[mohamed_1722]

بجد موضوع جميل وانا هتشجع واقول كلام عمر مل قولته لحد ولا حتى اهلى

بس اعذرنى عشان ردى هيبقى طويل شويه

انا اتولدت وحيد مليش اخوات وعائلتى كانت حالتها الماديه كويسه مش مليونير بس احسن من معظم اصحابى ( من الناحيه الماديه بس )

كنت طول عمرى طالب مستواى التعليمى ممتاز لحد سنه تانيه اعدادى فى السنه دى اعز صديق ليا بدا يشرب سجاير طبعا زعلت منه واتخانقت معاه فتره وبعد كده قولت اجرب ممكن تكون كويسه وفعلا شربت سجاير

بعدها بكام شهر لقيته بيشرب سجاره شكلها غريب سالته قالى حشيش يومها ضربته لاول مره فى حياتى مع انى من النوع الجبان اللى عمرى ما بعمل مشكله مع حد بس كنت خايف عليه قوى

بعدها شربت معاه بس كان فى واحد هو اللى بيدينا الحشيش ببلاش عشان كنت بصلحله الكمبيوتر تقريبا كل اسبوع مره ( كنت عبقرى كمبيوتر وانا صغير )

بعدها الاخ ده سافر الغردقه واضطرينا نشترى لنفسنا الحمد لله كان بيبقى معايا فلوس كتير بالنسبه لواحد فى سنى فكنت انا اللى بشترى وبشرب صاحبى عشان كنا فاكرين ان الحشيش ده حاجه حلوه وان كده بقينا رجاله

عدى كام شهر وبقيت بشرب السجاير فى الشارع مش بستخبى زى زمان وكام شهر كمان ومعظم اصحابى واهلهم عرفوا انى بشرب مخدرات لحد ما اتصدمت صدمه حياتى لما لقيت اعز اصحابى اللى عرفنى على المخدرات مش عايز يكلمنى عشان اهله بيضربوه ويقولوه يبعد عنى

ساعتها بدات افوق وقولت خلاص هبطل المخدرات مش عشان نفسى بس عشان علاقتى مع اصحابى ترجع زى الاول

وقعدت سنه ونص لحد ما قدرت اغير فكره الناس عنى ( كانت فكرتهم عنى وحشه اوى ) والحمد لله بقيت كويس بس بعد ما تقريبا دمرت مستقبلى بعد ما كنت بطلع الاول على مدرستى اتفاجئت فى تانيه ثانوى انى عندى ملحقين رياضه وكيميا ورجعت الفكره الوحشه عنى تانى بس المره دى عشان ساقط ومش بذاكر

قررت امتحن المادتين دول فى سنه لوحدهم عشان اخد الدرجه كامله ( رجاله الثانويه هيفهمونى ) وكانت صدمه اكبر لما جيت يوم امتحان الكيميا واكتشفت انى مش عارف ولا حرف وهسقط تانى وقولت خلاص هاخدها معايا سنه تالته

دلوقتى اصحابى كلهم فى كليات وانا فى الثانوى لسه بس مش دى المشكله المشكله ان البنت اللى حبيتها باعتنى لما دخلت كليه طب وانا لسه فى ثانوى ووافقت على اول عريس اتقدملها بحجه انى لسه قدامى سنين على ما اخلص دراسه واجهز نفسى للجواز وكده

انا جدا من نظره اناس ليا كل حلمى ان الناس ترجع تحترمنى زى زمان