[محسن الكاشف]

مواقع محظورة سياسيا


قاعد فى سيبر من سيبرات المحروسة المنتشرين فى جميع ارجاءها وطقت فى دماغى انا وصاحبى ميخا افتح سايت من السايتات المحظورة .. سايت سياسى يعنى ..

لسة بقول ياهادى وبفتح السايت لقيت رسالة من السايت مكتوب فيها
جاينلك ياروح امك ... امن الدولة !!

انا قريت الكلمتين من هنا وقولت يافكيك ..

قمت ادفع الحساب عشان امشى بسرعة ....

لسة بحط ايدى فى جيبى وبطلع الـ 3 جنيه حسابى لقيت قلم على قفايا بيون .. من غير ماأبص عرفت انهم وصلوا ..

لان طبعا قلم مخبرى امن الدولة محفوظ عن ظهر قلب ..
وانا عن نفسى مجربه اكتر من مرة وفى اكتر من مناسبة ..

نرجع لموضوعنا .. انا بقى لما كنت فاتح السايت ده ماكنتش فاتحه لوحدى ميخا كبرت فى دماغه زى ماقلتلكوا وكان ناوى يدخل زيى بس لما لقى الحكاية هاتقلب جد ملص ..

والانيل انه لما بتوع امن الدولة جم عمل نفسه ولا يعرفنى , لأ وكمان راح فاتح سايتات اباحية وبص لضابط الامن وقاله انا بشجع الثقافى ياباشا !!

ظابط الامن للمخبرين: اتأكدوا ان مفيش حد تانى فاتح السايت ده ..

وراح المخبرون يتأكدو ورجعوله وقالوا : مفيش ياباشا ..
انا : طب على فكرة بقى الواد ميخا ده معايا وكان ناوى يفتح زيى ..

لقيت ميخا قلع البنطلون وشغل السايتات الاباحية بصوت عالى .. كزيادة فى الاقناع يعنى .. والباقى ما أقدرش احكيه.

المهم شدنى الطاقم الامنى خارجين من السيبر وانا اردد : ياميخا ياميخا ..

فى احد الاقسام دخل لى ظابط وقعد يرغى معايا كتير وسألنى عن انتمآتى السياسية وانا اجاوب بالنفى ..

وبعد كدة دخل ظابط اكبر وقالى جملتين : بص يابو حميد انت طبعا تسمع عن جهاز كشف الكدب اللى فى امريكا .
انا : ايوة ياباشا..

الضابط : كويس . احنى بقى هانعرضك على جهاز زى ده بس بلدى شوية اسمه الخرارة , عبارة عن سلك , والسلك ده طالع منه فرديتين فردة فى الكهربا والفردة التانية انت عارف بتبقى فين ؟؟؟
10آلاف فولت يابو السيد. خر بقى براحتك

ساعتها افتكرت ان انا شفت المشهد ده فى فيلم تيتو !!
فعاجلت الظابط فى السؤال : هو حضرتك الاستاذ خالد صالح ؟!!!
الظابط وهو يلفحنى بالقلم : (طراااااخ ) حامد صالح مين ياروح امك . انت بتهزر ؟

انا : خالد ياباشا . اسمه خالد صالح مش حامد صالح ..

رد عليا وهو يصافحنى بقلم آخر: (طراااااخ ) اخرس خالص . انت شكلك كدة ملاوع ومش هاتنطق بالذوق
وخرج الظابط ودخل الظابط الصغير وقاللى : يللا ياحبيبى روح ..

انا : نعم ؟اروح؟

الظابط : اه . ده كان تدريب عام لدفعة جديدة من ظباط امن الدولة وانت من الناس اللى وقع عليها الاختيار عشان ننفذ فيها التدريب .!!!

انا : ايه الحلاوة دى . بس اشمعنى انا ياباشا ؟؟

الظابط : لأن انت سهلت المهمة علينا احنا كنا عاملين السايتات دى كطعم عشان نصطاد بيه المتطوعين امثالك ..

انا : متطوعين ؟!! . ده طبعا من حظى الوردى . بس مش حرام عليكوا تبهدلوا الناس معاكوا كدة يابيه ؟!
الظابط : ده من اجل خدمة الوطن والحكومة ... ويللا بقى اتفضل ماتضيعش وقتنا ..

انا مترجلا الى خارج القسم : حكومة ؟!! ....... يلعن ابو الحكومة لأبو رئيس الحكومة ...
الظابط مناديا من داخل القسم بعد ان سمعنى : هاتووووووووووووووووه ..

عموما للزيارات .. ولو انى عارف ان مفيش حد هايعبرنى .. انا مشرف الآن فى معتقل جمالكوا بالصحراء الغربية
مع تحيات شهيد الوطن