شرح لعبة Phantasy Star Online 2

[mega2000x]

أنا جايبلكم لعبة أعتقد ان مش كتير يعرفوا عنها , لكن حبيت اعمل عنها موضوع عشان اللعبة تستاهل و الناس تلعبها و ان شاء الله نقدر نلم فيها عرب كتير , اللعبة دى اسمها Phantasy Star Online 2 , اللعبة حاليا موجود منها النسخة اليابانية فقط ,لكن فيه ناس عملوا باتش عشان اللعبة تبقى بالانجليزى و مترجم فيه كل حاجة تقريبا فمفيش قلق من ناحية اللغة ,و كمان اللعبة فيها لاعبين كتير من مختلف انحاء العالم و تستاهل التجربة



مقدمة عن اللعبة

اللعبة عبارة عن لعبة اونلاين بنظام ال Dungeons ,زى لعبة C9 و Vindictus , لكن المميز فيها ان على خلاف C9 و Vindictus , ال Dungeon مش بيكون ليك لوحدك , يعنى ممكن تلاقى فى ال Dungeons فرق تانية غير فريقك , و الحلو ان لو فرقكم قريبين من بعض الفريقين حياخدوا ال exp بتاع الوحوش اللى بيقتلها الفريقين , و تتحسبلوا المهمات اللى بيخلصها الفريق التانى , يعنى كأنكم فريق واحد و ده طبعا لو قريبين من بعض فى الخريطة , و مفيش حد اقصى للفرق , يعنى ممكن تلاقى معاك 5-6 فرق بيعملوا نفس المهمة , و ال Dungeons متقسم لخرايط , وزى ما قلت مش بتكون مقصورة على فريقك لوحده , بتكون لكل الفرق , لكن الحالة الوحيدة اللى بتكون الخريطة لفريقك لوحده هى خريطة الزعيم و دى بتكون اخر خريطة فى ال Dungeon , أول ما تدخلها بتكون لفريقك بس , يعنى لو دخلها فريق تانى بتتكون خريطة لفريقه بس , يعنى مش حتجتمعوا زى باقى خرايط ال Dungeon , اللعبة احداثها كلها بتدور فى سفينة فى الفضاء ,انت بتبدأ اللعبة بأنك تختار سيرفر , السيرفرات متقسمة لسفن , معظم اللعبين على السفينة رقم 2 , Ship 02 , فدى اللى حنبدأ فيها ووبعضهم برضه على السفينة رقم 7 , المهم بتبدأ اللعبة على السفينة و تبدأ تاخ المهمات وتعملها , و المهمات دى بتعملها فى Dungeons و ال Dungeons هنا عبارة عن كواكب, فلما بتاخد المهمة بتدخل غرفة انتظار , الغرفة دى ممكن تستنى فيها لحد ما ينضملك لاعبين تانيين واخدين نفس المهمة , و كمان ممكن تجهز فيها نفسك ,فحتلاقى هناك npc ممكن تشرى منه items تساعدك فى المهمات قبل ما تبدأها و بعد ما تستعد بتنقفز فى بوابة فضائية كده عاملة كأنها حوض مياه , المهم حتنط فيها و تنقلك على الكوكب اللى حتعمل فيه المهمة , وفى برضه حاجة اسمها Blocks , دى كده عاملة زى ال Channels فى الالعاب التانية , وممكن تغيرها بانك تركب مصعد (اسانسير يعنى ) و تختار البلوك اللى عايزه , معظم اللعبين بيكونوا على البلوكات من 18-23 , لكن كتير قوى بيكونوا على 21 بس لو ماليان على الاخر مش حتعرف تدخل لازم تستنى يفضى شوية او تروح بلوك تانى , و فيه نوعين من المصاعد , واحد بيغيرلك البلوك و التانى بيودك ال Shopping Area , وهناك حتلاقى ال NPCs اللى بيبيعول الاسحة و الدروع و ال items و اللى بيعملوا Enhance للأسلحة و الدروع و كمان بتروح اوضتك من هناك لما تتقدم فى اللعبة و تفتحها و كمان ممكن تزوقها و تحط عفش و سرير و تريح عليه كمان , و قاعة الاستقبال حتلاقى فيها زى ماقلت مكتب الاستقبال و كمان ال NPC اللى بيغير اختصاصك (حشرح الموضوع ده فى الاختصاصات ) و كمان ال Auction و غيرها حاجات كتير , و احلى حاجة ان لما يبقى فيه ايفينت او اعلان او اى حاجة بتسمع صوت المضيفة بتعلن عن الايفينت او الابديت او غيره , تحسسك انك فى كارفور ولا حاجة




كيفية التسجيل و تحميل اللعبة

بطبيعة الحال اللعبة باليابانى عشان كده أنا حشرح طريقة التسجيل و هى بسيطة و سهلة زى اى تسجيل فى اى لعبة , لكن انا حشرحه عشان لازم تفعل اللعبة و انت بتسجل لسبب حقوله وانا بشرح التسجيل

بداية حتدخل على موقع اللعبة الرسمى :

عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

بعد كده حتضغط على الزرار الازرق اللى مكتوب عليه sega id زى الصورة :



بعد كده حيفتحلك صفحة تانية تكتب فيها ايميلك و تضغط زرار التأكيد :


حيفتحلك صفحة تانية فيها كلام يابانى بيقولك ان الموقع حيبعتلك رسالة تأكيد على الايميل تكمل من خلالها التسجيل , المهم حتفتح الايميل و تلاقى وصلك رسالة من سيجا باليابانى ختفتحها و تضغط على الليك اللى فيها ,حتفتحلك صفحة تسجيل البيانات و حمشى معاكوا فيها واحدة واحدة :



زى ما فى الصورة كده حتلاقى فى اول الصفحة بيانات تاريخ الميلاد و ال id اللى حتسجل بيه , دخل اى تاريخ انت عايزه زى ما فى الصورة , الخانة اللى على اليمين لليوم , و اللى فى النص للشهر , و اللى على الشمال للسنة , ويفضل يكون اكبر من 18 سنة يعنى مثلا سنة 1990 ده يبقى كده 22 سنة مثلا , لكن مايقلش عن 18 سنة احتياطى , الخانة اللى تحت دى حتكتب فيها ال id اللى حتسجل بيه , و بعدين تضغط على زرار الكشف على الاسم اللى تحتيه عشان يتأكد ان محدش مستعمل ال id ده , و لو محدش مستعمله حتلاقى العلامة الزرقاء دى اللى فيها كلام بالاصفر ظهرت فاعرف ان اسمك مش مستعمل و ممكن تسجل بيه عادى



الخانتين اللى تحتيهم حيكونوا للباسورد ,حتدخل فى الخانتين الباسورد اللى حتستعمله زى ما فى الصورة كده



هنا بقى السؤال السرى ,حتختار اى سؤال و تكتب اى اجابة انت عايزها

بعد ما تخلص حتضغط الزرار اللى فى اخر الصفحة ,بعد كده حيجبلك صفحة تأكيد و كاتبلك فيها كل بياناتك اللى انت سجلت بيها و حتلاقى زرارين فى اخر الصفحة تحت بعض, حتضغط أول واحد من فوق للتأكيد

بعد كده حيفتحلك صفحة تانية فيها كلام باليايانى و بيقولك انك سجلت و حتلاقوا زرارين ,اضغطوا على اللى فيه كلام اكثر زى ما فى الصورة كده :




ركزوا معايا بقى عشان النقطة دى مهمة , لما تضغطوا على الزرار ده حيفتح صفحة تانية فيها قائمة بالالعاب الاونلاين اللى تبع سيجا , لازم تفعلوا لعبة Phantasy star online 2 فى الخطوة دى ,لأنكم لو قفلتوها حتضطروا تعملوا ايميل تانى و تسجلوا من الاول عشان تفعلوا العبة ,لأنكم عشان تفعلوها لو قفلتوا الصفحة دى ,لازم تعملوا Log in فى الموقع , وعشان تعملوا Log in لازم تكتبوا سال التأكيد بتاعة الدخول ودى لازم تكتبوها باليابانى فمش حتعرفوا ,فلازم تفعلوا مع التسجيل ,المهم لما صفحة قائمة الالعاب تفتح زى ماقلت ,حتدوروا على اسم اللعبة باليايانى زى اللى فى الصورة و تضغطوا على زرار التفعيل اللى تحت الاسم :



حيفتح صفحة تانية بتاعة تأكسد التسجيل حتضغطوا على الزرار اللى فى الصورة دى :



بعيد حتظهر صفحة بالشكل ده حتضغطوا على الزرار ده :



كده مبروك عليك اللعبة اتفعلت ,فاضل بس التحميل ,عشان تحمل اللعبة ادخل على اللينك ده وحمل الداونلودر

عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]


اللعبة مساحتها كبير شوية , مساحتها 8 جيجا , لما تثبتها و تشغل اللانشر فيه باتش كبير شوية فحتاخد وقت عشان تحمل الباتش فسيب الكمبيوتر يحملها لحد ما يخلص, وعادى لو فصل حيبأ من الحتة اللى وقف عندها لكن يفضل تعمل الباتش مرة واحدة


نيجى بقى لباتش اللغة عشان اللعبة تشتغل بالانجليزى ,بداية كده قبل ما تعمل الباتش اعمل back up للعبة فى اى مكان تانى على الكمبيوتر عشان لو حصل مشاكل ولا حاجة من الباتش ماتثبتش اللعبة من الاول وتعيد الابديت الكبير تانى ,وملحوظة ,بعد ابديت كل اسبوع الباتش حيروح فلازم تعمله تانى

بداية حتحمل الملفين دوول :

عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

و تفك ضغطهم بعدين حطهم فى مسار اللعبة فى فولدر win32 بحيث شكل المسار حيكون كده :

PHANTASYSTARONLINE2\pso2_bin\data\win32

وتوافق على الاستبدال وخلاص كده مبروك عليك باتش اللغة , وده لينك موضوع الباتش بحيث تتابعوه لو فيه حديثات :

عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

نرجع بقى لشرح اللعبة نفسها واتمنى انكم تنضمولى فيها وحنقضى وقت ممتع فيها عن تجربة



جرافيك اللعبة

اللعبة الجرافيك بتاعها مبهر وده سبب فى مساحتها الكبيرة , نظام الجرافيك بتعاها فيه نوعين زى Aion , متمثة فى ال Shader , يا اما تختار Standard وده الجرافيك العالى ,يا اما تختار Simple ده الجرافيك البسيط ,و الفرق بينهم بصراحة زى الفرق ما بين السماء و الارض ,لكن انا بلعب بال Simple عشان جهازى مش قد كده , و بالرغم من كده الجرافيك روعة برضه

وده فيديو بال Simple Shader

[YOUTUBE]aadFfANow2g[/YOUTUBE]

وده فيديو بال Standard Shader

[YOUTUBE]UG_Bqtn_jUU[/YOUTUBE]


ملاحظين الفرق طبعا , لكن فى الحالتين الجرافيك روعة و اللعبة اروع , فاللى جهازه مش قد كده زى حالاتى (و مش قد كده دى يعنى ما يقلش عن Core 2 due أو Dual core وكارت شاشة نضيف ) , يخليه فى ال Simple Shader , لأنه لو اشتغل على Standard Shader حيلاقى تهنيج رهيب , لكن لو عايز تلعب بالجرافيك العالى Standard Shader لآزم جهازك يكون على الاقل Core 2 quad و 4 جيجا رام و كارت شاشة محترم



شرح الأنواع و الاختصاصات

اللعبة فيها 3 انواع من المخلوقات و 3 انواع من الاختصاصات , و الباتش اللى نازل كمان 4 ايام حيضيفوا فيه 3 انواع Subclass , بحيث تتكم فى نوعين فى نفس الوقت

بالنسبة لأنواع المخلوقات :

Human : و النوع ده هو البشر

Newman : ودول شبه ال Elf كده , و شكلهم شبيه جدا بالبشر

Casts : و دوول عبارة عن أليين

بالنسبة للاختصاصات : اللعبة زى ما قلت فيها 3 اختصاصات :

الاختصاص الاول :Hunter : وده بيختص فى الهجمات القريبة , و بيستخدم الاسلحة القريبة :

1-السيوف : و ده 3 انواع و يقدر ال hunter يستخدمهم:
النوع الاول سيف ايد واحدة
النوع الثانى سيف بايدين
النوع الثالث , سيف هجين (انا اللى مسميه كده ) و سميته كده لأنه سيف و مسدس فى نفس الوقت و ما تسألنيش ازاى

2- الرماح

3- نوع كده عبارة عن نصلين كل نصل فيهم متوصل بسلسلة , بيمسك كل نصل فى ايد

ودى صور لل Hunter :









الاختصاص الثانى: Ranger :

وده بيختص فى الهجمات البعيدة و اسلحته كلها اسلحة نارية ,و اسلحته متمثلة فى البنادق و الرشاشات و السنايبر و المدافع و القنابل, بالاضافة انه ممكن يستخدم السيف الهجين (اللى هو سيف و مسسدس فى نفس الوقت)

ودى صور لل Ranger







الاختصاص الثالث و الاخير : Force

وده زى ال Mage كده فى الالعاب الثانية , و اختصاصة استخدام السحر و السلاح اللى بيستخدمه ال Rod و Wand و كمان يقدر يستخدم السيف الهجين زى ال Ranger

ودى صور لل Force







ودى كل الاختصاصات فى اللعبة , بالنسبة لاتصاصات ال Subclass اللى حتنزل الابديت الجاى حتكون :

Fighter
Gunner
Techer

لكن له مش عارف حتكون الاختصاصات دى عاملة ازاى بالضبط , لكن الفكرة انك حتدمج اختصاصين مع بعض الاساسى و ال sub و تستخدم اسكلات الاتنين و اسلحتهم فى نفس الوقت

فيه حاجة كمان مميزة فى اللعبة , انت لما بتبدأ بتختار الاختصاص اللى حتبدأ بيه , لكن انت ممكن بدل ما تعمل شخصية تانية باختصاص تانى , ممكن تغير اختصاصك جوه اللعبة و فى الحالة دى ,كل اختصاص له لفل لوحده , يعنى مثلا انت بدأت ب Hunter و لفلته للفل 10 ,بعدين حولت اختصاصك ل Ranger ,حتبدأ ب Ranger lvl 1 , لفلته مثلا للفل 20 و عايز ترجع hunter تانى , حترجع لكن حتكون Hunter lvl 10 زى ما سبته , يعنى كأن كل تحويله بشخصية و لفل مختلف فحتى لو وصلت بشخصيتك لأعلى لفل , تقدر تحول اختصاصه و تلفله تانى باختصاص مختلف , و تقدر فى اى وقت تبدل ما بين الاختصاصات زى ما انت عايز و بلفل كل اختصاص ودى حاجة جديدة مش موجودة فى اى لعبة



عمل الشخصية

اكثر حاجة عجبانى فى اللعبة بصراحة , عمرى ما شفت لعبة فيها كم التفاصيل اللى ممكن تعملها فى شخصيتك زى ما شفت فى اللعبة دى , انت فى البداية بتختار نموذج كأساس تبدأ عليه , و فيه عدد كبير جدا من النماذج اللى تختار منها و اللى بتتحدد حسب الاختصاص ,ولى بالك هنا انت بتختار ولد ولا بنت من النموذج , يعنى لو اخترت نموذج بنت يبقى الشخصية اللى حتعدل عليها حتكون على النموذج ده و ماينفعش تقلبها ولد بعد كده , اول ما تختار نموذج حتلاقى كم هائل من الاختيارات اللى ممكن تعدل بيها الطول و الوزن و ملامح الوجه و التجاعيد و الشعر و العيون و الاذن و الانف و طول و عرض الوجه و كل حاجة ممكن تخطر على بالك ,وكمان تختار اللبس الاساسى اللى يبدأ بيه و كمان ال Accessories و ال Tatoo و حاجات تانية كتير صعب اجمعها فى بالى دلوقتى , ودى صور من عمل الشخصية :











وده فيديو لعمل الشخصية :

[YOUTUBE]TkHYL7yVZvI[/YOUTUBE]



المهمات فى اللعبة

انت بتبدأ اللعبة زى ما قلت قبل كده فى السفينة اللى بتختارها , بتبدأ فى قاعة استقبال السفينة , و حتلاقى زى مكتب استقبال واقف وراه npc حتاخد منها المهمات , اول ما تختار مهمة , بتدخل قاعة الانتظار ,ودى ما ينفعش تدخلها الا لما تختار مهمة لأنك منها بتروح علطول على الكوكب اللى حتعمل المهمة عليه من خلال انك بتنط فى البوابة زى ما قلت فى بداية الموضوع , المهم الغرفة دى موجودة علطول جنب مكتب الاستقبال , أول ما تدخلها حتلاقى نفسك فى غرفة الانتظار , ممكن تستنى هناك لحد ما لااعبين تانيين يختاروا انهم ينضموا لفريقك , لأنك اول ما بتختار المهمة , اسمك و المهمة اللى اخترتها بتتسجل فى مكتب الاستقبال بحيث لو حد دور على فرق بتعمل مهمة معينة يلاقى , وعادى ممكن تستنى الفرقة فى مكتب الاستقبال مش لازم فى غرفة الانتظار , انت بس اهم حاجة تختار المهمة , وممكن تعمل فريق بعد او قبل ما تختارها عادى مش لازم تستنى لما حد يختارها , المهم عشان تبدأ المهمة بتنط فى البوابة و دى بتودك الكوكب اللى حتعمل عليه المهمة ,وبيكون عبارة عن Dungeon مش open world , يعنى اول ما المهمة تخلص حترجع السفينة تانى , وفى حاجة كمان , لما تختار مهمة اسمك حيتسجل فى البلوك اللى اخترتها فيه , يعنى مثلا لو انت فى بلوك 20 اسمك حيظهر فى المهمة للى حيختار فريق للمهمة دى فى البلوك 20 , لكن لو واحد بيدور على فريق للمهمة دى فى بلوك 21 مثلا اسمك مش حيظهر لأنك فى بلوك تانى , فلو عايز تعمل فريق للمهمة دور على بلوك فيه لاعبين كتيير



عشان تتقدم فى القصة و تفتح مهمات و خرايط جديدة , لازم تخلص المهمات الاساسية و بتتمثل غالبا فى انك تلاقى ادوات معينة زى اسلحة او دروع لونها ذهبى و انت بتعمل المهمات اللى بتاخدها من مكتب الاستقبال , او تتمثل فى انك تكلم اشخاص معينة على السفينة , و كل ما تخلص مهمات القصة بتفتح خرايط و اماكن اكثر و تتقدم فى القصة , ودى صورة لشكل الادوات اللى لونها ذهبى و بتخليك تتقدم فى القصة :



و مهمات القصة مش بتاخدها من مكتب الاستقبال , و لكن دى بتكون فى حاجة اسمها Matter Board ودى مشروحة بالتفصيل فى اللينك ده و ازاى تخلص كل مهمة :

عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]



النوع الاخير من المهمات اسمه Client Orders , وده عبارة عن مهمات جانبية بتاخدها من ال Npcs اللى فى السفينة , وكل ما تخلص مهمتهم الصداقة مابينكم تبقى اقوى و يديك مهمات تانية , و لما تخلص عدد معين من المهمات بيديك هدايا قيمة, زكمان لما صداقتكم توصل لمستوى معين , تقدر بعد كده تضم ال Npc ده لفريقك يساعدك فى المهمات كأنه لاعب عادى , ده ممكن تلجأ اليه لو عايز تعمل مهمة صعبة و مش لاقى فرق , او لو معاك فريق بس مش كامل و مش عايز تستنى فتكمل الفريق من شخصيات ال Npc اللى الصداقة ما بينكم عالية , وتقدر تضمهم ليك من خلال اختيارهم من جهاز معين فى غرفة الانتظار قبل المهمة


Mags :

فى حاجة كمان مميزة فى اللعبة اسمها Mags , ودى عبارة عن مخلوقات الية بيكونوا زى ملاافقين ليك , وبتربيهم و تقويهم و كل ما يقوا بيتفتحلهم سكيلات , اهم سكيل عندهم انهم يقدروا يستدعوا زى ارواح وحوش تساهدك فى القتال ودى صور ليهم :









أخر نقطة حتكلم فيها متعلقة بالاسلحة , انت فى اللعبة ليك انك تروح المهمة بثلاث اسلحة تبدل بينهم زى ما انت عايز , لكن كل سلاح بتختار له 3 سكيلات بس ,معنى كده لو عايز تستخدم اكثر من 3 سكيلات لنفس السلاح يبقى تحطه فى كمان فى الخانتين التانيين للاسلحة و تغير فى اسكيلاته , بحيث لما تيجى تبدل الاسلحة يبقى نفس السلاح لكن سكيلات مختلفة , و السكيلات هنا اسمها Photon , ودى يا اما تشتريها من Npc على السفينة , يا اما بتقعلك من الوحوش , و اول ما تستخدمها بتكتسب ال Photon ده , و كل سلاك له فوتونات مختلفة عن السلاح التانى , يعنى مثلا السيف ابو ايد واحدة فوتوناته مختلفه عن السيف ابو ايدين , بحيث لو شفت عدد الاسلحة اللى بيستخدمها ال Hunter مثلا و كل سلاح شفت عدد فوتوناته حتلاقى ان الهانتر ممكن يستخدم عدد كبير جدا من الفوتونات , نظام استخدام السكيلات هنا (الفوتونات) مميز شوية , لأنك بتستخدمهم عن طريق ال Combo , كل سلاح بتختارله 3 فوتونات قبل ما تروح المهمة , بتحطهم فى الخانات المخصصة لكده , و ال Combo بتختلف حسب الخانة اللى حاطط فيها الفوتون , لأنك عشان تستخدم الفوتون الاول لآزم الاول تضغط على زرار الماوس الشمال مرة بعدين الزرار اليمين , و عشان تستخدم الفوتون الثانى تضغط زرار الماوس الشمال مرتين بعدين الزرار اليمين , و عشان تستخدم الفوتون الثالث تضغط على زرار الماوس الشمال 3 مرات بعدين الزرار اليمين , يعنى استخدامك للفوتون حيختلف حسب انت حاطه فى الخانة الولى لا الثانية ولا الثالثة , معنى كده انك ممكن تقدر تعمل عدد هائل من ال Combo بتغيير اماكن الفوتونات , والموضوع ده سارى بالنسبة لأسلحة ال Hunter و ال Ranger , لكن ال Force هو الوحيد اللى نظام فوتوناته مختلف شوية لأن مفيش Combo , انت بتسخدم الفوتونات علطول من الزرار اليمين للماوس للفوتون الاول , و للفوتون الثانى و الثالث بتضط Shift بعدين كليك شمل للفوتون الثانى و كليك يمين للفوتون الثالث , ده غير انله فوتونات تانية ممن بتحطها فى الارقام من 1-9 و تستخدمها عادى من غير ما تعمل Combo , ودى صورة بتوضح الموضوع ده :







وبكده اكون شرحت جزء كبير من اللعبة و ان شاء الله تعجبكم و تنضمولى فيها ودلوقتى اسيبكم مع فيديوهات للعبة

[YOUTUBE]v43fGAHzYDc[/YOUTUBE]

[YOUTUBE]pP91t42qAmo[/YOUTUBE]

[YOUTUBE]K2lP2S5GwAc[/YOUTUBE]

و فى النهاية اتمنى ان اللعبة تكون عجبتكم

[UnderCover!]

اكيد يعني

يثبت

[™Funky™]

موضوع رائع ادينى يومين تلاتة اكون حملتها بس فيه حاجة اولى نظام باتش اللغة ده تانى و فهمنى يعنى كل اسبوع هينزل باتش لغة جديد ؟

[mega2000x]

المشاركة الأصلية كتبت بواسطة _$Viru_ عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

موضوع رائع ادينى يومين تلاتة اكون حملتها بس فيه حاجة اولى نظام باتش اللغة ده تانى و فهمنى يعنى كل اسبوع هينزل باتش لغة جديد ؟

بص عشان تعمل باتش اللغة تحمل الملفين المضغوطين اللى انا حاططهم , بعد ما تفك ضغطهم حيطلعلك ملفات كتير , دول حتعملهم كوبى و تحطهم فى فولدر win 32 اللى جوه اللعبة و مساره بالضبط فى فولدر اللعبة انا كاتبه فوق , بعدين تواق على استبدال الملفات و خلاص على كده افتح اللعبة , لأكن اعمل الباتش بعد ما اللعبة تخلص الابديت خالص و تكون جاهزة خلاص انك تفتحها لأنك لو عملته قبل الابديت , الابديت حيضيع الباتش و تضطر تعمله تانى , و كل اسبوع بعد الصيانة الاسبوعية للعبة (زى اى لعبة اونلاين ) المفروض اللانشر بيراجع فى السريع كده الملفات , فبعد الابديت الاسبوعى الباتش حيروح , فانت حتستبدل الملفات تانى عادى و مش حتاخد منك ثانية , و بالنسبة لباتش اللغة انا حاطط الليننك بتاعه عشان كل فترة بيترجموا حاجات اكتر و ساعات يظبطوا الباتش لو نزل ابديت الباتش مش ماشى معاه , فعشان كده اللى حيلعبها يتابع صفحة الباتش بعد كل ابديت عشان لو فيه جديد , غير كده الباتش شغال عادى من غير مشاكل و انا شغال بيه دلوقتى , و زى ما قلت للاحتياط يفضل انك تعمل back up للعبة فى مكان تانى على الكمبيوتر عشان لو مثلا نزل ابديت مش ماشى مع الباتش ممكن يهنج اللعبة او مايخليهاش تشتغل فيبقى عندك نسخة منها احتياطى لو حصل الكلام ده , لكن حاليا الباتش شغال عادى , لكن الابديت اللى نازل كمان كام يوم حيضيفوا فيه حاجات كتيرة جديدة , فهى يا اما الباتش مش حيشتغل معاها , يا اما حيشتغل بس الحاجات الجديدة مش حتكون مترجمة , و فى الحالتين المترجمين حينزلوا باتش جديد بالاضافات الجديدة , فانت بس اعمل نسخة تانية من اللعبة و تابع تحديثات الباتش من اللينك اللى حاطه , اه وحاجة كمان مهمة ,ممكن اللعبة لما تفتح الانشر تلاقيه مش عارف يعمل ابديت و بيديك رسالة خطأ , فى الحالة دى السبب حيكون ال Antivirus , فلو حصل كده اقفله خالص لحد ما تخلص الابديت , لأن الموضوع ده حصل معايا لما كنت شغال ب Bitdefender و ده كان عيبه انه ما بيتقفلش خالص فاضطريت امسحه و اعمل ابديت للعبة و كملت عادى , لكن مع Avast (وده اللى شغال بيه دلوقتى ) شغال عادى ومن غير مشاكل , و عموما المشكلة دى انا بصراحة ماواجهتهاش غير مع Bitdefender لأنى جربت اكتر من برنامج فيروسات و ده بس اللى كان فيه مشكلة مع اللعبة دى و العاب الاونلاين عموما اللى بتستخدم GameGaurd , فلو عندك Bitdefender امسحه احسن هههههههههه , غير كده كل حاجة حتكون تمام ان شاء الله , وانا بلعب فى Ship 02 , و اسمى فى اللعبة Decade , واسمى فى البطاقة Decade21 (اسم البطاقة ده زى اسمك بتاع الاكونت بحيث بيكون ثابت حتى لو اسماء شخصياتك اختلفت , وده اللى بيظهر فى قائمة الاصدقاء )

[PUFFY]

موضوع في غاية الروعة !

[X-T!GeR]

شكرا

[mega2000x]

نزل باتش جديد للغة ليعمل مع اخر ابديت للعبة , تم تحديث لينكات الباتش

[commando133]

موضوع رائع بس انا نزلت اللعبة و بسجل واجهتى مشكلة مطلوب فى صفحة التسجيل انك تكتب كود زى اللى فى الصورة و انا معنديش لغة يابانى

[mega2000x]

المشاركة الأصلية كتبت بواسطة commando133 عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

موضوع رائع بس انا نزلت اللعبة و بسجل واجهتى مشكلة مطلوب فى صفحة التسجيل انك تكتب كود زى اللى فى الصورة و انا معنديش لغة يابانى

ايوه موضوع ال Captcha اللى باليابانى فى التسجيل ده لسه عاملينه جديد , دينى ايميل تانى اسجلك بيه و ممكن تعمل واحد بس للعبة و ابعتلى بياناته على الخااص و البيانات اللى عايز تسجل بيها او انا اعملهولك :

User
Password
Secret Question Answer

[«™Şhãdow™»]

انا خلاص العبة عندي 94%
هانت واخلص تحميل
بس لعبة في غاية الروعة بجد وشكر ليك
يا ميجا وقولي الابديت بتاعها كبير
ولا صغير
وقولي هتفتح امتا علشان العب معاك
بكرة الجمعة
انا فاضي شوف كدا وقولي امتا

[tit3o]

طيب ثوان هشوفها ع اليوتيوب من نواحى كتير واجيلكوا ادخل معاكوا باذن الله بس ياريت اعرف هل اللعبة سيرفر واحد ولا اكثر من واحد؟ علشان نلعب سوا وتبقى اكثر متعة

[«™Şhãdow™»]

طيب ثوان هشوفها ع اليوتيوب من نواحى كتير واجيلكوا ادخل معاكوا باذن الله بس ياريت اعرف هل اللعبة سيرفر واحد ولا اكثر من واحد؟ علشان نلعب سوا وتبقى اكثر متعة

العبة عبارة ships دي هيا servers
فا الاجانب والكل الناس الي مش يابانيين
هما بلعبة في Ship 2
رقم 2
لو قريت الموضوع كويس هتلقي ابو ميجا كاتب عن كل حاجة
يا مان الموضوع مافهوش فتفوتة كل حاجة حاططها
علشان الكل يستفيد
:emoticon_cincin:

[PUFFY]

احنا هننزل بالصلى على النبي كده في السيرفر الياباني انا الجيم عندي 7 %

[commando133]

اولا شكرا لـ mega2000x لانه عملى الاكونت بس انا بقالى يومين بعمل للعبة ابديت لما قربت اتشل ده الدونلود خلص اسرع من كده انا النت عندى بيفصل كتير و الابديت كل مرة يعيد من الاول مش بيصيف و انا خلاص اتخنقت : mad3:

[mega2000x]

المشاركة الأصلية كتبت بواسطة commando133 عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]

اولا شكرا لـ mega2000x لانه عملى الاكونت بس انا بقالى يومين بعمل للعبة ابديت لما قربت اتشل ده الدونلود خلص اسرع من كده انا النت عندى بيفصل كتير و الابديت كل مرة يعيد من الاول مش بيصيف و انا خلاص اتخنقت : mad3:

ههههههههههههه معلش هو الابديت كبير اصله , لكن ما تقلقش هو مش بيعيد من الاول ,هو بيكمل من النقطة اللى وقف عندها , لكن البار بتاع التحميل بيبدأ من الاول فبتعتقد انه بيعيد كله , لكن فى الحقيقة هو بيكمل فماتقلقش مسير الابديت يخلص