[_iMuslim_]

عروستنا القطة الشقية اللى كان لازم تهبل عريسها على غير المعتاد

Fayrouz

يتقدم أحد العرسان إلى Fayrouz في بيتها بعد أن سمع عنها وشاهدها عن بعد , ولم تكن هي قد رأته بعد حتى هذه اللحظة ولا تحدثت معه .. فتدخل Fayrouz إلى غرفة الصالون التي ينتظر فيها عريسها في زيارته الأولى لها في بيتها.

فيقف العريس انتباه بمجرد دخول Fayrouz ليسلم عليها.

العريس : أهلاً وسهلاً .. أنا أبقى الـ....

Fayrouz(مقاطعة) : أنا عايزة أعرف إنت أما شفتني , شفتني فين بالضبط ؟؟ .. وليه ما جيتش تتكلم معايا مباشرة كده وتعرفني بنفسك وتشوفني إذا كنت موافقة عليك من الناحية المبدئية ولا مش موافقة .. ولا يعني إنت خلاص افترضت إن مجرد موافقتك تحسم الموضوع وموافقتي أنا ما هي إلا مجرد شكليات لا أكثر ؟؟

العريس : أبداً أبداً .. ما هو أنا كنت ناوي أقولـ....

Fayrouz (مقاطعة) : كنت ناوي تقول إمتى إنشاء الله !! .. بعد ما تيجي وتتقدم عشان تخطبني ؟؟ .. طب وما هزِّتش طولك ليه وجيت تكلمني كده وجهاً لوجه في المكان اللي رحت تشوفني فيه ؟؟ .. ولا كنت مكسوف وخجلان تيجي تكلمني ؟؟

العريس : أصلك كنتي واقفة مع صاحباتك , وأنا خـُفـت لو رحت كلمــ.....

Fayrouz(مقاطعة) : بتقول (خـُفـت) !!!! .. مش مكسوف من نفسك

كده وانت راجل طويل وعريض وبتقول (خـفـت) ؟؟ .. ده أكبر دليل على إنك شخصية مهزوزة وما

عندكش القدرة على اتخاذ قرار .. وكنت خايف من إيه إنشاء الله ؟؟ .. كنت خايف لأعضك بسناني

ولا أمسك فيك وأندهلك العسكري . ولا تلاقيك كنت خايف من المواجهة لأكشفك من أولها.

العريس : طب أرجوكي تديني فرصة بس أوضحلك الصـــ.....

Fayrouz(مقاطعة) : فرصة إيه دي اللي انت عايز تاخدها !! .. ما انا من

ساعة ما شفتك وأنا سايبالك فرصتك تتكلم براحتك وانت اللي مش عايز تتكلم .. ما أنا قاعدة

قدامك أهو ساكتة ومستنية تتكلم وانت اللي واقف قدامي زي اللوح لا بتحرك لسانك ولا بتنطق ,

وفي الآخر تقوللي إديني فرصتي !! .. هو انت من أولها كده جاي تتبلَّى علي ولا إيه !!

العريس : أنا عايز أقول ...

Fayrouz(مقاطعة) : إنت لسه عايز تقول !!! .. مش كفاية كل اللي انت

قلته من ساعة ما شفت خلقتك ؟؟ .. نازل رغي رغي رغي , وكلام كلام كلام .. إنت إيه يا أخي ما

زهقتش من كثرة الكلام !! .. ولا يعني الراجل في نظرك هو المفروض اللي يتكلم لوحده والبنت

دي مجرد خيال مآتة تقعد قدامه وتسمع من غير ما تفتح بقها بحرف واحد .. كفاية تفرقة بقى.

العريس : أرجوكي .. أتوسل إليكي .. إديني دقيقة واحدة بس عشــ...

Fayrouz (مقاطعة) : يعني مش مكفيك الساعات اللي انت أخدتها دي

كلها عشان تتكلم , وكمان عايز دقيقة فوقهم , ده انت يا أخي بني آدم ما عندكش دم ولا رحمة

بالشخص اللي قدامك .. ده انت رغم الوقت اللي أخدته ده كله تتكلم عن نفسك لحد دلوقتي ما قلتليش انت بتشتغل إيه وفين.

العريس : أنا بشتغل فـ....

Fayrouz (مقاطعة) : ما أنا عارفة إنك أكيد بتشتغل , أمال يعني جاي

تخطب وانت صايع من غير شغل .. أنا بسألك انت بتشتغل إيه وفين مش بسالك انت بتشتغل ولا لأ.

العريس : ما انا كنت جايلك في الكلام أهو .. بقولك أنا بشتغل فـ....

Fayrouz (مقاطعة) : ده انت ممل قوي يا أخي .. كل ما أسألك سؤال

تقعد تقوللي مقدمة في الأول قبل الإجابة .. يا أخي خش في الإجابة على طول وبلاش المقدمات الطويلة اللي بتضيع فيها وقت دي

العريس : إنتي فاهماني غلط .. أنا بقول ....

Fayrouz (مقاطعة) : إيه ده .. بتقول إني فاهماك غلط ؟؟ .. يعني

قصدك تقول إني ما بفهمش ؟؟ .. بقى أنا اللي مش بفهم يا متخلف انت .. بقى واحد زيك جلنف

ومهزوز الشخصية يقول علي مش بفهم !! .. إنت حمان يا حمان ؟؟

العريس (وقد أصابه الصداع من صوت Fayrouz) : طب ممكن حضرتك توطي صوتك شوية أحسن وداني تعبتني قوي ودماغي جالها صداع....

Fayrouz (مقاطعة) : وكمان مش طايق تسمع صوتي وعايزني أوطيه

؟؟ .. مش كفاية كاتم على نفسي ومش مخليني أنطق بكلمة واحدة وانت اللي نازل كلام ورغي

من الصبح , وكمان عايز حتى الكلمتين اليتامى اللي بقولهم أقولهم وأنا موطية صوتي .. دا انت

فعلاً بني آدم ما عندكش دم ولا زوق.

العريس (وهو يسد أذنيه) : أنا فعلاً وداني واجعاني من صوتك وحتتخرم .. أرجوكي توطـ...

Fayrouz (مقاطعة) : لو اتكلمت كلمة واحدة تانية عن صوتي العالي

حديك بالشلوت في ودنك .. إنت فاهم ولا لأ .. الظاهر إن انا اللي غلط أما إديتك أكثر من وقتك في

الكلام والرغي وكان المفروض أقاطعك وما أفتحش السكة ليك على البحري كده في الكلام.

العريس (مستنجداً) : وداني يا ناس .. وداني يا هووو .. طب ممكن قطنتين أحطهم جوه ودانـي ..

أنا فعلاً مش قادر أستحمل.

فتكظم Fayrouz غيظها وتقوم بخفض صوتها بشكل كبير.

Fayrouz (بصوت منخفض جداً) : طب كده صوتي كويس ؟؟

العريس : أيوه كده .. كان فيها إيه لو صوتك كان كده من الأول ؟؟

Fayrouz (وقد خفضت صوتها أكثر من الأول) : طب إيه رأيك في كده كمان ؟؟

العريس : لأ لأ .. مش قوي كده .. عشان أقدر أسمعك كويس.

Fayrouz (بصوت شديد الانخفاض) : أنا مش حعلي صوتي .. قرب انت ودنك من بقي عشان تسمع كويس.

فيقترب العريس من Fayrouz ويقرب أذنه من فمها.

Fayrouz (بصوت منخفض جداً) : كده سامعني كويس ؟؟

العريس : برضه لسه الصوت واطي .. ياريت تعليه شوية .. هو انتي ما تخرمي وداني بصوتك يا إما تكتميه خالص ؟؟

Fayrouz (بصوت منخفض) : طب قرب ودانك أكتر من بقى وافتحها كويس.

فيفتح العريس أذنه بشدة ويجعلها بالقرب من فم Fayrouz .. وفي تلك

اللحظة تأخذ Fayrouz نفساً عميقاً , ثم تصرخ بكل ما أوتيت من قوة في أذن العريس:

Fayrouz (صارخة بكل قوتها في أذن العريس) :

تــوووووووووووووووووووووووووووووووت

فيصاب العريس بصدمة عصبية يقع على أثرها على الأرض وهو يصرخ ممسكاً بأذنيه الاثنتين صارخاً:

العريس : ودانيييييييييييييي .. إلحقوني يا ناااااااااااس .. ودانييييييييييييييي.

Fayrouz : عشان تبقى تحرم تتكلم عن صوتي تاني.

العريس (وهو لا يزال في حالة هستيرية) : أنا مش سامع حاجة .. أنا مش سامع صوتي .. أنا مش

عارف أحبالي الصوتية هي اللي مش بتطلع صوت ولا وداني هي اللي انطرشت ؟؟

Fayrouz : ما أنا سامعة صوتك كويس أهو وحيخرم وداني.

العريس (لFayrouz) : أنا شايفك بتحركي بقك وبتقولي حاجة بس أنا

مش سامعك , ولا حتى سامع صوتي كمان .. أنا انطرشت يا ناس .. أنا انطرشت يا هوووو .. منك لله إنتي الي طرشتيني.

Fayrouz : إنت حتلبسني تهمة ولا إيه يا جدع انت ؟؟

العريس : أنا شايفك بتحركي بقك ولسانك وبتقولي حاجة بس أنا مش سامعك .. إوعي تكوني بتشتميني ؟؟

Fayrouz : أشتمك إيه ونيلة إيه !! .. إحنا في إيه ولا في إيه ؟؟ .. خلينا في ودانك الطرشانة دي.

العريس : إوعي تستغلي طرشي وتشتميني .. أنا برضه ممكن أعرف انتي بتقولي ايه من لغة الشفايف.

Fayrouz: على العموم الحالة اللي عندك دي حالة عارضة وبتروح بضربة قوية على القفا.

فتباغت Fayrouz العريس وترفع يدها لأعلى , ثم تهوى بها بكل قوة على قفا العريس فتصفعه صفعة مدوية.

العريس (بذهول) : إيه ده ؟؟ .. أنا حسيت بضربة جامدة على قفايا .. بس ما سمعتش صوتها.

فتعاود Fayrouz الضربة مرة أخرى على قفا العريس , ولكن هذه المرة

كان بصورة أقوى من السابقة فتعيد للعريس حاسة السمع ثانية .. ولكن للأسف الشديد تتسبب في ضرر آخر.

العريس : هيييييييييييييييييه .. أنا دلوقتي بسمع .. أول حاجة سمعتها صوت الضربة على قفايا ..

بس إيه ده .. مين اللي طفى النور ؟؟ .. النور كان مولع قبل الضربة الثانية .. إيه اللي طفاه ؟؟

فتضطر Fayrouz إلى صفع العريس للمرة الثالثة بضربة أشد قوة من سابقتيها فتعيد للعريس بصره المفقود.

العريس : هيييييه .. النور جه .. أنا اتولدت من جديد.

Fayrouz : كويس إنك رجعت كويس .. أقعد قدامي بقى لحد أما أخلص كلامي.

العريس : أقعد قدامك أسمع صوتك من تاني ؟؟ .. ليه هو أنا لاقي وداني دي في الشارع ؟؟ أنا ماشي بااااي.

فينطلق العريس نحو باب الشقة هارباً من صوت Fayrouz , وتنطلق Fayrouz وراءه وهي تصرخ وتنادي.

Fayrouz (صارخة) : إنت رايح على فين ؟؟ .. أنا لسه ما خلصتش

كلامي .. أقف عندك .. تــووووووووووووت .. حضرب في المليان .. تــووووووووووووت .. تــووووووووووووت.