واحشني حوش المدرسة
...
وحبة عيال متعبيين ف المرايل
بيحيو العلم
واحشني سن القلم
ورسمة بِكر
فيها الحرم
وناس كتير راكعين انما
قلوبهم باصة للسما
واحشني بصة بطرف عين
لاحلى بنت شفتها
اجمل ما فيها
ضحكة بريئة لمستها
لحظة ما قلت كلام ملخبط
وهي ف ثواني عليا ردت
باربع حروف هزت كياني
واحشني صوت الجرس
واستغماية ف الفصول
وصوت مدير المدرسة
لما اسمعه
يصيبني الخَرَس
وامتحان مش مفاجئ
اول كل شهر
باسئلة كما البنادق
..
اكمل لاخر النشيد
هات مرادف الكلام
اختر ما بين القوسين
..
وكتير كلام
اخره علامة استفهام
ووقت فَر ف دقايق
واحشني كل ذكرى عشتها
وصورة قديمة اتصورتها
بروزتها وعلقتها
على حيطة فوق مكتبي
كل ما يدوبني الزمن
اخدها ف حضني واضمها