رحلة مع واحد من بتوع احنا اسفين ياريس !!

[SmartMad]

تم خلع مبارك ..





حيدخل واحد يقولي : لا محصلش هو تنحي بنفسه عشان ينقذ شعبه !!


حقوله: ازاي وهو قبلها بساعات كان قايل خطبه صمم فيها علي البقاء وتصحيح الاوضاع ؟؟


ليه مظهرش بنفسه واعلن التنحي بنفسه ؟؟






حتقولي لا تنحي ..


حقولك تعالا انا عرفتك ..


انت عمرو من بتوع احنا اسفين ياريس صح ؟؟






حترد وتقولي ايوه صح وليا الشرف !! مبارك رمز لينا كلنا ولشعبنا ولتاريخنا ازاي نهين الرمز ؟؟


حقولك : بص يا سيدي فاضي معايا نتمشي لمده ربع ساعه ؟


حتقولي : اه فاضي حنروح فين ؟


حقولك : هات ايدك وتعالا معايا ..






بص يا سيدي احنا هنا في الدويقه وزي مانت شايف اهلها ناس غلابه شعبيين جدا وعلي قد حالهم ..






جري علينا عيل صغير ومسك في عمرو وقاله هات ربع جنيه ياعمو !!


طلع عمرو بتاع احنا اسفين ياريس جنيه وعطهولوا فجري الولد فرحان علي بيتهم قدام عنينا ..





فجأه انهارت الصخور فوق المنازل وسحقتها بالكامل وسحقت الطفل تحتها ..


عمرو قالي وهو مذهول : ايه ده هو الصخور وقعت تاني ؟


ابتسمت وقولتله : دي الوقعه الاولي بس انت نسيتها وانا رجعتك لزمنها عشان تفتكرها !!






وسط الصراخ الرهيب والاتربه الكثيفه مشينا وانا بقوله : حكومه مبارك تجاهلت المكان ده تماما رغم انه شرق العاصمه .. حتي


المرافق الاهالي هما اللي عملوها بجهودهم الذاتيه ..





ولما وصل دعم الماني لتسكينهم في مساكن شعبيه تم نهب الدعم بالكامل من الفاسدين في حكومه مبارك ..


قالي عمرو وهو بيرتجف : وكام واحد مات في الحادث ده ؟






قولتله بأبتسامه بسيطه : اكتر من 80 قتيل و 50 مصاب .. بعد ايام حتفوح رائحه الموتي ومنهم رائحه الطفل اللي عطيتوا الجنيه ..


وحتسمع تصريحات حكوميه مخذله ..انهم يعملوا المكان مقبره جماعيه .. بسبب انهم مكسلين او عاجزين علي رفع الانقاض ..


ومش طايقين الريحه ..






المهم هات ايدك وتعالا معايا ..


وقفنا في محطه قطار العياط ومعانا خال عمرو ..





كان عمرو مستغرب خاله حيركب القطر ويروح الصعيد ليه ؟؟


بس خاله مقالوش ووصل القطر المتهالك وركب الخال وشاور لعمرو من القطر وهو بيتحرك ..






طلع القطر من المحطه وركبنا مواصلات وفي السكه لقينا الزحام بعد المحطه ب 5 دقايق ..


القطار عرباته متفحمه وخصوصا العربه اللي ركبها خال عمرو ..


قربنا انا وعمرو وهو بيعيط وماسك صدره ومش مصدق ..


كان خال عمرو مطلع رقبته من الشباك بيحاول يهرب بس النار فحمته ..





قولت لعمرو : فساد فساد في كل مكان .. قطارات فاسدة وتأمينها ملهوش وجود من الاساس ..


المهم الناس تدفع تذاكر وتنحشر وخلاص لكن ندفع جنيه في تصليح كرسي او نحط طفايه ؟


مستحيل ..





قال عمرو : هو ده قطار الصعيد ؟؟


قولتله : ايوه هو القطار رقم 832 والمشهور بقطار الصعيد .. ومات فيه يا عمرو اكتر من 360 شخص محترقين او غارقين في ترعه


الابراهيميه بعد مرموا نفسهم من الابواب والشبابيك ..





وطبعا موقف الحكومه كان متخاذل وفضيحه تعويض الضحايا كانت كبيره جدا


لدرجه ان الدول العربيه والاجنبيه كانت بتسخر من مصر اللي ولادها دمهم رخيص بالشكل ده ..
وللاسف متعلمناش ولا صححنا مشاكلنا لانه بعدها حصلت كارثه تانيه مشابهه






تعالا يا عمرو معايا مشوارنا طويل ..



تعالا ياعم اركب معايا المركب ده افرجك علي مشاهد بحريه ممتعه ..







شايف جمال البحر الاحمر والشعب المرجانيه والاسماك ..






مصر بلدنا جميله اوي ياعمرو وشعبنا محروم منها ..


شايف السفن والعبارات ..






الجو بارد بس انا قولتلك تتقل قبل ماتيجي ..


شايف العباره اللي هناك دي منظرها جميل صح ؟





شايف الدخان اللي طالع منها ؟ ده مش دخان المحرك ولا دخان مطعم العباره .. دي حريقه ياسيدي ..


عمرو قالي : انهي عباره سالم اكسبريس ولا السلام ؟


قولتله : لا دي السلام 98 .. سالم اكسبريس مات فيها 464 شخص وكان الاهمال رهيب في الانقاذ لدرجه ان واحد من الناجين






سبح لمده 35 ساعه كامله وانقذ نفسه من غير ميقابله اي وحده انقاذ ولا اي شئ ..





وفوق كل ده الحكومه لم تهتم بمحاسبه


المقصريين في الحادث واهتمت فقط بأن اصحاب السفينه يدفعوا تعويضات 50 الف جنيه للضحيه الواحده .. وكأن ارواح الناس تباع


وتشتري ..


في اللحظات دي كانت العبارة السلام تغرق امامنا والناس تقفز منها وصراخ النساء والاطفال بتصم اذاننا ..


ووسط كل ده لمحنا القبطان يهرب


في مركب تتسع ل 30 شخص هو وعدد بسيط من معاونيه ..


انهارت السفينه بالكامل بركابها وشاهدنا حولنا مراكب صغيره يتشابك فوقها عدد كبير من الناس وعدد اخر يريد ان يصعد فتنقلب


المركب فوق رؤسهم ..





شاهدنا ام ورضيعها تبكي وتحتضن رضيعها فوق احد المراكب الصغيره وسط طوفان من البشر كلهم عاوزين النجاه وسط مياه درجه


برودتها رهيبه ..



وتنقلب المركب وتختفي الام برضيعها وسط المياة ليركب غيرهم ..







طفل صغير يحمله رجل لا يعرف العوم ويصرخ الرجل وهو بيبحث عن زوجته ويقع منه الطفل وسط المياه ويغرق وينزل الراجل


ويغرق وراه ..





كان عمرو بيبكي بحرقه وانا براقب انفعالاته ..


احنا اسفين ياريس بنحس انهم مش بني ادمين زينا وانهم وحوش مش بتشعر .. بس عمرو بيبكي وعواطفه جياشه فعلا ..


بعد لحظات اختفت المياه تحت الجثث الطافيه وقالي عمرو : كام واحد مات ؟


قولتله : مات فيها اكتر من الف شخص يعني رقم قريب جدا من عدد ضحايا تايتانيك .. مع الفرق طبعا .. تايتانيك عملوا ليها افلام


ومسلسلات وكرتون ووثائقيات .. احنا ولادنا سعرهم رخيص مالك السفينه ممدوح اسماعيل تم تهريبه للندن لانه كان من عتاوله


الفساد في البلد ..





وكان عضو مجلس شوري وقريب من الحاكم واسرته .. وبعد عامين من المداولات في المحاكم وفي جلسه مدتها ربع ساعه تم


اعلان براءته هو وابنه بكل هدوء وطظ في الشعب واهل الضحايا ..






عمرو : مش ممكن يكون مظلوم ؟ ثم مال الدوله بالموضوع اصلا ؟


قولتله : تم اكتشاف وقتها ان الفساد في التفتيش عن السفن وتأمينها كان مستشري في كل السفن ..





بالاضافه لأن عمليات الانقاذ اتأخرت كالعاده وناس بالمئات اكلها سمك القرش بسبب بطء عمليات الانقاذ دائما ..






تعالا ياعمرو نكمل مشوارنا ..


وصلنا للشط بالمركب بس ده مش شط البحر الاحمر ده شاطئ امريكي .. متقوليش وصلنا ازاي هناك اتفرج وانت ساكت ..


شايف الطيارة الكبيره اللي فوق دي .. اه دي اللي بتقع دي ايوه ..





دي ياسيدي الطائره 990 تبع مصر للطيران .. وكان عليها 217 شخص قتلوا بالكامل في الحادث اللي انت شايفوا قدامك ..


فيهم علماء ذره وفيهم وفد عسكري كبير ..


كلهم ماتوا ومصر سابت التحقيق كله في ايد الامريكان بما فيه الصندوق الاسود اللي مستلمتهوش مصر ..


خرج علينا تقرير يقولنا ان الكابتن انتحر وموت الناس معاه .. وشكرا ..


كل النظريات بتقول ان الامريكان ضربوا الطائره ..






كل الادله المنطقيه بتقول كده .. وفجأه اعلنت مصر اغلاق التحقيقات .. وشكرا


وراح دم المصريين هباء ..




تعالا ياعمرو نروح السوق ..


عاوز ازور والدك واقعد معاه شويه .. حشتري فاكهه لاني مش بدخل فاضي ..







قعدنا مع والدك واتكلمنا معاه لمده ساعه في السياسه والبلد ووالدك شخص محترم فاهم وواعي ..


واحنا قاعدين اكلت انت وهو من الفاكهه اللي جبتها من السوق ..


تعمل ايه لو قولتلك ان ابوك حيموت بعد سنتين بعد معاناه مع مرض السرطان بسبب اللي الفاكهه اللي اكلها؟






تعمل ايه لو عرفت انك بدأت مرحله من مراحل الفشل الكلوي بسبب اللي انت اكلته ده وحتكمل حياتك بتغسل كلي ؟





حتصرخ في وشي وتقولي : انت كذاب انت اتجننت ؟ ازاي ؟


حقولك : كل اللي انتم اكلتوه ده مسرطن بالكامل وتحت سمع وموافقه يوسف والي وان النظام كله عارف انه بيستعمل مبيدات


ممنوعه دوليا ..
وان نص الشعب المصري بقي مريض بأمراض خطيرة ..





وبعد كل ده حيتم تعينه نائب مبارك في الحزب الوطني الديمقراطي ..


حتقولي : وسيبتني اكل من الفاكهه دي ..


قولتلك : مشكلتكم انك مثاليين اوي ومش بتحسوا بعذاب غيركم .. اخدين الامور كلها كأن الحكام فوق الشبهات وفوق اي بشر


لازم تجرب وتحس من اللي عاناه غيرك من اللي فقدوا ابوهم وامهم واخواتهم





بسبب عصابه بيزنس كانت بتحكمنا ..


تعالا معايا اتفرج علي شوارع العشوائيات ..








وتعالا اتفرج علي حوادث الطرق في كل مكان ومفيش اي تعويض لاي ضحيه ..






تعالا وشوف بعنيك الهيئات الحكومية كلها ازاي بتتعامل مع المواطنين بطريقه غير ادميه ..





وازاي النظام قلل مرتباتهم لدفعهم للفساد لكي يعيشوا وعشان تدفع الاكراميه عشان تخلص امورك عافيه او ذوق ..


شوف الشرطه اللي الغت شعار الشرطه في خدمه الشعب واعلنت شعار الشرطه والشعب في خدمه الوطن ..





والوطن اللي اعلنت ولائها له هو النظام وبقاء النظام وبس ..


تعالا وشوف التعذيب في الاقسام ..





وسمعه امن الدولة اللي اذلت الشعب سواء كان المذلول شخص صالح او مجرم ..


حتي شرطه المستشفيات الحكوميه بقت بيزنس لابتزاز المواطنين في مصائبهم وحوادثهم ..


تعالا شوف طوابير العجائز الطويله في التأمين الصحي واسلوب التعامل معهم بالالفاظ القذرة كأنهم بيتسولوا ..






شغل التليفزيون واسمع تفخيم الرئيس طوال الوقت وبرامج لغسل دماغ الناس ..





امسك الجرائد الحكوميه واستحمل الاستفزاز في الكلام عن حكمه قائد سفينه الوطن ..


كان عندنا قطاعات ومصانع كبيرة بتجيب للدولة اموال طائله ..


اتباعت كلها واتخصخصت للاسف ..





وبأسعار ان دلت علي شئ فتدل علي فساد رهيب ..


تعالا شوف العمال والضرائب الباهظه عليهم في كل شئ ..


وتدمير مستقبلهم بقوانين غير ادميه تمارسها عليهم الشركات الاستثمارية ..





ولا الضريبه العقارية كأننا مأجرين منهم املاكنا ..







متنساش فساد التعليم وفساد المناهج والمعلمين واعطائهم اجور ضعيفه لدفعهم للدروس الخصوصيه ..





ولأخراجهم اجيال فاشلة لا تعرف اي شئ سوي انها تريد النجاح وبس بأي وسيله ..


تعالا وشوف الملايين اللي بتطلع يوميا من قناه السويس متعرفش بتروح فين ابدا ..






وتعالا شوف الناس اللي مش لاقيه ثمن الدواء او العلاج علي نفقه الدوله في وقت الوزراء بيتمتعوا بالرفاهيه ويعالجوا اذانهم في


الخارج ..






تعالا شوف الاراضي الشاسعه اللي كانت بتتعطي اكراميات بين الوزراء وبعضهم ..





وشوف اراضي توشكا اللي اتباعت برخص التراب ..


تعالا شوف اراضي سيناء ازاي اخدها مجموعه من رجال الاعمال وازاي اليهود بيستمتعوا بيها والشعب المطحون محروم من كل


شئ ..





تعالا شوف اهل الصعيد ومطروح وسيناء اللي بيشعروا كأنهم مصريين درجه تانيه بسبب التهميش ..






تعالا شوف سياسه اهمال اضاعت علينا علاقتنا مع دول حوض النيل وكانت حتدخلنا معاه في حروب ..





تعالا شوف اخوتنا المسلمين في غزة ازاي كانوا متحاصرين وبيتقتلوا يوميا والمعبر مغلق بتعليمات صارمه من اليهود والامريكان ...
وجدار العزل العنصري اللي اتبني بمواد مصريه ..
والجدار الفولاذي المصري علي الحدود لسد سبل حياه اخوتنا واهلنا في غزة ..





التاريخ واحفادنا حيذكرونا دايما بالعار بسبب اللي حصل مننا تجاه اخواتنا هناك ..




ومبارك مفيش قدامه غير التنفيذ عشان ماسكين عليه فضائح وكوارث وادله فساد هو في غني عن كشفها ..


تعالا اتفرج علي مني الشربيني هي وغيرها من ابناء مصر اتقتلوا اسوء قتله .. طوال عهده ومقدرناش نعمل استنكار واحد يحافظ علي اي شئ من كرامتنا المهانه ..





تعالا اتفرج علي المسؤولين الصالحين المحبوبين من الشعب اللي كان بيفصلهم من مكانهم لمجرد نبوغهم ..
وتشويه سمعه وتاريخ اي شخص عشان ميبقاش في مصر كلها
الا رمز واحد هو مبارك وبس ..



شايف المرتبات كام ؟ وسعر اللحمه كام ؟؟


شايف احمد عز واحتكارة للحديد المصري وتقربه الشديد من النظام رغم كراهيه الشعب له ؟





تعالا شوف انقطاع الكهرباء علي الناس بالساعات ساعه افطارهم في رمضان والتصريحات الكوميديه للنظام ..





تعالا افرجك علي افلام اجنبيه قديمه كان ابطالها بيفتخروا انهم لابسين قميص مصنوع من القطن المصري .. دلوقتي فين القطن


المصري ؟؟ كله راح ..

ياتري يا عمرو حد مات من قرايبك في طابور عيش ؟




او طابور انابيب البوتجاز .. ؟؟



في وقت بنصدر فيه كنزنا الوطني الغاز المصري للاسرائيليين بسعر

التكلفه عشان ياخد النظام عموله كبيره يبعتها علي البنك..

فاكر لما اتزنقوا في تشريعات راحوا عدلوا الدستور غصب عن الشعب كله ؟؟



دخلت مسشفيات قبل كده واتسرقت اعضائك وملقتش حد يجيبلك حقك ؟؟



حاولت تروح يا عمرو تنتخب ووقفك بلطجيه الحزب علي باب اللجنه يشوفوك داخل تنتخب مين ؟


كام مره تلاقي واحد فاز في الانتخابات بأكتساح ومحدش رشحه اصلا ؟؟

مسمعتش اعترافات اعضاء الحزب بنفسهم وهما بيقولوا ان الصناديق كانت بتجيلهم وهما يملوها ؟؟
[YOUTUBE]V77wERAHpcw[/YOUTUBE]





ياتري عارف ان قانون للمرور هدفه جمع الاموال من المواطنين بأي طريقه ؟؟


نسيت القنوات الدينيه اللي تم طردها من النيل سات بكل جبروت الدنيا ؟؟

وتركولنا قنوات الهلس والرقص ..



تعالا افرجك علي شباب مؤهلات عاليه بالمئات بيسافر يوميا ويرمي نفسه في البحر ويغرق بهدف الهجره من بلد مفيهاش وظائف

ولا احترام وتقدير لأبنائها ..




تعالا وشوف خط الفقر اللي نزل فيه اكتر من 40 % من الشعب ..

وشوف الفساد اللي غرق فيه ناس كتير عشان يعرفوا يأكلوا عيالهم ..






شايف خالد سعيد واللي حصله ؟



كام خالد سعيد مات قبله ومحدش حس بيه ؟

كنت عاوز كام خالد سعيد عشان تفوق وتحس انك مخدوع وان في بلدك ناس حرموك من الامان ..

كام سيد بلال اتقتل من امن الدولة وتم تهديد اهله وارهابهم ؟؟

كام واحد محترم هددوه واخدوا مراته في الحجز مع المخبريين بغرض الاعتداء عليها لو اتكلم ..



كام واحد جابوا امه واخته ونوموهم علي البلاط في الحجز عشان يسلم نفسه في تهمه ممكن يكون برئ فيها ..

فاكر وقفه مبارك قدام الشعب وفتحه لقناه السويس امام الاسطول الامريكي اللي رايح يضرب العراق ؟؟



احترم قوانين قناه السويس ومحترمش قوانين الانسانيه وقوانين دينه وقوانين العروبه والكرامه ..

تعالا وشوف يافطات جمال مبارك في كل الشوارع والتمهيد لتوليه المنصب بعده ..






تعالا وشوف سكان المقابر وازاي عايشين وياتري تقبل تعيش كده في بلدك وانت شايف الاراضي بالالاف في ايد الفاسدين اللي

كل واحد معاه خمس فيلات علي الاقل ..




تعالا شوف اطفال الشوارع و الناس اللي بتاكل من الزبالة وبنشوفهم يوميا ..





تعالا شوف اسعار اي شئ بيلعب بيها التجار بلا رقيب ولا حاكم ..



تعالا شوف مياه المجاري اللي بيتسقي بيها المزروعات ..

ومياه المجاري اللي بنشربها في الحنفيات ..




تيجي افرجك علي اراضي الجولف اللي بتتسقي بمياه النيل النقيه ؟



تعالا وشوف اي منشأه او حديقه عامه وهي مفيهاش اي تصليحات او تحسينات من اكتر من 15 سنه ..

حتي فلوس المعاشات مترحمتش من بطشهم ..



تعالا افرجك علي فضيحه كنيسه القديسين اللي فجروها عشان يشتتونا عن الانتخابات المزوره ..



وفلوس مكتبه الاسكندريه اللي ثبت انهم كانوا بيسرقوها ..

و30 سنه طوارئ وبطش وجبروت ياعمرو ..

ممكن تكون انت مجربتش بس غيرك كتير عرف يعني ايه طوارئ ..


تعالا شوف بلد فيه بحرين ونهر زينا وبلا ثروه سمكية ..



تعالا وشوف النابغيين وازاي بتتعامل معاهم الحكومه بأستهزاء ودفعهم للسفر وعمل بحوثهم العلميه في دول اخري ..

تعالا وشوف الجامعات المصرية وهي لا ترقي لأي مكانه عالميه ..

وشوف القضاه وهما بيتسحلوا في الشوارع عشان بيطالبوا بحقوقهم ..



تعالا وشوف اخواتنا علي الحدود وهما بيتقتلوا علي ايد اليهود



وللاسف مفيش كرامه للوطن واولاده لان الحاكم مذلول امام

الصهاينه وميقدرش يفتح بقه عشان ميتغضبش عليه ويكشفوا ورقه من الاوراق اللي تفضحه في ويكيليكس مثلا ..



تعالا وشوف وقف التحقيق في قضيه قتل الاسري المصريين 1967 وانت تفهم يعني ايه ذل ..





وشوف ابطال الشعب الحقيقين مش بيتكرموا واغلبهم بلا معاش وهو بيتكرم كل سنه علي انه بطل اكتوبر اللي راح حرر سينا ورجع لوحده ..


تعالا وشوف جمعه الشوان او احمد الهوان البطل قاهر الموساد وهو طالع
في التليفزيون بيتذلل عشان يعملولوا عمليه قلب قبل الثورة بأيام ..
[YOUTUBE]X2PwQV8nY2c[/YOUTUBE]






وازاي استجابوا وقتها بعد الفضيحه علي الفضائيات .. واستهجان الناس والعالم ..

تعالا وشوف الاحصائيات وهي بتعتبر وطنك دولة فاشلة ..

وشعبك شعب جاهل مضحوك عليه حتي في الصور الرسمية ...

تعالا شوف ايام الثورة وتجاهله لطلبات الشباب وقطع الاتصالات والانترنت عن الشعب وفتح السجون وتهريب المجرمين ..



تعالا شوف القناصه اللي قتلوا المتظاهريين وشوف الضحايا المدهوسه تحت المدرعات ..


ايه رأيك يا عمرو .. ؟؟ انا مش عاوزك تغير رأيك .. ومش عاوز اقنعك .. انا حبيت افرجك جزء من الوضع بس ..

تعالا ياعمرو افرجك علي ثوار القذافي عملوا فيه ايه ..



وتعالا شوف اخواتك في الثوار في مصر ازاي هما فعلا يستاهلوا كل خير ..





وازاي ثورتهم كانت ثورة بيضاء نظيفه ..

صحيح انها مكتملتش بس ربنا حيكملها علي خير ان شاء الله ..

ياعمرو فكر في نفسك وفكر في بلدك وازاي يبقي احسن ..

ومتفكرش في اي عميل خاين لو كنت وقعت انت في ايده كان داس عليك من غير اي رحمه ..



عميل بسبب فساده المستمر قدر اعدائنا يذلوه ويبتزوه عشان ينفذ مخطاتهم والمقابل بقائه في السلطه ..

عميل غسل عقولنا زمان بأغاني التمجيد فيه اخترناك واحنا فداك وغيره وغيره وغيره ..



اغاني سمعناها واتربينا عليها وكلها تمجيد ليه كأنه هو مصر ..

كام مره مشيت في الشارع ولقيت يافطه ( مصر مبارك ) ..




والاعلام المضلل طول الوقت يحسسنا انه طوق النجاه للشعب الغرقان ..

انا قبل مبارك كنت بكره مصر من كل قلبي لاني كنت واعي وفاهم وحاسس بجراح الناس كلها ..

حتي ولو الظروف كانت بتبعدني عن المأسي اللي الشعب شافها ..

الثورة المصرية كانت لازم تحصل يا عمرو ولو محصلتش كنا حنفضل نسمع كل يوم عن الناس اللي بتنتحر ..





والمصائب والحرائق وجرائم القتل البشعه اللي بلبسوها دايما لشخص مختل !!

ونصحي نلاقي جمال مبارك رئيس علينا ..

ونكمل معاه 30 سنه تانيه من العذاب والمرض بمنهج وضعه اعدائنا لجمال عشان يضمنوله بقائه في السلطه ..




بلاش تتأسف وتهين نفسك اكتر من كده ..

اسفك مش حيعمل حاجه غير انه حيزعلني ان اخويا لسه عايش في الماضي ..

وبيسمع اخترناك اخترناك ..

[°•.♥ H3ll King ♥.•°]

ههههههههههههه عارف بعد كل ده

الواحد ممكن يتأثر شويه

وتلاقي واحد معندوش " Blood "

يقول لك يا سيدي

بس كان معيشنا في أمان

أو

يا سيدي ده سنُه كبير

أو

يا سيدي ده والدنا

إلخ ...
إلخ ...

شوية الناس الى مش فاهمين حاجه وجايين يتكلموا دول

[poiu]

بجد موضوع محترم جدا ‏


و تسلم إيديك يا عمرو علي الموضوع الهايل دة و الشغل العالي إلي إنت مأجمة اليومين دولة

[Acrobat]

موضوع اكثر من رائـــــــــــــــــــــــــــــــــــــــــــــــ ــــــــــــع .

[LilWayne]

بصراحة لو خيروني بينك وبين جمال الي كان فاكر حيمسك مصر كنت حختارك انت Noway

[MAX EGYPT]

و اللة العظيم برنس دة غير المصايب التانية و الفلوس المنهوبة هو و اعوانة

[SmartMad]

شكرا يا رجاله لمروركم
دى شهاده اعتز بيها

[netm0]

والله عندك حق.....حاجه تفرس و تخلي الدم يغلي بتوع احنا اسفين يا ريس.....عملين ذي الكلاب اللي بيترملهم عضمه و يجرو و يهوهوو عليها !

[wesaleroi]

بجد موضوع جامد اوى والله حسنى زفت ده لو جدع ينتحر ويريحنا منه دى بقت حاجة تقرف والمجلس العسكرى ده يغور فى 60 داهية علشان احنا خلاص جبنا اخرنا

:furious::furious::furious:

[Zeka 007]

مواضيعك كلها مميزة :)

تسلم

[Iam_Back]

بجد موضوع جااااامد اوي

دنا كنت هعيط يا راجل
ايه الفساد دا

[ღ♥:: Beckham::♥ღ]

بص اى رد جميل قدام الموضوع ده استحالة يقدر يوصفه

ودلوقتى يدخل اكمل يشكرلك فى ريسنا

[SmartMad]

المشاركة الأصلية كتبت بواسطة ღ♥:: Beckham::♥ღ عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

بص اى رد جميل قدام الموضوع ده استحالة يقدر يوصفه

ودلوقتى يدخل اكمل يشكرلك فى ريسنا

لازم نحترم رأى الكل

[MaxGame]

تسلم إيديك على هذا الموضوع الرائع

[™_Blast_™]

موضوع جميل...و لو والدي كان عمل نفس اللي عملوا مبارك كان يستحق لمؤاخده كل اللي يحصلوا