بالظبط طول الليل ب 6 مليون ^^ .
حتى مفيش امانه ف اللعب ومش مقدر انى راضى انى ادخله ومش كسفتة ولا قولتله مش هينفع وبيحور عليا علشان يدخل بجولد اقل .

ودة سبب بردو انى بعد كدة اى واحد هيدخل التاكسى معايا بعد كدة مش هقبل بأقل من السعر اللى موجود ف البارتى ماتش.

ناس كتير حضرت معايا المواقف دى وقدام عنيهم حصل الكلام دة وانا خليتهم ياخدوا بالهم من اللى بيحصل علشان وقت ما اجى اتكلم قدامهم يبقى بحق . وشهدتهم على ناس كتير بتعمل كدة وبتحور عليا وانا ساكت وعامل نفسى مش حاسس !
ياريت لو حد شايف ان كلامى غلط لو عارف حاجة عن كدة يبقى يتكلم .

اسف يا جماعة الناس دى اضطترنى لكدة والا هكون ساذج لو فضلت اعامل الناس دى زى ما كنت بعاملهم قبل كدة .

ياريت اى واحد قرا الكلام دة مش ياخدة على نفسه لان الناس اللى عملوا كدة كتير مش واحد معين انا داخل اتكلم عليه يعنى
وياريت لو حد عارف نفسه انه عارفنى مصلحه ياريت يبطل يكلمنى ويشيلنى من دماغة لانه مش هياخد منى حاجة .

وياريت كل واحد يفكر يتعمد على نفسه هيبقى احسن لان دة اساس اللعبه مش انك تدخل تاكسى وتلفل وانت مش فاهم اية دة ولا معاك 1 جولد حتى .

مش عايز اطول عليكم
مات الكلام :)

وسلام