[WOLF 757]

الاعتزال


من اسمه نعرف انه مصطلح يطلق علي حالة انتهاء من عمل شئ ما ، فهناك من يعتزل المشاركة في رياضة كرة القدم ( بما انك واضع بطاقتين في بداية موضوع ) وهناك ايضاً من يعتزل المشاركة في منتدي معين او ماشابه

تتعدد الاسباب كـ تعدد النجوم في سديم حديث الولادة ، فلكل من المعتزلين سبب مختلف ، فهناك بسبب الدراسة اعتزل ، وهناك بسبب تكوين اسرة اعتزل , وهناك كدا مزاج اعتزل ( يعني نام وصحي تاني يوم قرفان وقال وربنا مانا داخل للمنتدي مرة اخري ) , لاكن في النهاية يضل عدم التواجد بشكل مستمر هو عنوان الرواية


دي المقدمة الي ماتقولشي بيها اني زي العجوز رفعت اسماعيل وجاي يحكي مقدمة لقصة من قصصه البالية



قصة خمول المنتدي + اعتزال الاعضاء

ترتبط ارتباط جذري بمايحدث في المنتديات عموماً

فـ زمن المنتديات قد ولي :) بعد انتشار البديل لها .. فيس تويتر الخ

ولما انتشرت مواقع التواصل الاجتماعي بكثرة , قل نشاط وهبطت اسهم المنتديات ككل ! وده شئ لاحظته واعتقد انه ملاحظ للجميع

فقط الناس العتيقة التي عشقت وادمنت انواع المساحات الافتراضية المغلقة ( المنتديات اعني ) هيا من صمدت , ولاكنها قلة امام من هجر المنتديات نحو عالم اوسع كالفيس ( الي قريب هيبقي مهجور بسبب ظهور شئ بديل مستقبلاً يكون اوسع واسرع وامتع .. كالعادة يعني )

وبسبب النقلة النوعية التي حدتث بشكل كثيف للغاية اخر 5 او 4 سنوات ,, بطبيعة الحال يقل نشاط اي منتدي كان لعدم تواجد نشاط الاعضاء السابق واكتفاء من يدخل للمنتديات بـ اشياء لها من المصلحة فقط ( تحميل اغنية برنامج الخ ) وليس كالسابق عندما كان الدخول للمنتدي اشمل واوسع واعم


ده سبب رئيسي

الاسباب الثانوية

تتلخص في ماذا يوجد من جديد ؟

لسان حال اغلبية رواد المنتديات يقول الاتي ::-

اوكي انا عندي فكرة لموضوع اوبهة حاجة تحفة وهتكون بكتابة قلمي ولامش كدا .. ده كمان الصور هصممها بنفسي واشيك الموضوع بكم فواصل كدا تكون بتصميمي برضو ..

يجي اخانا يعمل الموضوع ويضيع شئ 7 ساعات وهو بيعمله ويشربله 5 كبايات شاي ( او ببس كولا ) عشان يدوه التركيز اللازم لكتابة موضوعه

وامتي مايخلص .. يجوله ردود بسميهم ردود قتل الحماس .. واعني عن ردود .. شكر . هايل . ثانكس . مية مية . وسلملي ع سعدية

الردود دي بتخلي صاحبنا يرد عليهم بـ اتيكيت ( مطلوب ) ويقول نورتو او شكراً علي المرور ( وكانه واقف في اشارة مرور وبيمسي ويشكر من مر امامه ! )

وبعد كدا هيبقي صاحبنا حالف يمين ثلاتة انه مش هيعمل موضوع زي الي عمله ده وان جهده سيتقلص الي مجرد كوبي وباست لكم معلومة + شوية صور وفواصل وتزين وخلاص

فن الرد بيحدد مصير المنتدي , ووقود دفعه للامام

فـ المواضيع كمثل السيارة .. الي مش هتتحرك بدون وقود ( ردود فنانة )

لذلك اصحاب الكتابات الرائعة والمواضيع الصاخبة لن تقبل ان تتعب في مكان , محصلتها منه هيا فقط ( مشكور , يسلمو , مية مية وسلملي ع سعدية وغيرو )

وبتالي ستعتزل الدخول للمنتدي او تعتزل مجهودها وتكتفي بمايقص ويلصق .. وده اعتزال غير مباشر هيأثر علي المنتدي بشدة كأثاتيره من اعتزال العضو وعدم دخوله


وبما ان السبب ده يعتبر ثانوي فيبقي ممكن تغييره ع عكس السبب الاساسي فوق بتاع الهجرة ع الفيس ( الا لو ابن حلال عملها وهكر الفيس ويكسب دعوات ملاك المنتديات من طيب الدعوات ) . والتغير يبقي في نشر فن الردود ، كتحفيز من الادارة علي مسابقة افضل مناقش . افضل رد في الشهر او الاسبوع . اي حاجة تحفز وتحث علي الاجتهاد في الردود



---------------

نجي لسبب اخر من الاسباب الثانوية .. وسأخص بها بيتي ده

الي عشت فيه فترة سنتين من 2008 الي 2010 بشكل متواصل .. وبعدها من 2011 الي 2014 علي شكل غزوات متباعدة

في فترة ما حصل في المنتدي اشكال معين ( لااريد الخوض فيه ) بس الاشكال ده غير من وجه المنتدي وسيره

لانه حدث فيه شرخ مش ساهل .. والشرخ ده ادي الي تمزق اسرة المنتدي لفترة كبيرة من الزمن قبل ان تعود

طبعاً قلت مابحب الخوض في ماحدث قديماً وانفض الغبار واتذكر . بس ماحدث ادي الي اعتزال جماعي للاعضاء والاداريين في المنتدي

والي كانو نقولو في خلاف مع صاحب الموقع لاسباب معينة مش مهم ذكرها لانه اكل عليها الدهر وشرب

ده بلنسبة لاعتزال البعض من الرعيل الاول .. والي منهم من رد قبلي واعني صديقي ورفيق الدرب ( عمرو ماندو ) وغيرهم من اناس اعطو للمنتدي حقه من جهد وتعب وبناء من دافع حب للبيت ده فقط كـ ادم وديابلو واخرون

والاختلاف مع صاحب المنتدي ادي الي اعتزال هاته الفئة

وده الشق الاول

الشق التاني من سرد هاته الجزئية من الاسباب الثانوية

هو ان هناك فئة اخري اعتزلت من المنتدي لظروف معينة خارجة عن ارادته فمن كان بسبب دراسة او من جيش ( زي الحج اسمعيل او حج ايه انا التاني ! ده اكيد بقي دلوقتي سيادة العميد اسمعيل ) او من عمل او الخ من ما لن استطيع حصره .


----------------

ونجي بقي لاخر سبب في رائي ( عشان وربنا انا شاكك اني طولت ) . وان كان بسيط بس بشوفه اهم سبب

الروح

وده بقي شئ عفوي يجي من حب الاعضاء للمنتدي ومكوناته ونظامه ومن فيه

زمان فتــرة 2008 ~ 2012

علي سيرة الفترة دي

تعرف وقتها اجدع موضوع كان ممكن يتحدف ع طول لو اتحط دلوقتي قدام الجيل الجديد من المواضيع المنسقة والمنمقة والديجيتال يعني

بس وقتها كانت الردود بتفرق ,, ردود عفوية بتخلق جو وروح وابتسامة ع الثغر بتخليك مدمن انك تحط مواضيع وترد من قلبك

بدون تصنع بدون تكلف بدون تزيف بدون مصلحة ترجي بدون نقاط تجلب

وتكون عايز ترد لمجرد انك من قلبك عايز ترد وتشارك

دي كانت اهم اساس تم بناء عليها المنتدي وقتها وبيها تكونت اسرة وبيها تكون جو يشجع كل من شاف المنتدي وهوا زائر يسجل وينسي انه كان جاي لمجرد الحصول ع بوت او برنامج

هل لوقــوع لعـبة سيلكـرود تأثير على المنتـدى ؟

نص ان لم يكن جل مبدعي المنتدي ككل لا يقضون ع اللعبة ( في عزها ) اكثر من 3 ساعات في الاسبوع :)
فلك ان تتتخيل تاثير وقوع سلكرود ع المنتدي الان ^_+

اللعبة ليست اكثر من مجرد اسم للمنتدي بلنسبة لاغلب رواده