عرض مشاركة واحدة
قديم 31-05-2010, 08:10 PM   #25

Zeka 007
عضو فعال



الصورة الرمزية Zeka 007


• الانـتـسـاب » Feb 2010
• رقـم العـضـويـة » 67628
• المشـــاركـات » 494
• الـدولـة »
• الـهـوايـة »
• اسـم الـسـيـرفـر »
• الـجـنـس »
• نقـاط التقييم » 10
Zeka 007 صـاعـد

Zeka 007 غير متواجد حالياً



افتراضي





الحلقة السابعة

العريـس جـه

قالت سلمى
:
جلستُ في غرفتي بعد ان غيرت ملابسي وارتديت الطقم الجديد.. اللي ماما دافعع فيه الشىء الفلاني!!.. واحترت

هل أضع ماكياج أم لا؟ في العادة انا لا أضع الا قليلا ولكن فعلا انا نفسي الجوازة دي تكمل بأي شكل.. يعني هي ح

تكمل بالماكياج يا سلمى؟ ما تعقلي كده

قررت أن أضع ماكياج خفيف جدا فقط يخفي الهالات السوداء تحت عيني من قلة نومي بالأمس

ياسلام لو دي تكون آخر مرة أتعرض فيها للمسرحية دي ويكون فعلا هو ده العريس المنشود اللي المواصلات أخّرته

شوية!! ربنا يجعله آخر العرسان

هو كل اللي سمعته عنه كويس.. محاسب اسمه مجدي وعمره 36 سنة وعنده شقة في بيت أهله

يعني مالكيش حجة ياست سلمى وسيبك بقى من حواديت البنات الفارغة: أصله قصير اوي..اصلع فلّة!.. فتحات

مناخيره مش مريحاني!.. طوييييييييييل أوي والجزء التاني منه نازل في الاسواق قريب

لمهم الشخصية والتديّن والاخلاق وحتى لو كان غتت شوية.. على رأي ماما غمّضي واتجوزي.. كلهم زي بعض في الآخر

اتأخروا نصف ساعة وأخذت أنتظرهم من وراء شباك اوضتي أحسن يكونوا غيّروا رأيهم وفلسعوا يا رجالة

وأخيييييرا لمحت الست والدته وهي تنزل من عربية ميكروباص أمام منزلنا.. ايه ده مش يركبوا تاكسي؟ ومعها انسان

طويل وعريض ولابس بدلة كحلي

أكيد هو المغفور لشبابه العريس.. شكله من بعيد كده كويس طول بعرض بارتفاع على رأي عادل امام عريض المنكبين

شلولخ!! آدي اول حاجة تفتح النفس.. ربنا يستر

وجاءت رويتر البيت ملك هانم وهي تزف البشري والدم يتقافز من وجنتيها وقالت وهي تلهث: العريس جه ياابلة

سلمى.. ده كبير وطويل اوي.. على فكرة عاوز له سلّم علشان أسلّم عليه.. ماما بتقول لك هاتي صينية الحاجة

الساقعة والجاتوة وتعالي بسرعة

*******
ذهبتُ الى المطبخ وانا اتمتم في تعجب: اشمعني العرسان اللي اول ما بيقعدوا بنلزق لهم الحاجة الساقعة في وشهم

على طول؟ ما اي ضيف بيقعد شوية وبعدين يشرب حاجة

الظاهر ان دي طريقة تكتيكية من الامهات علشان العرسان ما تطفشّ بسرعة

حملتُ الصينية الميمونة ودقات قلبي مثل مزيكة حسب الله.. ودخلت الصالون لأجد ماما وبابا والعريس وأمه.. والحمد لله

ماما لحقتني وأخدت مني الصينية قبل ما أوقعها على أم العريس وتبقي مصيبة من أولها

اهلا اهلا بعروستنا الحلوة.. ايه الجمال ده كله؟

قالتها أم العريس وكأنه أكلشيه محفوظ بتقوله كل الحموات في الحالات دي

أخيرا جلستُ.. وانا أكاد أذوب من الخجل وأنا أشعر أن كل العيون تتفحصني وتعاين كل مللي في جسدي.. وبالعافية

اختلست نظرة الى العريس لأجده أضخم مما رأيته في الشباك حتى تقاطيع وجهه من الحجم العائلي! وعنده شنب ما

شاء الله ماشفتش زيه في حياتي.. يعني لو اشتريت صقر مش ح احتار أحطّه فين؟

حاجة كده من الرجالة بتوع زمان الجامدين يعني لو شخط فيّا شخطة ح يبعتني السنبلاوين

وقعد بابا يستجوبه كالعادة ولاحظت انه بيرد بكلمة او كلمتين على الاكثر ويحمر وجهه وتلحقه الست والدته وتجاوب

بداله.. ولما لاحظت تعجب بابا ردت بسرعة: أصل مجدي مش بيعرف يتكلم مع الناس كويس.. أصله بيتكسف

ومصمصت ماما على شفتيها من انسان الغابة اللي بيتكسف ده وسألتها: هو وحيد ولا ايه يا أم مجدي؟

فردت باشفاق: أيوة ياختي.. ده وحيد على أربع بنات ومن كتر خوفي عليه من الحسد ربيته زي ما ربيت أخواته البنات

تمام.. ما يعرفش يروح ولا ييجي لوحده أبدا ولازم ياخد رأيي في كل حاجة حتى في أكله ولبسه.. انا اللي باختار له

كل حاجة بنفسي.. لما انا نفسي ومُنى عيني اجوّزه علشان أرتاح من مسئوليته شوية

واصطبغ وجه عريس الغفلة بالحمرة.. وانقلب الوضع انا اللي باتفرج عليه وهو يمسح عرقه.. وبعدين قلت في بالي:

اوعي تفركشي الجوازة ياسمسم.. اهو أحسن ما يكون شرس ويوريني العين الحمرا والبرتقالي كمان.. اهو اربّيه على

ايدي

وكأن اجابة حماتي المصونة وقفت في زور بابا فسأل العريس: وحضرتك ما اتجوزتش ليه لحد دلوقتي يا أستاذ مجدي؟

فرد بخجل وتلعثم: أصل ماما ما وافقتش على العرايس اللي قبل كده!! ولاّ اقولّك اسألها حضرتك هي تقولك أحسن

التقطت امي الكلمة وتمتمت باستغراب: عرااايس؟

فأجابت أمه بكل ثقة: والله ما اكدبش عليكي انا خطبتله قبل كده 6 مرات.. مش عارفة البنات حصل لها ايه؟ مابقاش

ينفع معاهم الراجل الطيب السكّرة.. زعلانين انه يعتمد عليّا في كل حاجة.. هو انا مش امه برضه ولا ايه؟.. طيب ده

ابني دودو ده بالدنيا كلها.. لو أطول اني أخبيه جوا عينيا من الهوا الطاير كنت عملت والله

جلست أراقب انفعالات سوسن.. أقصد دودو.. يوووه عريس الغفلة!! وهو يراقب أمه بانبهار مثل الطفل الذي يراقب امه

وهي تطبخ وكأنها تسوي الاعاجيب

آآآآآآه ياني ياخيبتك يا سلمى.. يعني اتجوّزه وأخلي أمه تختار لنا ح ناكل ايه النهاردة.. ماهي اكيد بتأكّله بايديها وكمان

شقته فوقها في نفس العمارة يعني ح يرفع صباعه يستأذنها لو حب يقعد معايا في البلكونة بعد الشر ولا حاجة

تبادلت ماما نظرات خيبة الامل مع بابا الذي احمرت أذناه وارتفعت صفارات الانذار واستعد لهجوم أرض أرض على دودو

ووالدته العزيزة

وانقذت ماما الموقف قبل أن يطلب لهم شرطة المسطحات ..وقالت على عجل لأم العريس وهي تنهي اللقاء الكارثة:

والله شرفتونا اوي يا أم دودو!! بس ادينا فرصة نفكر ونرد عليكم وحاسبي على دودو وانتم ماشيين احسن يتكعبل ولا

حاجة بعد الشر عليه




توقيع Zeka 007 :


رد مع اقتباس