حــوار رومــانســــي جـــداً

[®» SilVa «®]

والرومانسية وشدة الحب التي تظهر واضحة جلية في الحوار الدائر في تلك القصة.

كانا يجلسان معا في إحدى الكازينوهات المطلة على النيل يحتفلان بالذكرى الثالثة لخطوبتهما , وهما يحلمان بذلك اليوم الذي سيجمعهما تحت سقف واحد .. ودار بينهما الحوار التالي:

هو : يااااه .. بقالنا 3 سنين مخطوبين.

هي : شكرا على المعلومة المفيدة دي.

هو : بس أنا نفسي أعرف .. ياترى إنتي فعلا بتحبيني بعد مرور 3 سنين على خطوبتنا ؟؟

هي : طبعا .. وانت بتشك في حاجة زي كده !!

هو : بس حقولك حاجة بدون زعل .. أنا لحد دلوقتي ما شفتش منك إثبات عملي لحبك لي.

هي : إزاي الكلام ده !! .. ده فيه حاجات كتير بتثبت حبي ليك .. بس انت اللي مش واخد بالك.

هو : زي إيه يعني ؟؟

هي : بس كده .. خد عندك

هو : قولي

هي : يعني مثلا .. برغم إننا بقالنا 3 سنين مخطوبين زي ما انت بتقول , وبرغم إنك طول الفترة دي وانت داخل وخارج عندنا في البيت زي قرد قطع .. لكن عمرك ما جيتلنا مرة وانت في إيدك حاجة , لا علبة شيكولاتة ولا بوكيه ورد , ولا حتى كوز ذرة , لدرجة إن كل اخواتي بيقولوا عليك إنك جلدة وبخيل وإيحة.
ورغم كده .. عمري ما جبتلك سيرة بالموضوع ده أبدا
شفت بقى يا سيدي أنا بحبك إزاي ؟؟
على كده بقى .. إنت تقدر تقوللي حاجة تثبت بيها حبك ليا ؟؟
هو : بس كده .. خدي عندك

هي : قول

هو : مفيش حد من عيلتي شافك , إلا وعلق على شعرك الأكرت البشع ده االي عامل زي سلك المواعين.
شعرك ده اللي مفيش أي حاجة نافعة فيه .. لا زيوت ولا كريمات , ولا حتى مية النار.
وواضح أن نوعية شعرك ده مفيش أي حاجة ممكن تفرده أو تكويه أبدا.. لا سشوار ولا مكوة رجل , ولا حتى لو حطيتي راسك جوه فرن البوتاجاز.
ده لدرجة إني فاكر مرة واحنا في بداية خطوبتنا , أما حصل وغلطت وحطيت إيدي على شعرك .. قعدت إيدي بعدها منملة يومين بحالهم.
ده أنا كمان مش عايز أقولك إني كل مرة وأنا نازل من بيتنا جايلكم .. أمي تقولي إبقى خللي خطيبتك تقص حتة من شعرها تديهالك عشان ندعك بيها الحلل.
ورغم كده .. عمري ما جبتلك سيرة بالموضوع ده أبدا
شفتي بقى يا ستي أنا بحبك إزاي ؟؟
على كده بقى .. إنتي تقدري تقوليلي حاجة تثبتي بيها حبك ليا ؟؟

هي : بس كده .. خد عندك

هو : قولي

هي : أمك التخينة دي اللي مش عاجبها شعري .. ولية لتاتة وعجانة وكلامها كله هايف وتافه.
طول ما هي بتتكلم تقعد تجيب في سيرة الناس وتتريق على خلق الله , مع إن أمك دي بالذات فيها المادة الخام للتريقة.
يعني بصراحة ربنا وأنا قاعدة معاها , ببقى مش طايقاها ولا طايقة كلامها , وببقى نفسي أقلعها شبشبها وأسد بيه بقها
ورغم كده .. عمري ما جبتلك سيرة بالموضوع ده أبدا
شفت بقى يا سيدي أنا بحبك إزاي ؟؟
على كده بقى .. إنت تقدر تقوللي حاجة تثبت بيها حبك ليا ؟؟

هو : بس كده .. خدي عندك

هي : قول

هو : أما بتيجي تتكلمي , بيبقى واضح قوي إنك بتتصنعي الرقة وتسرسعي فصوتك وتخللي الواحد يضرس , مع إن صوتك ذات نفسه أتخن من صوتي أنا , لدرجة إن أختي الصغيرة بتقول عليكي إنك بالعة ضفدعة.
ده حتى أنا مخبيش عليكي كتير بسأل نفسي .. إذا كان صوتها دلوقتي وهي بتسترق عامل كده .. أمال بعد الجواز أما كل حاجة تبان على حقيقتها حيبقى صوتها عامل إزاي ؟؟
ورغم كده .. عمري ما جبتلك سيرة بالموضوع ده أبدا
شفتي بقى يا ستي أنا بحبك إزاي ؟؟
على كده بقى .. إنتي تقدري تقوليلي حاجة تثبتي بيها حبك ليا ؟؟

هي : بس كده .. خد عندك

هو : قولي

هي : ساعات كتير بتجيلنا البيت وانت قميصك مزفت , ولياقته **** , وبنطلونك مكسر , ومبقع من ورا , وشعرك منعكش , ودقنك مش محلوقة .. وكأنك كلك على بعضك كده لسه خارج من بق ***.
وبصراحة ببقى قاعدة قدامك وأنا قرفانة منك ومن خلقتك , وببقى خايفة ومرعوبة لحد من عيلتي يطب علينا زيارة ويشوفك وانت بالمنظر المنيل ده.
ورغم كده .. عمري ما جبتلك سيرة بالموضوع ده أبدا
شفت بقى يا سيدي أنا بحبك إزاي ؟؟
على كده بقى .. إنت تقدر تقوللي حاجة تثبت بيها حبك ليا ؟؟

هو : بس كده .. خدي عندك

هي : قول

هو : أختي الكبيرة دايما تقولي عنك إنك ما عندكيش أي زوق في الماكياج , وبتشلفطي خلقتك أحمر وأخضر وأزرق من غير أي فن , لحد أما بتبقي عاملة زي البهلوان !!
وبصراحة ربنا .. أنا شايف إن عندها حق.
يعني اللون الأزرق اللي بتشلفطي بيه عينيكي كلها , بيخليكي عاملة زي ما يكون حد فاقعك في عينك بالبونية.
واللون الأحمر الفاقع اللي بتدهني بيه وشك , بيخليكي عاملة زي ما يكون حد سكعك على وشك بالقلم.
واللون الأخضر اللي بتحطيه على بقك .. بيخليكي عاملة زي ما تكوني شربتي ملوخية وما غسلتيش بقك.
ورغم كده .. عمري ما جبتلك سيرة بالموضوع ده أبدا
شفتي بقى يا ستي أنا بحبك إزاي ؟؟
على كده بقى .. إنتي تقدري تقوليلي حاجة تثبتي بيها حبك ليا ؟؟

هي : بس كده .. خد عندك

هو : قولي

هي : مفيش واحدة من صاحباتي شافتك مرة , إلا وقالتلي إيه البني آدم النطع اللي انتي مخطوباله ده !!
وكلهم بيقولولي إن طريقة كلامك , وحركات إيديك , وألفاظك البلدي , وشكلك كده كله على بعضه .. عامل زي ما تكون سباك ولا عربجي.
ده لدرجة إن أي حد ما يعرفكش أما بيشوفك معايا .. بيفتكرك السواق !!
ورغم كده .. عمري ما جبتلك سيرة بالموضوع ده أبدا
شفت بقى يا سيدي أنا بحبك إزاي ؟؟
على كده بقى .. إنت تقدر تقوللي حاجة تثبت بيها حبك ليا ؟؟

هو : بس كده .. خدي عندك

هي : قول

هو : اللي مش قادر أفهمه بصراحة .. هو إنك بتجيبي الزوق المنيل في اختيار اللبس بتاعك ده منين !!
يعني ألاقيكي لابسالي أحمر على برتقاني على فوشيا على بنفسجي .. حاجة تخللي الواحد نفسه تتسد وعينيه تدمع.
وكأن ما كفاكيش الألوان المنيلة اللي بتحطيها على سحنتك .. عشان تعكيها زيادة بألوان هدومك.
وبصراحة شكلك بلبسك ده بيبقى عامل بالضبط زي الأراجوز .. لدرجة إن أولاد أختي مسميينك (شكوكو) !!
ورغم كده .. عمري ما جبتلك سيرة بالموضوع ده أبدا
شفتي بقى يا ستي أنا بحبك إزاي ؟؟
على كده بقى .. إنتي تقدري تقوليلي حاجة تثبتي بيها حبك ليا ؟؟

هي : بس كده .. خد عندك

هو : قولي

هي : مفيش مرة أقعد فيها جنبك وتيجي تفتح بقك عشان تتكلم , أشم ريحة بصل فايحة من حنكك.
وأما آجي أبعد مناخيري عن بقك وأبص لتحت شوية , أبقى حتخنق من ريحة عرقك اللي طالعة من قميصك.
وأما آجي أحاول أهرب تاني وأبص لتحت خالص في الأرض , ألاقي ريحة شرابك مستنياني.
يعني حصار من كل حتة
ده لدرجة إني فاكرة مرة كنت انت عندنا , وبعدين جنابك قلعت الجزمة عشان تقعد براحتك , اللي حصل ساعتها إن كل أهلي هجوا بره البيت , والجيران بتوعنا خبطوا علينا وافتكروا إن حمامنا طفح.
ورغم كده .. عمري مرة ما قلتلك ( إفففففف) .. أو سديت مناخيري قدامك
مع إن كل اللي فات ده يدل ولا مؤاخذة يعني إنك بني آدم (معفن) .. ومحتاج تتنقع في صفيحة جاز.
ورغم كده .. عمري ما جبتلك سيرة بالموضوع ده أبدا
شفت بقى يا سيدي أنا بحبك إزاي ؟؟
على كده بقى .. إنت تقدر تقوللي حاجة تثبت بيها حبك ليا ؟؟

هو : بس كده .. خدي عندك

هي : قول

هو : أبوكي كل ما يشوفني يعمل علي أسد وغدنفر .. وفي نفس الوقت تلاقيه قاعد قدام أمك وهو مرعوب منها وعامل زي اللمونة المعصورة.
ومفيش مرة أغلبه في الطاولة .. إلا ألاقي عينيه دمعت وحيعيط زي العيال .. عشان كده كنت بتغلبله في الطاولة وبستحمله في حاجات كتير عشان خاطرك.
ورغم كده .. عمري ما جبتلك سيرة بالموضوع ده أبدا
شفتي بقى يا ستي أنا بحبك إزاي ؟؟
على كده بقى .. إنتي تقدري تقوليلي حاجة تثبتي بيها حبك ليا ؟؟

هي : بس كده .. خد عندك

هو : قولي

هي : إلا ما في حد شافك من قرايبي وقعد يتكلم معاك , إلا وقال عليك إن بني آدم سمج ودمك تقيل ويلطش.
يا راجل حرام عليك .. ده انت عليك نكت تفقع المرارة , وتجيب الضغط , وتخللي الواحد يتقايا اللي في بطنه.
والمصيبة , إنك تقعد تزيد وتعيد فيها .. والمصيبة الأكبر , إنك كل مرة تقعد تضحك عليها زي اللي فشته عايمة.
وأنا كل مرة آجي على نفسي وأجاملك وابتسم في وشك , ومش برضى أحرجك وأكبسك
ده أنا مش عايزة أقولك .. إن أخويا الكبير إتأخر في الجواز لحد دلوقتي بسبب نكتك دي.
ورغم كده .. عمري ما جبتلك سيرة بالموضوع ده أبدا
شفت بقى يا سيدي أنا بحبك إزاي ؟؟
على كده بقى .. إنت تقدر تقوللي حاجة تثبت بيها حبك ليا ؟؟______________________
وأثناء ذلك الحوار الذي يفيض بتلك العواطف الملتهبة والمتأججة .. جاء أحد رواد الكازينو وجلس على الترابيزة المجاورة.

هو : بقولك إيه يا حبيبتي.

هي : أيوه يا حبيبي.

هو : أنا خايف نكمل كلامنا يا حبيبتي , لحد يسمعنا فيحسدنا على اللي احنا فيه

هي : في دي عندك حق يا حبيبي .. الناس بقت عينيها وحشة قوي.
_____________________

[ahmed4silkroad512]

hhhhhhh nice

[ahmeddolar]

hhhhhhhhhhhhhhhhhhhh 7kaya 7elwa bas el mafrod baysi7osh lba3d awe keda

[_ l3oy0FHell_]

ههههههههههه good

[®» SilVa «®]

شكراااا علي الردود الحلوه

[asfora99]

هههههههههههههههه
مشكور يا معلم

[®» SilVa «®]

مشكور يا حبي علي الرد :)

[it is me]

هههههههههه جامده كيك و على فكره هما مناسبين لبعض جداااااااااااااا

[onelegend4oneman]

لعلمك انا اتخنقت من الموضوع وماقدرتش اكمل انا آسف
تقبل مروري

[_ l3oy0FHell_]

مشكور مناسبين لبض جداً

[omiga1]

برده

الصراحة حلوة