بسم الله الرحمن الرحيم
أنا شاب عندي 17 سنة بحب بنت خالتي من زمان تقريبا من وأنا عندي 7 سنين
دايما بفكر فيها ودايما مش قادر اعمل حاجه ولا عارف اوصلها حبي حتي بعد ما كبرنا
أو بالمعني الأصح مش مش عارف لأ دا أنا معنديش الجرأة ولو حتي أخليها تحس بأني بحبها
انا واخوها يمكن تقولوا مش زي الإخوات لأ اخوات فعلا فا يمكن أنا خايف اتقدم ف الموضوع دا عشان بحبه ومش مستعد أخاطر بصداقتي معاه
بس فعلا أنا بحبها قوي
ومش عارف إذا كانت هي كمان بتحبني ولا لأ
بس في شوية مواقف بتحسسني انها بتحبني ومواقف تانية بتنفي وأنا مش عارف أو مش قادر اقرر عشان الموضوع دا بالزات مينفعش اجازف فيه
مثلا كنت بتصل بأخوها ردت هي عليا ودا الحوار:
أنا: ألو ايوة يا (س) ازيك عامله اية
هي:مين معايا
أنا:يخرب بيتك مش عارفه صوتك يا بت أنا ابن خالتك يخرب بيت الفول الي سطلك
هي:اهااا ازيك يايوسف فينك من زمان
انا:أهو عايش والحمد لله فين اخوكي
هي:اخويا ثواني اناديله بس قولي الأول أنت مبتجيش ليه عندنا تعالي بقا يا يوسف (ووطت صوتها في الجزئ الي جاي دا وقالته بكسوف قوي) أنت وحشتني قوي وعايزة أشوفك
(أنا بصراحه معرفتش أقول اية فضلت أضحك)
بجد كنت طاير من الفرحه من الي قالته دا بس خايف ليكون دا عادي اصل احنا متعودين بنهزر كتير فيكون بجملة الهزار
مرة تانية كنا في المصيف وكانت جت معانا وكنا لسا ف الشقة فا أنا قاعد بقرأ قصة لقتها جت بتناديلي وقالتلي متيجي تلعب معايا كوتشينة(مع انها كانت بتلعب مع اخواتي اصلا)
وكنت واقف في البلكونة لوحدي لقتها جاية كدا لوحدها وقالتلي مالك سرحان كدا بتحب ولا أية.....ووقفت جنبي وقعدنا نتكلم
والحكاية دي أتكررت حوالي 3 او 4 مرات
وكنت ملاحظ اني كل ما أروح عندهم تقولي افتح البلوتوث وتبعتلي صورة بنت جميلة جدا وتقولي أية رأيك فيها ومرة قالت لأخوها يبعتلي فديو لرقاصة كانت في فرح ناس قرايبهم فا أنا مرضتش وقلتلهم مش ناقصة عبط
وحاليا بجد دي الحاجه الي مجنناني
احنا عاده بنبعت لبعض مسجات موبايل بس عادي مره حب مرة نكته مرة تهزيق كدا يعني
بس بصراحه كل يوم بترن عليا ورسالة حب بس بحس انها بتقولهالي من قلبها بجد وانا ببعت برضو رسايل حب
ورسايلها بتبقي مظبوطه علي الموقف يعني مثلا موبايلي كان بيتصلح وفضلنا كذا يوم منبعتش لبعض اول ما جبته لقتها كانت بعتالي راسله شوق وانها هتفضل تحبني مهما أنا نسيت والحاجه الوحيده الي تخليها تنساني انها تموت بس قبل مني عشان متقدرش تعيش لحظه من غيري بس طبعا بأسلوب المسجات والسجع وكدا
ومرة أتصلت بيا وقعدنا نتكلم شوية
والي مخليني أشك أكتر ان الرسايل دي بتتبعت ليا انا بس لكن بالنسبه لأخواتي بترن بس
بس بصراحه برضو حتي بعد كل دا أنا قلقان لتكون تهيؤات
وأنا بقالي شهرين موبايلي باظ ويدوب بحط الخط كل فين وفين في اي موبايل حد صاحبي الاقي رساله تقولي فيها اني واحشها وهتفضل عايشه علي صورتي ف قلبها وكدا
أنا بجد عايز رسالة أطمنها بيها وأقولها أني بحبها وعمري ما هسبها يمكن تكون الظروف حكمت لكن الي في القلب مبيتغيرش
أنا عايز مسج بالمعني دا بس أكون ضامن اني مش هوقع نفسي ف الكلام او اعتراف صريح أنا عايز مسج لو هي بتحبني بصحيح تفهمه وتتأكد ان دا قصدي ولو عادي يبقي كأنها رسالة شوق عادية بتتنقل من الموبايلات
وياريت تساعدوني وتقولولي أعمل اية معاها
وبليز محدش يقول أتجرأ وجازف عشان استحاله
غير ف حاله واحده اني اكون متأكد 100% انها بتحبني فعلا وبليز عايز طريقه اعرف بيها هي بتحبني ولا لأ من غير ما هي تحس اني عايز اعرف كدا
انا بجد زهقت وفضلت كاتم الموضوع دا جوايا سنين ومش قادر اكتر من كدا
ومعلش طولت عليكم بس متنسوش الردود