الحلقه الثامنة
( المخبر اللى كل حنفى قلم على قفاه والظابط بيحقق معاه , حب حنفى أوى وحس ان قلبه استريحله , وبما ان حنفى هيقضى ليلة فى التخشيبة , فالمخبر حب يخليها ليلة تعلق فى نفوخ حنفى لحد مايموت , فدخله زنزانة محطوط فيها 4 محكوم عليهم بالاعدام - شلبى , مطوة , حماصة ,شطة – المهم حنفى دخل الزنزانة , والزنزانة باختصار عبارة عن أوضة عادية جدا , بس ضيقة شوية , وفيها 4 عواميد كبار أوى , فهم بعد كده انهم المساجين الاربعة مش عواميد ولا حاجة , المهم حنفى حط لسانه جوة بقه ونقى مكان فى الزنزانة وقعد فيه , وكان من جواه مرعوب من الكائنات اللى قاعدة معاه فى الاوضة , لانه حس انه فاضلهم ثانيتين , ويقوموا ياكلوه )
شلبى : أهلا مرحب , بالكتكوت الصغير , اسم الحلو ايه ؟
حنفى : خدامك وملمع جزمتك حنفى
مطوة : هأ هأ هأ , حنفى ؟! هو لسه فى حد اسمه حنفى اليومين دول
حنفى : معلش ياباشا , منه لله أبويا بقى الله يرحمه هو اللى غلط الغلطة دى , أصله ماكانش عارف وهو بيسمينى انى أن هقابل سعادتك , بس وكتاب الله المجيد لو كان يعرف لكان غير اسمى فى ساعتها , الله يرحمه بقى ياباشا
حماصة : والحلو تهمته ايه ؟ قتل ولا حرق ولا آداب ولا تكونش وزير ولهفت كام ميت مليون فى كرشك
حنفى : وزير إيه بس ياباشا وكرش ايه ؟ والنبى ده منظر وزير , بلاش , هو انا عندى كرش أصلا عشان أحط فيه دبوس فرخة حتى
شطة : انت بتكلم كتير ليه ياكتكوت , ماترد على اد السؤال وبلاش لف ودوران
حنفى : حاضر ياباشا انت تؤمر , أنا تهمتى انى ماعييش بطاقة
شلبى : انت هتستعبط يلا
حنفى : ورب الكعبة ياباشا هى دى تهمتى
شلبى : يعنى انت عايز تفهمنى انك جاى مع 4 محكوم عليهم بالاعدام , عشان معاكش بطاقة
(حنفى سمع الجملة الاخيرة دى , ولقى الدنيا ضلمت فجأة و بقى فى عالم تانى , أصله من الصدمة أغمى عليه )
مطوة : ايه يامعلم شلبى ؟ انت عملت للواد ايه , ده باينه مات , ولا دخل فى غيبوبة
شلبى : مايدخل , ان شا الله يدخل الثانوية العامة حتى, احنا مالنا , وبعدين احنا هنخاف من ايه ياض يامطوة , ده احنا محكوم علينا بالاعدام
مطوة :على قولك يامعلم , بس بينى وبينك , انا عايز اعرف ايه حكاية الواد ده ؟, وايه اللى رماه علينا هنا ؟ , هو احنا يعنى يامعلم بيجيلنا كل يوم فرصة زى دى ؟ أنا هفوقه
شلبى : عين العقل ياض يامطوة , مع انى أول مرة فى حياتى ألاقيك بتشغل مخك , ده انا كنت فاكر انك ماعندكش مخ
مطوة : اتريق براحتك يامعلم , هو أنا أقدر أقولك حاجة , ده انت معلمى برضه
( مطوة راح جايب جردل مية ساقعة , وراح دلقه على حنفى )
حنفى : هه هه هه , بسم الله الرحمن الرحيم , اعوذ بالله من الشيطان الرجيم , انصرف انصرف
شلبى : ايه يابنى اهدى , فيه ايه؟!
حنفى : أصل بعيد عنك كنت بحلم بكابوس , قال ايه انا اتحطيت فى زنزانة فيها 4 محكومين عليهم بالاعدام , وماقلكش الاربعة دول شكلهم عامل ازاى , أقل وصف ليهم انهم شبه الخرتيت , وفى واحد فيهم كده اعوذ بالله شبه ابليس , من ساعة مادخلت الزنزانة دى وهو عامل معايا تحقيق , وتحس انه عامل فيها المعلم بتاعهم مع انه شكله راجل اهبل أوى , ولا التلاتة اللى معاه , عاملين زى الخدامين , وشكلهم بيئة أوى , لا واللى يضحكك ان الراجل الكبير بتاعهم لما سالنى انت اسمك ايه , قولتله خدامك وملمع جزمتك حنفى , هههههههههههه , انا أبقى خدام الراجل الاهبل ده , لا واللى يموتك من الضحك ان أنا كنت بقول لكل واحد فيهم ياباشا , باشا مين دول شوية صيع , يلا الحمد لله انه طلع كابوس
(حنفى الله يكرمه بعد ماحكى الكابوس بالتفصيل الدقيق , وبعد ماتوصى فى وصف الاربعة , لقى الدنيا اتشقلبت وبقى شايف كل حاجة بالمقلوب , وفهم اللى حصل لما لقى شلبى بيبصله وعينيه حمرة , ولما عرف انه ماكانش فى كابوس ولا حاجة , وانه داخل على أسود موقف فى حياته , وخصوصا انه فهم ان هو دلوقتى متعلق من رجله , ودماغه لتحت )
حنفى :آآآآآآآآآآآآآآآه , العفو ياباشا والله العظيم ماكان قصدى , أنا كنت فاكر انى فى كابوس , وعلى فكرة اللى انا كنت بكلم عليهم دول ناس تانية خالص , مافيش أى شبه بينهم وبينكم
شلبى : والله , بقى انا راجل أهبل يلا
حنفى : ينقطع لسانه اللى يقول عليك كده
شلبى : ماهو هينقطع حالا
مطوة : واحنا كلنا شبه الخرتيت يلا
حنفى : تنقطع رجله اللى يقول عليكم كده يازينة شباب المحروسة
مطوة : ماهى هتنقطع حالا
حماصة : واحنا يلا شوية خدامين
حنفى : تنقطع ايده اللى يقول عليكم كده
حماصة : ماهى هتنقطع حالا
شطة : واحنا يلا شوية صيع
حنفى : تنقطع رقبته اللى يقول عليكم كده
شطة : ماهى هتنقطع حالا
حنفى : طب انتو كده هتسيبولى ايه بقى
شلبى : هنسيبلك ضوافرك بعد مانخلعها من ايدك
حنفى : ارحمونى ياجدعان , هو انتو مافيش فى قلبكم رحمة , ده انا راجل غلبان والله , طب أنا هعرض عليكم عرض
شطة : قوووول , وانفد بجلدك , فبل مانشرحك
حنفى : نزلونى وماتعملوليش حاجة , وانا هبقى خدامكم , وهعملكم كل اللى انتو عايزينه , وأى حاجة تطلبوها هانفذهالكم , انتوا تناموا بشوات كده , وانا ابقى الخدامة بتاعتكم
حماصة : والله فكرة حلوة يامعلم شلبى , أهو برضه يريحنا , واحنا لو شرحناه مش هنستفيد حاجة
حنفى : يسلم فمك يا أجدع شخصية فيكى يابلد
حماصة : قلت ايه يامعلم؟
شلبى : ماعنديش أيتها مانع , نزل الخرووف ده يامطوة , ولما نشوف ايه أخرتها معاه
مطوة :حاضر يا معلمى