[mado12]

ما اجملها وما اجمل جوها ومناظرها الطبيعية الغلابة التي تتميز بها

فكم من المساحات الخضراء والفنادق على اعلى مستوى قاعات مؤتمرات ونوادي فهي حقا المدينة التي ابهرت بجمالها العالم كله

فهي مدينة اجنبيه على ارض مصرية

لا يا جماعة انا مش بتكلم عن "مدينتي" بتاعه مجموعة طلعت مصطفى اللي دعايتها شغاله على التليفزيون والفضائيات ليل نهار

لا ده انا بتكلم عن شرم الشيخ …ايوة شرم الشيخ مش مدينة اجنبيه على ارض مصرية لانها جميلة بس لا ده فيه مدن كتيرة اوي في منتهى الروعة

امال اجنبيه ازاي بقى انت هاتجننا

اقولكم انا اجنبيه ازاي اللي راحها هايعرف ليه هي اجنبيه

ليه المصري بيكون هو الغريب اللي فيها

والاجانب هما اصحاب البلد جرب مرة تروح كده هناك وشوف" البهدلة" اللي هاتتبهدلها هناك

هناك سوء معاملة فظيع جدا للمصريين من قبل الكمائن التي موجوده على الطريق وسين وجيم ورايح ليه وهاتقعد فين و..و..و..و..و.. ومش هانخلص بقى في يومنا

والغريب ان كل كمين تتسال نفس السؤال وتطلع البطاقة علشان توريها للظابط اللي واقف

فالاحسن انك تاخد معاك كيس بلاستيك وتحطة في رقبتك وانت رايح وتحط فيها البطاقة علشان بدل ما كل شوية تقوم وتطلع بطاقتك ماهو انت مش راجل فاضي وقتك ثمين

ثمين مش سمين اللي همه على الاكل يطلع ياكل وبعدين ييجي يكمل

في نفس الوقت وانت بتتفتش وتتسأل تلاقي واحد تاني اجنبي مش ابن البلد ماشي وبيضربوله تعظيم سلام ولا يفكروا يكلموه انت رايح فين ولا الكلام من ده

خالص ده ضيف عندنا … ايوه ضيف لازم كرم الضيافة واحنا المصريين اللي اصحاب البلد يطلع عين اهل اللي خلفوا اهلنا

ايه اللي طمنهم يمكن تكون ارهابي ولا حاجة او هربان من الجيش ولا حاجة

بس يعني مش لدرجة ان كل كمين كل كام كيلوا تتفتش ورايح فين وليه امتى وازاي

طيب يا جماعة ليه سوء المعامله ده

ده احنا مصريين وربنا مصريين ولا هما ضحكوا علينا وكتبوا في البطاقة مصريين واحنا من كوالامبور

ده حتى اللي من كوالامبور مش هايعملوا فيه كده

ماشي يكون فيه امن على المدينة لانها بلد سياحية من الطراز الاول ومدينة السلام بس مش للدرجة دي ومش مع المصريين ولاد البلد بس

ليه مايكونش على الكل مصري او اجنبي

مش كده ولا ايه يا جماعة